1 Abagabe 12

Obugabe bwa Israeli okucuubwamu habiri

1 # 2 Bus 10:1-19. Bwanyima Rehoboamu yaaza Shekemu, ahakuba Abaisraeli boona niyo baabaire bagiire kumwemeka. 2#1 Bag 11:26, 40. Omu bunaku obwo Yeroboamu mwene Nebati akaba akiri Misri, ei yaabaire ahungiire omugabe Sulemaani. Ku yaakihuriire, yaarugayo. 3Baamutumaho ab'okumweta; atyo Yeroboamu n'omutwe gw'Abaisraeli boona baija, baagira Rehoboamu bati: 4#1 Sam 8:11-18. Sho akongyera oburemeezi aha kutegyekwa kwaitu. Mbwenu otutuubize aha mirimo erikurusya ei sho yaabaire naatukoresa, n'aha buremeezi bw'okutegyeka kwe, naitwe nitwija kukuheereza. 5Yaabagarukamu ati: Mbwenu mugarukyeyo, mumareyo kashatu; haza mugarukye. Batyo abantu baayaabuuka, baagyenda.

6Bwanyima omugabe Rehoboamu yaaza omu naama n'abagurusi abaabaire batabaarira Sulemaani ishe akiriho, yaabagira ati: Nimumpa bwengye ki okugarukamu abo bashaija? 7Baamugira bati: ku oraikirize kuba omuheereza w'eri ihanga eri izooba, waabaheereza, kandi waabagarukamu ebigambo ebirikubagwisa gye, obwo nibwo bariba abairu baawe ebiro byona. 8Kwonka we yaayanga enaama ei abo bagurusi baamuha, bwanyima yaaza omu naama n'abatsigazi abaanyeetsire nawe, kandi abaabaire nibamutabaarira. 9Yaababuuza ati: Nimumpa bwengye ki okugarukamu abo bantu abangizire ngu mbatuubize aha buremeezi bw'obutegyeki obu tata yaabataireho? 10Abo batsigazi abaanyeetsire nawe baamugira bati: Oku nikwo oraagarukyemu abantu abakushabire nibagira bati: Sho akongyera oburemeezi aha kutegyekwa kwaitu; mbwenu iwe otutuubizeho; obagire oti: Akakumu kangye akahera nikakira obuhango enyugunyu ya tata. 11Mbwenu nk'oku tata yaabeekoreize omugamba guremeire, nyowe niinyija kukizaho. Tata akaba abateeza enkoba, nyowe niinyija kubateeza #12:11 Skorupio n'akakooko akarikutoneza omukira. skorupio.

12Aha kiro kya kashatu Yeroboamu yaija n'abantu boona aha mugabe Rehoboamu, nk'oku yaabagizire ati: Mugarukye aha kiro kya kashatu. 13Omugabe yaabagarukamu n'amaani, naayanga obwengye obu abagurusi babaire bamuhaire; 14yaabagarukamu nk'obwengye bw'abatsigazi obu bamuhaire oku bubaire buri, ati: Tata akaba abeekoreza omugamba guremeire, kwonka nyowe niinyija kukizaho. Akaba abateeza enkoba, kwonka nyowe niinyija kubateeza skorupio.

15 # 1 Bag 11:11, 31. Atyo omugabe tiyaabahurira, ahabw'okuba kikaba kirugire ahari MUKAMA, ngu ahikiirize ekigambo eki yaagamiire Yeroboamu mwene Nebati, naakirabya omuri Ahiya owa Shiilo. 16#2 Sam 20:1. Abaisraeli boona ku baareebire omugabe yaayanga kubahurira, baamugira bati:

Twine kakwate ki na Daudi?

Titwine buhunguzi omuri mwene Yese.

Imwe Baisraeli 'mwe, nimugarukye omu mahema gaanyu!

Naimwe aba Daudi, mugume mwemarire ebyanyu n'oruganda rwanyu!

Batyo Abaisraeli baagaruka omu maka gaabo. 17#1 Bag 11:13, 36. Kwonka Rehoboamu yaagumizamu naategyeka Abaisraeli abaabaire batwire omu ndembo za Yuda. 18#1 Bag 4:6; 5:14. Bwanyima omugabe Rehoboamu yaatuma Adoramu owaabaire ari omukuru w'abakozi b'emirimo y'okuhatwa; Abaisraeli boona baamuteera amabaare, yaafa. Omugabe Rehoboamu ku yaabihuriire, ahonaaho yaaza omu kigaari kye kuhungira Yerusaalemu. 19#2 Bag 17:21. Okwo nikwo Abaisraeli baagomeire enju ya Daudi n'okuhitsya hati. 20#1 Bag 11:13, 32, 36. Kandi Abaisraeli boona ku baahuriire ngu Yeroboamu agarukire, baamutumaho ab'okumweta ngu aije omu ishengyero, bamwemekye kuba omugabe wa Israeli yoona. Tihaabaho n'omwe owaagaruka kukuratira enju ya Daudi, kureka oruganda rwa Yuda rwonka.

21 # 2 Bus 11:1-4. Rehoboamu ku yaahikire Yerusaalemu, yaateeranira hamwe enju ya Yuda yoona n'oruganda rwa Benyamiini, n'abashaija emanzi abatoorainwe akasiriira n'obukumi munaana ab'okurwanisa enju ya Israeli, ngu bagarurire Rehoboamu mwene Sulemaani obugabe. 22#2 Bus 12:5, 7, 15. Kwonka ekigambo kya Ruhanga kyaija ahari Shemaaya, omushaija wa Ruhanga, nikigira kiti: 23Gambira Rehoboamu mwene Sulemaani omugabe wa Yuda kandi n'abantu boona ab'enju ya Yuda n'eya Benyamiini, n'abandi boona, oti: 24Oku nikwo MUKAMA arikugamba naagira ati: Mutahurura, n'obu kwakuba okurwanisa beene waanyu Abaisraeli. Buri muntu agarukye omu ka ye, ahakuba ekintu eki niinye kirugireho. Batyo baahurira ekigambo kya MUKAMA, baagaruka omuka, nk'ekigambo kya MUKAMA oku kyabaire kiri.

Ekibi kya Yeroboamu

25 # Bar 8:17; 9:45. Bwanyima Yeroboamu yaayombeka Shekemu omu nsi y'ebibungo bya Efuraimu, yaatuurayo; ku haahingwireho ebiro, yaafurukayo, yaazingura Penueli. 26Bwanyima Yeroboamu yaagira omu mutima gwe ati: Nimmanya ngu hati obugabe nibwija kugaruka omu nju ya Daudi; 27#Bir 12:5, 6. abantu aba ku baraagume nibainamuka Yerusaalemu kutambirayo ebitambo omu nju ya MUKAMA, emitima yaabo eryagarukira mukama waabo, Rehoboamu omugabe wa Yuda. 28#Kur 32:4, 8; 1 Bag 14:9; 2 Bag 10:29; 17:16; 2 Bus 11:15; 13:8; Hos 8:5, 6; 10:5; 13:2. Atyo omugabe yaagira enaama y'okukora ebishushani bibiri by'enyana omu zaabu. Yaagira abantu ati: Nikiija kubarusya okuguma nimwinamuka Yerusaalemu. Imwe Baisraeli 'mwe, nimureebe baaruhanga baanyu abaabaihire omu nsi ya Misri. 29Ekimwe yaakita omuri Beseeli n'ekindi yaakita Daani. 30#1 Bag 13:34; 2 Bag 17:21. Ekyo eki yaakozire kyaba ekibi; ahakuba abantu bakaba baza kuramya eky'omuri Beseeli, n'ekindi bakishanga omuri Daani. 31#1 Bag 13:32, 33; 2 Bag 17:32; 2 Bus 11:14, 15; 13:9. Kandi yaayombeka amaju omu myanya mikiru y'okuramizamu, yaagaruka yaataho abanyamurwa naabaiha omu bandi bantu, abatari by'omu Baleevi. 32#Lev 23:33, 34; Kub 29:12; 1 Bag 13:2; Amo 7:13. Aha kiro kya ikumi na bitaano omu kwezi kwa munaana Yeroboamu yaataho obugyenyi, nk'obw'omuri Yuda; yaatambira ebitambo aha itambiro; kandi yaagira atyo n'omuri Beseeli, naatambira enyana ezi yaakozire ebitambo. Bwanyima yaata abanyamurwa omu myanya egyo emikuru ei yaakozire kuramizamu. 33#1 Bag 13:1. Yainamuka aha itambiro eri yaabaire akozire omuri Beseeli aha kiro kya ikumi na bitaano omu kwezi kwa munaana, omu kwezi oku yaayeteereireho; yaaragiira ku habaho obugyenyi ahabw'Abaisraeli, kandi yainamuka aha itambiro kwotera obubaane.

Currently Selected:

1 Abagabe 12: RR64

Highlight

Copy

Compare