ARoma 14

Kammukone muthu

1Mwaakeleni pama muthu winna nroromelo noolodhowa, ehili ni efunelo yowi mukooddege moobuwelelo aaye. 2Mmohi onaroromela wi yooja eli yaatene soojiwa. Mbwenye mmohi winna nroromelo noolodhowa, onaja dhoohukalana mwazi baahi. 3Oyene onaja dhaatedhene kamvevuse ole ohunaja. Ole ohunaja dhaatedhene kamukone ole onaja, vowi Mulugu ohumwaakela. 4Ki we oli aani wi omukone mwiimeleli a mwiinya? Nabwiya aaye yeeka difwaneele omuthonga akala oliye ohiiwelela naari keewelele va mabasa aaye. Ee, onoodha eewelele, vowi Nabwiya eehu onowaanda omulibiha.

5Mmohi onoobuwela wi nlabo nangana thookwaranya malabo mamohiiwa, mbwenye mmohi onoobuwela wi malabo maatene enooligana. Kadda muthu aharege ebaribari eli mmurimani mwaaye. 6Oyene onalogolela nlabo nangana, oneera ndo wi amuriihe Nabwiya. Ole onaja eli yaatene, oneera ndo wi amuriihe Nabwiya, vowi onamutthettheela Mulugu mwaha wa yooja eyo. Ole ohunaja dhaatedhene teto oneera wi amuriihe Nabwiya, oliye onamutthettheela Mulugu. 7Mwaha wi kavili naari mmohi mwa hiyo oyene onakala ni egumi mwaha wa oliye yeeka, naari okwa wa oliye yeeka. 8Nakala agumi, nnamukalelawo Nabwiya; nakwa, nnakwa mwa Nabwiya. Ndala, naari nikale agumi naari nikwe, nili a Nabwiya. 9Kirixtu ahikwa, ovenyihiwa muukwani wi akale Nabwiya a athu ookwa ni ookalawo.

10Ki vano we, onamukonela ddi mmudhi aawo mwa Kirixtu? Naari we, onamunyemulela ddi mmudhi aawo? Vowi hiyo aatene nnoodha nikale vameentoni va Mulugu wi nithongiwe. 11Dhihilebiwa mMalebani Ootaleleya, yiiraga:

<<Nabwiya wiire: <Ginowiilibela miyeenene,

makuta a athu aatene, enoodha ekokore vameentoni vaaga,

milomo dhaatedhene, dhinoodha dhisorihege wi gili Mulugu> >>. # 14.11 Ezaya 45.23; 49.18.

12Mowindo kadda muthu vaari va hiyo onoodha aakulelege yeeka wa Mulugu dhaatedhene dheeriliiye.

Kumuthegihe mmudhi aawo muKirixtu

13Mowindo ndoweni nihiyeni okonana mmohi ni mukwaaye. Moohiyaniha, kadda muthu alibelele ohiirana yego yowaakwakwathusana aKirixtu amohi, naari waaholosa. 14Ngali mwa Nabwiya Yesu, miyo gihinona gihaanganyedhaga wi kavili yooja enamutakaliha muthu aja. Mbwenye akala mmohi onoobuwela wi enomutakaliha, ee, wa oliye enomutakaliha. 15Akala mmudhi aawo onokukumuwa mwaha wa eyene enajiiwe, enatapulela wi vano kuneedda moodhivela. Kumunoonge ni yooja yaawo, muthu oyene Kirixtu omukweliiye. 16Kamurumeedhege wi athu amohi yeelengelege wi sootakala dhego dhedho dhinooniinyu wi sapama. 17Mu Omwene wa Mulugu yuulubale kahuwo yooja naari dhoong'wa, yuulubale fuwogoowa, murenddele ni ohagalala dhinadheela mwa Muneba Woweela. 18Mwa mukalelo olena kadda muthu onamwiimelela Kirixtu onomuhagalaliha Mulugu teto onakala oorumeedheya wa athu.

19Mowindo nisayelege dhego dhinadhiiha murenddele ni dhego dhinanikamihedha onilibiha mmohi ni mukwaaye. 20Kunoonge mabasa a Mulugu mwaha wa yooja. Yooja yaatene soorumeedhihiwa mbwenye enakala yoothega oja yego enaakwakwathusa akwiihu. 21Sapama ohuja nyama, ohumung'wa vinyu, naari wiirana yego eli yaatene enamukwakwathusa mmudhi aawo. 22Dhedho dhinaroromeliiwe dhikale vaari va we ni Mulugu baahi. Dooreelihiwa oyene murima waaye ohunamukona mwaha wa dhedho dhinarumeedhiiye. 23Mbwenye muthu onaja aanganyedhaga ohuthega, vowi dhedho dhineeriiye sohiiwanana ni dhedho oliye dhinaroromeliiye. Vowi eli yaatene eyene muthu eneeriiye yoorunihana ni dhedho oliye dhinaroromeliiye, yoothega.

Currently Selected:

ARoma 14: tke

Highlight

Copy