ARoma 16

Malojelo oogomihedha

1Ginomveleela mmadani mweenyu, murogora eehu Febe, oyene oli mwiimeleli a gerezha ya oSenkereya. 2Mwaakeleni mu ndina na Nabwiya wona athu a Mulugu munafwaneeleliiwa. Mmukamihedhe wona murabuleliiye nikamihedho neenyu. Vowi ahaakamihedha athu ajinji teto nimiyeene.

3Mmulojele Pirisila ni Akwila, anamalaba akwaaga mwa Yesu Kirixtu. 4Ala yahiveleela makohi eewa mowoopiha wi evulumuse egumi yaaga. Ndo ginowaatthettheela, kahuwo miyeeneve meenka ginaatthettheela, mbwenye teto gerezha dhaatedhene dha ale ehili aZhudewu. 5Mulojele teto gerezha enatugumana mba mweewa.

Mmulojele oodhivela aaga, Epeneto, oli yoovaha yowambeela ya Kirixtu oAziya. 6Mmulojele Mariya, oyene ohiddile mabasa moolibihedha wa nyo. 7Mwaalojele Adoroniku ni Zhuniya, aZhudewu wona miyo, yaali mukaambura ni miyo. Aliwa boovuwa vaari va arumiwi, bambeele okala mwa Kirixtu, miyo gihinakale.

8Mmulojele Ampiliyato, oodhivela aaga mwa Nabwiya. 9Mmulojele Urubanu, namalaba mukwiihu va mabasa a Kirixtu teto wa Extaki, oyene onamudhiveliimi. 10Mmulojele Apele, oorumeedhiwa mwa Kirixtu. Mwaalojele a murala wa Arixtobulu. 11Mmulojele Heroddiyawu, muZhudewu wona miyo. Mwaalojele aKirixtu eli vamuralani va Narisizu.

12Mwaalojele Tirifena ni Tirifosa, ayene enahidda mabasa a Nabwiya. Mmulojele Periside, oodhivela ole ahiddile mabasa vajinji a Nabwiya. 13Mmulojele Rufu, osakuleliwe Nabwiya teto mma aaye oyene oli wona mma aaga. 14Mwaalojele Asinkiritu, Felegonte, Hereme, Patoroba, Herima ni aKirixtu eli ni aliwa. 15Mwaalojele Filologu, Zhuliya, Nerewu ni murogoriye ni Olimpa ni oweela mirima aatene eli ni aliwa. 16Mulojelane mmohi ni mukwaaye ni bezhu ya odhivelana wa eKirixtu. Gerezha dhaatedhene dha Kirixtu dha wuno dhinowuulojelani.

Magano oomariha

17Addibilaga, arogoraga, ginowuukokomezani mwiyiing'anele ni athu enatatamula ogawanyeya ebarelaga masuuziho musuuziliinyu. Athu ayo mwaarabelege, 18vowi athu owindo kinamwiimelela Kirixtu, Nabwiya eehu, mbwenye eneemelela dhigulu dheewa baahi. Ni madhu ooriya ni ootamaala enonyengetha mirima dha athu oohunonelamo. 19Athu aatene yahiiwa dhowiiwelela weenyu, mowindo miyo ginohagalala mwaha wa nyo. Vano ginafuna wi mukale oononelamo dhili dhapama ni ohukanna muladdo mwa dhego dhootakala. 20Dhiinoveva Mulugu onavaha murenddele onoodha ambwanyule Sathana vati va manyalo eenyu.

Nabwiya eehu Yesu Kirixtu oovaheni mahala.

21Timoteyo onalaba ni miyo wuno, onowuulojelani. Teto Lusiyu, Zhasoni ni Sosipatere, aZhudewu wona miyo, enowuulojelani. 22Miyo Teresiyu, namaleba a kaarata ya Pawulo ela, ginowuulojelani mwa Nabwiya. 23Gayu onowuulojelani, oliye dinagikameela teto onokameela gerezha yaatene eli vaade vaaye. Eraaxtu, namalogolela a dhooreela dha nluwa, teto Kwaarutu, ddibilihu, enowuulojelani.

24[Nabwiya eehu Yesu Kirixtu oovaheni mahala mwaatene. Ameni.]#16.24 Madhu ala kinafwanyeya mmaniivuruni awale.

Mulugu athithimihiwe

25Nimuthithimihege Mulugu! Oliye onowaanda onilibiha odheela Muselu Wapama onalaleyiimi, ole onawoga dha Yesu Kirixtu. Muselu ola si ebaribari yaali yawipiini wale-wale. 26Mbwenye dhiinova ebaribari ela ehivuhuleliwa odheela dhalebile anamavuhulela teto mwa olamula wa Mulugu amukala-kala, dhihifiyedha ononiwa ni athu aatene ehili aZhudewu wi eroromelege yiiwelelege.

27Mulugu yeeka oli atthottho akale oothithimihiwa mwa Yesu Kirixtu okala ni okala! Ameni.

Currently Selected:

ARoma 16: tke

Highlight

Copy