1 Abagabe 2
2
Okufa kwa Daudi
1Obunaku bw'okufa kwa Daudi ku bwairiire haihi, yaayhangangiriza omutabani Sulemaani naamugira ati. 2#Yos 1:6, 7; 23:14. Ndi haihi kugyenda, nk'ab'ensi boona oku bagyenda. Ba ow'amaani, oyeyorekye ori omushaija, 3#Bir 29:9; 1 Bus 22:12, 13. okwate ebi MUKAMA Ruhanga waawe arikukuragiira, okugyendera omu mihanda ye n'okukwata ebiragiro bye, n'ebi yaaragiire, n'ebyatairweho, kandi n'ebi yaahamize, nk'ebyahandiikirwe omu kitabo kya Musa oku biri, obone kuba gye omu bi orikukora byona, kandi n'ei oraagyende yoona, 4#2 Sam 7:12, 13; 1 Bag 8:25; Zab 132:12. MUKAMA abone kuhamya ekigambo kye, eki yangambireho naagira ati: Abaana baawe ku baryerinda omu mitwarize yaabo, baagyendera omu maisho gangye omu mazima n'emitima yaabo yoona n'amagara gaabo goona, toribura oriza aha ngoma ya Israeli.
5 #
2 Sam 3:27; 18:5, 12, 14; 20:10. Kandi noomanya oku Yoabu mwene Zeruiya yangizire, n'oku yaagizire abakuru babiri ab'amahe ga Israeli, Abuneeri, mwene Neeri, na Amasa mwene Yeseri, abu yaitsire naahoora enzigu, akasheesha eshagama omu biro by'obusingye nk'ori aha rugamba, akasiiga egyo shagama aha rukoba oru yaabaire ayezirikiise, n'aha nkaito ezi yaabaire ajwaire. 6N'ahabw'ekyo otwaze nk'oku obwengye bwawe buri, kandi otarikiriza omutwe gwe gw'enju kushuuma okuzimu n'obusingye. 7#2 Sam 17:27-29; 19:31-38. Kwonka oryagirira embabazi beene Baruzilai Omunyagileadi, babarirwe omu barikuriira aha meeza yaawe; ahakuba obu naabaire mpungire Abusalomu mwene sho, nikwo bangiriire. 8#2 Sam 19:18; 2 Bag 16:5. Kandi reeba, hariho Shimei mwene Geera, Omubenyamiini owa Bahurimu, owankyeenire okukyeena kubi munonga aha izooba eri naagiiriireho Mahanaimu; kwonka akaija kuntangirira Yorudani, naamurahira MUKAMA nimmugira nti: Tindikwitsa rurara. 9Kwonka mbwenu otarimubara nk'otaine rubanja; ahakuba ori omushaija w'obwengye; oryamanya eki oshemereire kumukora; kandi oryashuumya omutwe gwe gw'enju okuzimu, guriho eshagama.
10 #
2 Sam 5:7; 1 Bag 1:21; Byak 2:29; 13:36. Bwanyima Daudi yaagwejegyera, yaashanga baishenkuru, baamuziika omu rurembo rwa Daudi. 11#2 Sam 5:4, 5; 1 Bus 29:26, 27. Emyaka ei Daudi yaamazire aha ngoma naategyeka Israeli ekahika makumi ana; emyaka mushanju akagitegyekyera Heburooni, kandi makumi ashatu n'eshatu, yaagitegyekyera Yerusaalemu. 12#1 Bus 29:23; 2 Bus 1:1. Bwanyima Sulemaani yaashutama aha kitebe kya Daudi ishe; obugabe bwe bwahamibwa munonga.
Sulemaani okwita Adoniya na Yoabu
13Adoniya mwene Hagisi yaija ahari Batisheba nyina wa Sulemaani. Batisheba yaamugira ati: Ni buhooro? Onu yaamugarukamu ati: Ni buhooro. 14Yaagaruka yaagira ati: Nyine eki ndikwenda kukugambira. Nyin'omugabe ati: Ngambira. 15#1 Bag 1:5, 25; 1 Bus 22:9, 10; 28:5-7. Yaamugira ati: Noomanya ku obugabe bwabaire buri obwangye, kandi Abaisraeli boona ku baabaire bantaireho amaisho, ngu mbategyekye; kwonka bwanyima kyahinduka bwaba obwa mwene tata, ahabw'okuba akabuheebwa MUKAMA. 16Mbwenu nyine eki ndikwenda kushaba; otakinyima. Onu yaamugarukamu ati: Kigambe. 17#1 Bag 1:3, 4. Yaamugira ati: Nshabira omugabe Sulemaani, ahakuba tarikwija kukwangira, ampe Abishaagi owa Shuneemu, mmushwere. 18Betisheba yaamugarukamu ati: Eego, niinyija kumukugambirira.
19Atyo Betisheba yaaza ow'omugabe kumumugambirira. Omugabe yaimuka kumubugana, yaamwinamira; bwanyima yaashutama aha kitebe kye ky'obugabe, yaaragiira ku bareetera nyina ekitebe, yaashutama aha rubaju rwe rwa buryo. 20Yaamugira ati: Nyine ekintu kikye eki ndikwenda kukushaba; kandi otakinyima. Omugabe yaamugira ati: Kinshabe, Mukaikuru wangye; tindikwija kukikwima. 21Onu ati: Mbwenu ninkushaba oikirize Abishaagi owa Shuneemu ashwerwe Adoniya mwene sho. 22#1 Bag 1:6, 7; 1 Bus 3:2, 5. Omugabe Sulemaani yaagarukamu nyina ati: Ahabw'enki nooshabira Adoniya Abishaagi owa Shuneemu? Mushabire nu n'obugabe; ahabw'okuba ni mukuru wangye; kandi shabira na Abiasaari omunyamurwa na Yoabu mwene Zeruiya. 23Bwanyima omugabe Sulemaani yaarahira MUKAMA, naagira ati: Adoniya ku araabe atazizire eki kigambo, Ruhanga akinture n'okukiraho. 24#2 Sam 7:11, 13. N'ahabw'ekyo nindahira MUKAMA ohuriire, owantaireho, akaanyemeka omu mwanya gwa tata Daudi, kandi onyombekyeire eka nk'oku yaaraganiise, buzimazima eri izooba Adoniya naitwa. 25#2 Sam 8:18. Atyo omugabe Sulemaani yaatuma Benaaya mwene Yehoyaada; yaamuteera yaafa.
26 #
1 Sam 22:20-23; 2 Sam 15:24, 29. Kandi omugabe yaagira Abiasaari omunyamurwa ati: Irooko oze Anatoosi omu kibanja kyawe; ahakuba oshemereire kwitwa. Kwonka mbwenu tindikukwita, ahabw'eokuba okeekorera eshanduukye ya Mukama RUHANGA omu maisho ga tata Daudi, kandi okabonabona na tata omuri byona ebi yaabonabonesiibwemu. 27#1 Sam 2:27-36. Atyo Sulemaani yaabinga Abiasaari omu bunyamurwa, ngu arekye kuba omunyamurwa wa MUKAMA; yaahikiiriza atyo ekigambo kya MUKAMA eki yaagambire ahari Eli omuri Shiilo.
28 #
2 Sam 18:2; 1 Bag 1:7, 50. Egyo nkuru ku yaahikire Yoabu, yaahungira omu Ihema rya MUKAMA, yaakwata amahembe g'eitambiro; ahabw'okuba akaba akwataniise na Adoniya, n'obu araabe atarakwataniise na Abusalomu. 29Kandi baagambira omugabe Sulemaani bati: Yoabu yaahungira omu Ihema rya MUKAMA; kandi reeba, ari aha itambiro. Sulemaani yaayohereza Benaaya mwene Yehoyaada, ati: Irooko omwite. 30Atyo Benaaya yaahika aha Ihema rya MUKAMA, yaamugira ati: Omugabe yaagira ngu, Orugyeyo. Onu ati: Ngaaha! Ka ngwe aha. Benaaya yaagaruka yaagambira omugabe ati: Oku nikwo Yoabu yangira, kandi nikwo yangarukamu. 31#Kur 21:14; Kub 35:33. Omugabe yaamugira ati: Okore nk'oku yaagamba; omwite, omuziikye, obone kwiha ahariinye n'aha nju ya tata orubanja rw'eshagama ei Yoabu yaaseeseire busha. 32#1 Bag 2:5. MUKAMA naija kumuhoora, asheeshe eshagama ye, naamutura abantu babiri abu yaitsize rurara, omugurusi wangye Daudi atakimanyire, haza baabaire bari abantu abarikumukira oburungi n'okuhikiirira, nibo Abuneeri mwene Neeri, omukuru w'eihe rya Israeli, na Amasa mwene Yeseri, omukuru w'eihe rya Yuda. 33Okwo nikwo Yoabu arihoorwa naaturwa eshagama yaabo, we n'oruzaaro rwe ebiro byona; kwona Daudi n'oruzaaro rwe n'enju ye n'obugabe bwe biryagira obusingye oburikuruga ahari MUKAMA ebiro byona. 34Atyo Benaaya mwene Yehoyaada yaagarukayo, yaamuteera, yaamwita; baamuziika omu ka ye, ahu yaabaire atwire omu ihamba. 35#1 Bag 4:4; 1 Bus 29:22. Bwanyima omugabe yaata Benaaya mwene Yehoyaada omu mwanya gwe kuba omukuru w'eihe; kandi yaata Zadoki omunyamurwa omu mwanya gwa Abiasaari.
Sulemaani okuhoora Shimei enzigu
36Bwanyima omugabe yaatuma ahari Shimei, yaamugira ati: Oyeyombekyere enju Yerusaalemu, ogigumemu, kandi otarigirugamu kugira ahandi hoona ahu waaza. 37Ahakuba eizooba ri orirugayo okambuka akagyera Kidirooni, omanyire kimwe ku otaribura kufa, kandi eshagama yaawe niiwe eribaho. 38Shimei yaagarukamu omugabe ati: Ebi wangambira ni birungi; nyowe omwiru waawe niinyija kutwaza, nka Mukama wangye Omugabe oku wandagiira. Atyo Shimei yaamara ebiro bingi ari Yerusaalemu.
39Ku haahingwireho emyaka eshatu, abahuuku ba Shimei babiri baacwa, baaza owa Akishi mwene Maaka, omugabe wa Gaasi. Bwanyima bagambira Shimei bati: Abahuuku baawe bari Gaasi. 40Shimei yaimuka yaatandiika endogoya ye, yaaza Gaasi owa Akishi kusherura abahuuku be; atyo yaagyenda, yaabaiha Gaasi. 41Bwanyima Sulemaani ku yaagambiirwe ngu Shimei arugire Yerusaalemu, yaaza Gaasi, kandi yaagaruka, 42omugabe yaatuma ahari Shimei, yaamugira ati: Nkakurahiza MUKAMA, naakwehanangiririza kimwe ninkugira nti: Omanyire kimwe ngu, eizooba ri orirugayo, okagira ahandi hoona ahu waaza, oryafa? Naiwe wangarukamu oti: Ebi waagamba ni birungi; niinyikiriza kubyorobera. 43Mbwenu ahabw'enki torinzire ndahiro ei waarahiire ahari MUKAMA, n'ekiragiro eki naakwehanangiriize? 44Omugabe yaagaruka yaagira Shimei ati: Noomanya omu mutima gwawe ebibi byona ebi waakozire tata Daudi; n'ahabw'ekyo MUKAMA naija kukuhoora ahabw'obubi bwawe. 45#Enf 25:5. Kwonka omugabe Sulemaani aryaheebwa omugisha, kandi ekitebe ky'obugabe bwa Daudi kiryagumaho ebiro byona omu maisho ga MUKAMA. 46#1 Bag 2:12. Bwanyima omugabe yaaragiira Benaaya mwene Yehoyaada kumwita; yaashohora, yaamuteera, yaafa.
Butyo obugabe bwahamibwa omu mikono ya Sulemaani.
Currently Selected:
1 Abagabe 2: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
