ARoma 6

Okala ni egumi mwa Kirixtu

1Vano niwoge ddi? Nikalegeve mudhoothegani wi owoma murima wa Mulugu weenjedhedheyegeve? 2Eehi, nivang'onong'ono! Hiyo nikwile wa yoothega, nikalegeve mudhoothegani? 3Kamunonile wi hiyo aatene nibathiziwe mwa Yesu Kirixtu, nili muumohini ni oliye mwa okwa waaye? 4Vowi nihikwa, nihilogohiwa ni oliye mwa obathiziwa weehu wi mwa mukalelo mmohive wavenyihiwe Kirixtu muukwani ni nthithimiho na Ababe teto hiyo needdege mwiigumini exa.

5Ndala akala nili muumohini ni Kirixtu mwa okwa waaye, ebaribareene nnokala muumohini ni oliye va ovenyihiwa muukwani. 6Nihinona wi omuthu weehu wawale ohukomeliwa vamuraddini vamohi ni Kirixtu wi omuthu weehu woothega ohukalena owodha wa hiyo wi nihiwelele okala adhaari a dhoothega. 7Vowi muthu okwile ohutapuliwa mwa owodha wa yoothega. 8Vano akala nnokwa vamohi ni Kirixtu, nnororomela wi nnoodha nikale teto ni egumi vamohi ni oliye. 9Nihinona wi Kirixtu ahivenyihiwa muukwani, ndo kadha akwa dila biili. Okwa kunamulamula oliye. 10Owoga dha okwa waaye okwele wi amarihe kuluwi olamula wa yoothega. Vano owoga dha egumi yinniiyena dhiinova, onakala wa Mulugu. 11Emodha-modhave nyoovo mwiyiire ookwa mwa olamula wa yoothega teto mwiyiire agumi wa Mulugu, muumohini ni Yesu Kirixtu.

12Mwaha wa ela kamurumeedhe yoothega elamulaga mwiili dheenyu dhili dhookwa wi mwiiwelelege dhikwaminigwa dhiwa. 13Kamveleele yaano dha mwiili dheenyu wona yeela dha dhohogoowa, dhowiirana yoothega. Moohiyaniha, mwiiveleele wa Mulugu wona athu evenyihiwe muukwani, dhiinova eli agumi. Vano mveleele yaano dheenyu wa oliye wona yeela dha dhowogoowa. 14Vowi yoothega kidha yuulamulagani, mwaha wi kamuneewelela Malamulo, mbwenye muli ookuneeliwa ni thagaraga dha Mulugu.

Yoolivela ya yoothega fuukwa

15Ki vano? Nithegegeve vowi kanili vati va Malamulo, mbwenye nili vati va owoma murima wa Mulugu? Eehi, nivang'onong'ono! 16Muhunona wi mweeveleela wa muthu wi mmwiiwelelege wona adhaari, munakala adhaari a muthu oyo: Adhaari a yoothega enoothukuleleni okwa, naari adhaari a owiiwelela onoothukuleleni okala owogoowa. 17Ginomutthettheela Mulugu mwaha wi wale nyo mwaali adhaari a yoothega, mbwenye dhiinova, muneewelela ni murima waatene dhosuuziha dhedho dhaakeliliinyu. 18Muhutapuliwa mwa yoothega, dhiinova muli adhaari a dhowogoowa. 19Ginowuwaaddelani wona athu mwaha wi dhili dhoorusa nyo wiiwelelamo. Wale mwahiveleela yaano dha mwiili dheenyu wona adhaari a dhootakala, dhohogoowa dhinabala dhohogoowa dhimohi. Dhiinova mveleele yaano dheenyu wi mukale adhaari a dhowogoowa dhinoothukuleleni weela mirima.

20Vowi mwaaliinyu adhaari a yoothega, mwaali ootapuwa wiing'aneliwa ni wogoowa. 21Ki vano mpurilevo ddi vowiirana dhego dhinookalihani manyazo dhiinova? Vowi ndo, omamalelo wiwa fuukwa. 22Mbwenye dhiinova muhutapuliwa mwa yoothega, muli adhaari a Mulugu. Vano yoopura yeenyu fuweelihiwa, omamalelo wiwa munokalana egumi yoohumala. 23Vowi yoolivela ya yoothega fuukwa. Mbwenye mvahi wa mahala Mulugu onavahiiye si egumi yoohumala muumohini ni Yesu Kirixtu Nabwiya eehu.

Currently Selected:

ARoma 6: tke

Highlight

Copy