ARoma 2

Mulugu onoodha aathonge athu aatene

1Vano we onaathonga amohi kwinna voothawela. Wamuthongaga mukwaawo wiiragana dhimohive dhedho dhineeriiye, oneekona weeka. 2Nihinona wi othonga wa Mulugu wa athu ale eneerana dhego ndo fooligana ni ebaribari. 3Ki vano, we mukwaaga, onaathonga amohi eneerana dhootakala, we teto wiiragana dhimohive, onoobuwela wi onoodha othawe othonga wa Mulugu? 4Sowi we onavevusa owoma murima vajinji wa Mulugu, ohuthonga waaye, ovilela waaye? Kunadidela wi owoma murima wa Mulugu funoothukulela omatthwaruwelo?

5Mwaha wi oli a murima wovaadda, woohufuna otthwaruwa, ohiyuugelela owali va nlabo na owali wa Mulugu, wadha wooneyihiwaga othonga waaye wowogoowa. 6Mulugu onoodha amwaakelihe kadda muthu mooligana ni dhowiira dha muthu oyo.#2.6 Moone Masaalimu 62.12; Poroveribiyo 24.12. 7Wa ale enavilela mowiirana opama, enosayela nthithimiho, nriiho ni egumi yoohuvudda, Mulugu onoodha aavahe egumi yoohumala. 8Mbwenye wa ale ehineewelela ebaribari, eneewelela dhohogoowa, oliye onoodha ooneyihe owali ni waanyanyuwela owiithukulela. 9Onoodha okale goyi ni dhookathamiha wa aatene eneerana dhootakala, vowambeela aZhudewu, vooharela aGerego. 10Mbwenye onoodha okale nthithimiho, nriiho ni murenddele wa aatene eneerana dhapama, vowambeela aZhudewu, vooharela aGerego. 11Vowi Mulugu kanna nsakulo.

12Vowi muthu oli aatene onathega moohunona Malamulo a Mulugu teto ahinonile Malamulo onoodha atolosiwe. Teto aatene ayene enathega eganonile Malamulo, moohariha Malamulo ayo enoodha ethongiwe. 13Vowi owogoowa vameentoni va Mulugu kahuwo oyene oneewa Malamulo baahi, mbwenye duule oneerana dhinawogiwa mMalamuloni dineeriwa owogoowa. 14Vowi athu ayene ehili aZhudewu ehinna Malamulo, vano aliwa yeeragana weekiiwa dhedho dhinawoga Malamulo enowooniha wi ehikanna malamulo mamohi mmirimani mweewa, naari ehinna Malamulo a Mozezi. 15Dhowiira dheewa dhinowooniha wi dhinawoga Malamulo dhihilebiwa mmirimani mweewa. Moobuwelelo eewa teto enowiirela onamoona wi pumwemo, mwaha wi moobuwelelo a mmirimani mweewa mudhidhi mmohi enowaasumela, mudhidhi mmohiwa enowawaakihedha. 16Ndo dhineere opadduwa va nlabo nddo Mulugu vineeriiye athonge, odheela mwa Yesu Kirixtu, dhowiipiteya dha athu mooligana ni Muselu Wapama onalaleyiimi.

AZhudewu ni Malamulo

17Vano we oni: <<Gili muZhudewu>>, onanyinddela Malamulo teto onomugayela Mulugu aawo. 18We ohunona Mulugu dhinafuniiye, onothettheela eli yapama mwaha wi ohusuuzihiwa Malamulo. 19Onororomela wi oli musogoleli a athu oohoona, panti yowaamoneya athu eli muyiihini, 20namalaga a athu oolodhowa teto namasuuziha a ahima. Onowuubuwelela wi mMalamuloni futaganele tthottho dhaatedhene ni ebaribari yaatene. 21Vano we onaasuuziha amohi, mwaha kuneesuuziha weeka? We onalaleya, wiiraga: <<Kamwiiyege>>, ki we oneeyela ddi? 22We onawoga wi: <<Kamuraruwege>>, ki we onararuwela ddi? We onatakaleliwa ni amilugu oosemiwa, ki we oneeyela ddi dha moweebedha mweewa? 23We onagayela Malamulo, ki onamunyemulela ddi Mulugu ohiiwelelaga Malamulo ayo? 24Eli wona munawogela Maleba, yiiraga: <<Athu oode enomunyemula Mulugu mwaha wa nyo aZhudewu>>.#2.24 Ezaya 52.5; Ezekiyeli 36.20.

25Wiineliwa waawo foopuriha akala onohariha Malamulo. Mbwenye akala kunahariha Malamulo ayo wiineliwa waawo kwinna thima, ohusadduwa oluku. 26Ki akala muluku onohara dhinawoga Malamulo, muthu oyo kadha eeriwa wona owiineliwa? 27We wiineliwe winna Malamulo oolebiwa, vano onowaaviriganiha. Ole ohugwaddiwe mmwiilini mwaaye aharihaga Malamulo dinaadhe ookone we oli owiineliwa.

28Vowi kahuwo muZhudewu oneyooneyiha mmwiilini mwaaye, naari wiineliwa wa ebaribari kuneeriwana ode wa mwiili. 29MuZhudewu a ebaribari di oyene oli muZhudewu mmurimani mwaaye wiineliwa wa ebaribari bwa mmurimani, oneeriwana ni Muneba Woweela, ohuli ni Malamulo oolebiwa, eehi. Athu kinamutamaalela muthu owindo, onamutamaalela di Mulugu.

Currently Selected:

ARoma 2: tke

Highlight

Copy