ARoma 15

Mwaahagalalihege akwiinyu

1Hiyo ninna nroromelo nakopolo nivilelegena dhoolodhowa dha ale eli oolodhowa, nihiihagalalihege weekiihu. 2Kadda muthu vaari va hiyo amuhagalalihege mukwaaye mwa opama waaye wi amulibihe munroromeloni. 3Naari Kirixtu keehagalalihe va yeeka, mbwenye wona Maleba munawogeliiwa, yiiraga: <<Dhooruwana dha ale yooruwana dhihimorela wa miyo>>.#15.3 Masaalimu 69.9. 4Dhaatedhene dhilebiwe wale dhalebiwe wi dhinisuuzihe wi nikanne ejejihedho. Ojejihedha wo onadha moovilela ni olibihiwa Maleba Ootaleleya onanivahiiwa. 5Mulugu onaavaha ovilela ni oliba murima oovaheni wiiwanana mmohi ni mukwaaye, moohariha meeddelo a Yesu Kirixtu, 6wi ni murima mmohi, mwaatene muumohini mmuthithimihege Mulugu, Baabi a Nabwiya eehu Yesu Kirixtu. 7Mowindo mwaakelanege mmohi ni mukwaaye wona Kirixtu mowaakeleliiyeni wi Mulugu athithimihiwege.

Kirixtu waadheele athu aatene

8Miyo ginowuwaaddelani wi Kirixtu ahisadduwa okala mwiimeleli a aZhudewu wi oonihe dhowi Mulugu doororomeleya wa dhoororomeliha dheeriliiye wa makolo eewa awale, 9teto wi ayene ehili aZhudewu emuthithimihege Mulugu mwaha wa thagaraga dhaaye. Wona mulebeliwiiwa Maleba Ootaleleya, yiiraga:

<<Ndala ginoodha guutamaaleni vaari va ale ehili aZhudewu,

ginoodha giibe jibo dhootamaalela, ndina neenyu>>. # 15.9 Samuweli a Nabiili 22.50; Masaalimu 18.49.

10Teto yiire:

<<Nyo, muhuli aZhudewu,

agalalani vamohi ni nlogo na Mulugu>>. # 15.10 Deteronomiyo 32.43.

11Teto yiire:

<<Nyo mwaatene muhuli aZhudewu,

mmutamaalele Nabwiya,

athu a malogo maatene emweebedhe>>. # 15.11 Masaalimu 117.1.

12Teto namavuhulela Ezaya wiire:

<<Mmohi mwa anamabaliwelamo a Zhesi onoodha,

oyene onaavenye wi aalamulele ale ehili aZhudewu.

Aliwa eneere ohela ejejihedho va oliye>>. # 15.12 Ezaya 11.10.

13Mulugu onanivaha ejejihedho adhaalihe mmirimani mweenyu ohagalala ni murenddele muwari mwa nroromelo neenyu ni oliye wi ojejihedha weenyu wunnuwegeve ni owodha wa Muneba Woweela.

Kaarata ni mabasa a Pawulo

14Addibilaga, arogoraga, miyo gamwiinya kaginaanganyedha wi nyoovo teto muli athu oodhaaliwa owoma murima, muli athu oodhaaliwa ononelamo teto owaanda osuuzihana mmohi ni mukwaaye. 15Mbwenye kaarata ela guulebeleni moohoova wi guwuubusedheni dhego dhimohi dhinoniliinyu. Guhuulebelani moohoova mwaha wa mahala ookala murumiwi Mulugu ogivahiliiye, 16wi gikale mwiimeleli a Yesu Kirixtu ni wa athu ehili aZhudewu. Ahigisakula wi gisuuzihege Muselu Wapama wa Mulugu wi athu ayo ekale wona mikutho dhoomudhivela oliye, dhooweelihiwa ni Muneba Woweela. 17Mowindo ginowiithukula mwaha wa nde dhinamwiireliimi Mulugu odheela mwa Yesu Kirixtu. 18Kaginaliba murima owoga dha yego emohi, eehi, dhihili nde dhandiliimi odheela mwa Kirixtu wi gaakamihedhe ale ehili aZhudewu omwiiwelela Mulugu. Gihaanda nda odheela dhiwogiliimi, dhiiriliimi, 19odheela dhitoonyihedho ni dhootikiniha dha kopolo dhowiireya ni kopolo dha Muneba Woweela. Mowindo gihilaleya dhipaddi dhaatedhene, Muselu Wapama onawoga dha Kirixtu wambeela oZheruzalemi ni elabo yowaapeelela ofiyedha oIliriko. 20Dhoofuna dhaaga soolaleya Muselu Wapama mumburoni muhuneewiwe ewogaga dha Kirixtu wi gihimage vamatibelelo yambeeliwe ni muthu mmohi. 21Wona mulebeliwiiwa Maleba Ootaleleya, yiiraga:

<<Athu ayene yahaaddeliwe dha oliye, enoodha yoone,

ayene yaheewile dha oliye, enoodha yiiwelelemo>>. # 15.21 Ezaya 52.15.

Pawulo onoobuwela odhowa oRoma

22Mwaha wa dhoofuna dhaaga nde kagaandile ofiya wa nyo. 23Mbwenye vano kaginna mburo woolaleya epaddi ya wuno teto wambeela wale goorabulela odha wa nyo, 24mowindala ginajejihedha odha wuwoonani mudhidhi onaavirigiimi gaadhowaga oXipaanya. Ginoodha gihagalale wuwaaredhelani malabo mangaasi. Vooharela ginafuna mugikamihedhe wi giwelele olenddo waaga. 25Mbwenye dhiinova ginadhowa oZheruzalemi gapeleke nikamihedho na aKirixtu a wewo. 26Vowi gerezha dha oMasedoniya ni dha oAkaya dhahihagalala oveleela dhowaakamihedhana athu oorabula a Mulugu a oZheruzalemi. 27Yahihagalala wiirana ndo, ee, yaali mangawa eewa waakamihedha aliwa. Vowi aZhudewu yahaagawana mareeliho a Mulugu ni aliwa, ndo aliwa yahifwaneelela wawiimelela ni ogawana dhookalana dheewa ni aZhudewu. 28Vano ngamarihile dhooveleela ndo gipelekela pamadhene oZheruzalemi, ginoodha givirele owaninyuwo gaadhowaga oXipaanya. 29Gihinona wi gadha wewo, ginadha gigadhaaliwe ni mareeliho a Kirixtu.

30Amudhaaga, ginowuulobani odheela mwa Nabwiya eehu Yesu Kirixtu teto odheela odhivela wewo Muneba Woweela onanivahiiye wi mwiiwanane ni miyo mulibihedhaga ogilobelela vameentoni va Mulugu. 31Mugilobelelege wi gihimorele mmadani mwa athu oohuroromela a oZhudeya. Mulobele wi athu a Mulugu a oZheruzalemi yaakele ni madada meenddi dhooveleela dhinaapelekiimi. 32Dheereya ndo, ginoodha gifiye ni ohagalala owaninyu wo odheela ofuna wa Mulugu, ginoodha givume ni nyo. 33Mulugu onavaha murenddele akale ni nyo mwaatene. Ameni.

Currently Selected:

ARoma 15: tke

Highlight

Copy