ARoma 3

1Ki vano aZhudewu enaakwaranya athu a malogo mamohi addi? Naari vowiineliwa vili mpurelo baani? 2Vihikala mpurelo dhijinji ebaribareene okala muZhudewu. Vowambeela, yahiroromelihiwa madhu a Mulugu.#3.2 Moone Deteronomiyo 4.7-8.

3Ki akala amohi mwa aliwa yaali oohuroromeleya, ohuroromeleya weewa onomaliha ororomeleya wa Mulugu? 4Nivang'onong'ono! Mbwenye sowi athu enone wi Mulugu da ebaribari, naari athu aatene egali ooratha. Dhili wona Maleba munawogeliiwa, yiiraga:

<<Nyo Mulugu, munowooneyihiwa

wi muli owogoowa mmadhuni mweenyu,

mwaathongiwaga, munogonjiha>>. # 3.4 Masaalimu 51.4.

5Vowi athu amohi enokoha, yiiraga: <<Akala dhohogoowa dheehu dhinowooniha dhowogoowa dha Mulugu, oliye kahuwo oohogoowa vinanilagiiye?>> 6Nivang'onong'ono! Mulugu ahaakale oohogoowa, aande waathonga athu a elabo ela addi? 7Mbwenye mmohi onowoga: <<Ki oratha waaga ogooneyihile voweela wi Mulugu da ebaribari, weenjedhedha vanthithimiho naaye, naari ngalive namathega onaagithongele ddi?>> 8Mwa mukalelo mmohive athu amohi enoninyemula yiiraga hiyo nnosuuziha, niiraga: <<Niiregena dhootakala wi opama odhe>>. Othongiwa weewa foofwaneelela.

Kalivo muthu owogoowa

9Ki vano, niirege avi? Hiyo aZhudewu nnowaakwaranya athu a malogo mamohi mmoobuweloni a Mulugu? Nivang'onong'ono! Ginowogesa wi athu aatene, aZhudewu vamohi ni aGerego enolamuliwa ni owodha wa yoothega. 10Wona mulebeliwiiwa, yiiraga:

<<Kalivo muthu owogoowa,

ebaribareene naariwene mmohi.

11 Kalivo muthu atthottho,

kalivo muthu onasayela omunona Mulugu.

12 Aatene ehiholowa,

vamohi ehiyeleela thima yeewa,

kalivo oneerana dhapama,

ebaribareene naariwene mmohi>>. # 3.10-12 Masaalimu 14.1-3; 53.1-3.

13 <<Vamelo veewa masiye oohuvuheleliwa,

ni malumi eewa enonyengetha,

ndibwi na mare a evili nili mmilomoni mweewa>>. # 3.13 Masaalimu 5.9; 140.3.

14 <<Muwano mweewa muhudhaala dhoodduba,

muhudhaala madhu oowaawa>>. #3.14 Masaalimu 10.7.

15 <<Manyalo eewa enothamagela

oporosa ni waapa athu.

16 Onoonga ni orabuliha dhili mundila mwiwa,

17 dila ya murenddele kinonile>>. # 3.17 Ezaya 59.7-8.

18 <<Meento eewa kinooneyiha

omoova Mulugu>>. #3.18 Masaalimu 36.1.

19Vano nihinona wi dhaatedhene dhedho Malamulo dhinawogiiwa, dhinaakalela ale enalamuliwa ni Malamulo ayo. Malamulo enowoga dhego dhedhi wi yaamaalihe athu aatene vano aliwa ethongiwe ni Mulugu. 20Vowi kalivo muthu Mulugu onamwiiriiye owogoowa mwaha wa ohariha Malamulo. Vowi Malamulo enooniha dhoothega dheehu baahi.

Mwemo Mulugu munawiireliiye athu owogoowa

21Mbwenye dhiinova ohooneyihiwa wa athu wogoowa wa Mulugu ohunaakeliwa moohara Malamulo aaye. Wogoowa wula Malamulo ni anamavuhuleleene enowiirela onamoona, 22wogoowa wula onaakeliwa mwa nroromelo mwa Yesu Kirixtu wa ale enamuroromela. Kavili ohiyana vaari va athu, eehi, 23vowi aatene ehithega, kinafiyedha nthithimiho na Mulugu. 24Mbwenye mwa mahala aaye, Mulugu onowawiira owogoowa veebewenivene odheela woobola oli mwa Yesu Kirixtu, 25ole Mulugu omveleeliiye wona mukutho wookurumula owali waaye mwaha wa hiyo, odheela mwazi wa Yesu Kirixtu, onaakeliwa odheela mwa nroromelo. Mulugu ohiirana dhedho wi oonihe wogoowa waaye. Vowi wale mwa okurumuwela waaye ahihiya ovira dhoothega dha mundduli. 26Mbwenye mudhidhi ola onowooniha wogoowa waaye mwa mukutho ola wookurumula wi Mulugu akale owogoowa, akale ole onawiira owogoowa aatene enamuroromela Yesu Kirixtu.

27Ki vano vevo muthu agayege? Eehi, kagayewene. Mwaha wa ddi? Mwaha woohaakwaniha ohara ni wiiwelela nlamulo? Naari, kanigayege vowi naakelile wogoowa mwa nroromelo. 28Vowi nnowoona wi muthu onowiiriwa owogoowa ni Mulugu voororomela, moolapelana ni Malamulo. 29Sowi Mulugu di Mulugu a aZhudewu baahi? Oliye teto kahuwo Mulugu a athu a malogo mamohi? Ee teto di Mulugu a malogo mamohi, 30vowi oliwo Mulugu mmohi baahi, Mulugu mmohive oyo odheela mwa nroromelo baahi, onowawiira owogoowa athu aabiileene owiineliwa naari oohiineliwa. 31Sowi naharaga nroromelo nnakoodda Malamulo a Mulugu? Nivang'onong'ono! Moohiyaniha, nnalibiha Malamulo.

Currently Selected:

ARoma 3: tke

Highlight

Copy