Maruku 5

Yesu onomuyiliha muthu oohiddiwa ni muneba wootakala

(Matewuzhi 8.28-34; Luka 8.26-39)

1Yesu ni anamasuuza aaye yahifiyaga okobela ya Nyaza ya oGalileya, elabo ya oZherasa. 2Yesu akitagawene mmwanddeyani, ahithamageliwaga muthu mmohi ahiddiwe ni muneba wootakala akalesa omasiye. 3Muthu ole akalesa munsiyeni,#5.3 Masiye a mudhidhi olene yakala wona nikungu. vano kalivo aakwaniha ommaga, naari ni fingwi. 4Athu yooxixa dila dhijinjidhene ommaga meddo ni kurenti teto yommaga mada ni fingwi, mbwenye oliye oopadha fingwidha, kurentina nommagana meddo noopadheya. Kalivo aakwanihile omugonjiha. 5Mutana ni mahiyu akalesa omasiye wewo ni mmwaangoni, okuwaga eevoreyaga ni mabwe.

6Vevale oliye ahimoonaga Yesu woolapelawene, ahimuthamagelaga, okokora vameentoni vaaye. 7Okuwa ni ndhu nootaama, wiira: <<Munafuna ddi ni miyo, Yesu, Mwaana a Mulugu Akopolo Ookwaranya Dhaatedhene? Mu ndina na Mulugu ginowuulobani, kamugoonihe goyi>>. 8Oliye awogelaga ndo vowi Yesu ahiwogaga dhowi: <<Muneba wootakala we, kuma mwa muthu ola!>> 9Vano Yesu ahimukohaga, wiira: <<Ndina naawo oli aani?>> Oliye ahaakulaga, wiira: <<Ndina naaga gili <Anamwinji>#5.9 Anamwinji Mu ewogelo ya eGerego ndhu nddi nneeriwa Lezhiyawu. Enatapulela wi nikuru na anyakoddo macikwi matanu ni nimohi. Aaneba ole ahiromolaga ndina nenddi otapulela wi mineba dhootakala dhedho dhaali mwa oliye dhaali dhijinji wona nikuru nuulubale na anyakoddo. mwaha nili ajinjeene>>. 10Vano oliye ahimuloba-lobaga Yesu vajinji wi mineba ndo ahiigarele ode wa murudda ole.

11Waaddamela vamwaangoni vevale, voojaga nikwedda nuulubale na kumba. 12Vano mineba dhootakala nde dhahimulobaga Yesu, wiira: <<Muniigarele mukumbani mule, nirumeedhiheni wi navolowe mwemule>>. 13Yesu ahirumeedhihaga. Mineba dhootakala nde dhahikumaga ovolowa mukumbani. Vevale nikwedda naatenene nahimaruwaga okitela muddibani dhithamagaga, wiivokedha munyaza, ofiyedha okwela mmahinjeni mwemo. Dhaatedhene dhaaligi macikwi meenddi.

14Amakambuzi a kumba yahithawaga, odhowa olaleyaga muluwani ni mmiruddani. Vevale athu yahidhaaga wi yoone dhedho dheereyilege. 15Egafiyile wewo waaligi Yesu, yamoonilege muthu ahiddiwe ni anamwinji a mineba dhootakala ole agakaraatile vati, agawarile, aneba ale egamalile. Athu ale yahikalagana woova. 16Amakambuzi a kumba ale yoonelege dhowiireya dhaatedhene nde, yahawaaddelaga dhedho dhamwiireyelege muthu ahiddiwe ni mineba dhootakala nde teto ni kumba nde. 17Athu ayo yahimulobaga ni ntidi Yesu wi avenyewo omuruddani wiwa.

18Nuwindo, Yesu ahigwelaga mmwanddeyani, muthu ole ahiddiwe ni mineba dhootakala, ahimulobaga ni ntidi wi adhowe ni oliye. 19Mbwenye Yesu ahikooddaga, omwaaddela, wiira: <<Odhowege owaninyu wawaaddele dhego dhuulubale dhedho Nabwiya dhuwiireliiye mwa thagaraga dhaaye>>. 20Muthu ole ahidhowaga, wambeela olaleya omuruddani oneeriwa oDekapolisi, dhedho Yesu dhamwiireligiiye. A oDekapolisi, egeewile dhoopadduwa nde, athu aatene yahitikinaga vajinji.

Yesu onomuyiliha mwaana a Zhayiro ni mma mmohi

(Matewuzhi 9.18-26; Luka 8.40-56)

21Yesu ahilabuwaga odhowa kobela ya nyaza. Agafiyile okobela, anamwinji yahitugumanaga seresere ya nyaza vevo vaaligi oliye. 22Vano ahifiyaga muthu mmohi, ndina naaye Zhayiro, oyene aali mmohi mwa apogo a nyuba ya matugumano. Agamoonile Yesu, ahikokoraga omanyaloni waaye, 23wambeela omuloba ni ntidi, eeraga: <<Kamwiirena, mwaanaga a mwaana-mwihiyana ohalile vang'ono okwa. Akala dhinowaandeya, mwamuhele mada wi ayile, akalena egumi>>. 24Yesu ahimaruwaga odhowaga ni oliye. Anamwinji yoothaananaga ni oliye yeeddaga moopinyaminyana.

25Vano vahikalaga mwihiyana mmohi oyene abulelena oredda wa omweerini yaaka kumi ni biili. 26Ahikalana goyi vajinji, anamugu ajinji yooxixa omuyiliha. Ahithathila dhooreela dhaaye dhaatedhene, mbwenye kaayila. Ebaribareene mareddaya yootthabwa. 27Mwihiyana ole ageewile dha Yesu, ahivolowaga otaganyihedheya ni anamwinji ale, ofiya odduli wa Yesu, okahinya yoowara yaaye. 28Mmurimani mwaaye oobuwelaga wi: <<Gakahinyave yoowara yaaye, ginoyila>>. 29Nuwindo, mowaaguva maredda ale oomweerini yahimalaga, mwiinya ahoonaga mmwiilini mwaaye wi maredda aaye ehimala.

30Mudhidhi olene Yesu ahoonaga wi kopolo dhimohi dhihikumamo mwa oliye. Ahirugunuwaga wawaang'ana athu ale, waakoha, wiira: <<Okahinyile yoowara yaaga baani?>>

31Anamasuuza aaye, yahiiraga: <<Nyo munowoona wi athu enowuupinyaminyani, vano munakoha addi wi: <Ogikahinyile baani?> >>

32Mbwenye Yesu owawaang'anaga wi amoone oyene wiirilena dhedhi. 33Vevale mwihiyana ole owoovaga wambeela ogurumela, mwaha wi ahuubuwelelaga dhedho dhamwiireyelege. Ahidhaaga waaddamela vaaligi Yesu, okokora vameentoni vaaye, omwaaddelihamo dhaatedhene wona mweereyeliiwa. 34Yesu ahimwaaddelaga, wiira: <<Mwaanaga, nroromelo naawo nuhuuyiliha. Dhowa ni murenddele, maredda aawo ehimala>>.

35Yesu awogagave, yahifiyaga athu okumela vaade va Zhayiro, musogoleli a nyuba ya matugumano. Yahimwaaddelaga oliye, wiira: <<Ii, mwaaninyu ohumariheya. Kammukukumulege Namasuuziha>>.

36Mbwenye Yesu ahiiwaga dhedho dhawogilege athu ale. Ahimwaaddelaga Zhayiro, wiira: <<Kawoove, ororomele baahi>>.

37Yesu kaarumeedhilege wi emuhare athu amohi, mbwenye Peduru, Tiyago ni Zhuwawu, ddibila a Tiyago, ayene baahi. 38Aliwa vafiyiligiisu vaade va Zhayiro, mpogo ole a nyuba ya matugumano, Yesu ahawoonaga anamwinji, yakathamiheyilege yiinddaga moolibiha, amohi ehihimedhaga. 39Oliye agavolowile, ahaakohaga, wiira: <<Mwaha bwaddi okathamiheyeliinyu, mukuwaga, muhihimedhaga? Mwaana ola kakwile, onoogona>>. 40Athu ale yahambeelaga omuteya moonyemula.

Oliye ahaakumihedhaga vaade aatene, omuthukula babe ni amaaye a mwaana ole, ni ayene yaaligi ni oliye, ovolowa osuubini waaligi mwaana ole. 41Vevale ahimwihiddaga mwaana ole ndada, wiira: <<Talita, kume!>>, enatapulela wi: <<Mwaana-mwihiyana we, kavenya!>> 42Mwaana-mwihiyana ole ahivenyaga, wambeela weedda, vowi aali a yaaka kumi ni biili. Athu ale yahitikinaga vajinji. 43Yesu ahaalamulaga wi ehivuwihe muselu wa oyilihiwa wula oli waatewene. Nuwindo, ahaarumaga wi emvahe yooja mwaana-mwihiyana ole.

Currently Selected:

Maruku 5: tke

Highlight

Copy

Compare