Maruku 4

Musibe wa namadhala

(Matewuzhi 13.1-9; Luka 8.4-8)

1Yesu ahiwelelaga osuuziha dila emohi seresere ya Nyaza ya oGalileya. Anamwinji yahitugumanaga wewo momwaapeelela oliye, yahitthabwaga wiinjiva, mwaha wa ela oliye ahivolowaga mmwanddeyani okaraati. Mwanddeya ole waaligi mwinko waaddamela seresere ya nyaza waaligi athu aatene. 2Yesu owaasuuzihaga dhego dhijinji mwa misibe. Vowaasuuziha owiiraga: 3<<Mwiiwesese! Namadhala ahidhowaga odhala bewu. 4Adhalaga, bewu dhimohi dhamorelege moogomela dila, vano balame dhahidhaaga oddoddavo oja. 5Bewu dhimohi dhahimorelaga vamabweni, vahaali theya ejinji. Dhahimelaga mowaaguva, mwaha theyaya kayaddiihile. 6Vano nduwa nigwelaga, dhahinyaala wumma, mwaha misisidha kadhatibeleye. 7Bewu dhimohi dhamorelege vamiingani. Vano dhunnuwaga dhoovaha dha bewu nde dhahihogeya, nuwindo bewudha kadhavahile pama. 8Vano bewu dhimohi dhahimorelaga theya yapama. Dhahimelaga pama, wunnuwa, vano dhahivaha. Dhoovaha dhimohi dhahikanna mangala makumi maraaru, dhimohi makumi matanu ni nimohi (60), dhimohi zana (100)>>. 9Vano Yesu ahiiraga: <<Ole winna obaruni wowiiwa, eewe!>>

Yesu onowoga mwa misibe

(Matewuzhi 13.10-17; Luka 8.9-10)

10Nuwindo, Yesu agalivo yeeka ni anamasuuza aaye kumi ni abiili ale, vamohi ni amohiwa yakaliiyena, yahimukohaga dha musibe ola. 11Oliye ahawaakulaga, wiira: <<Nyoovo, Mulugu ahuuvahani otapulela dhowiipiteya dha Omwene waaye. Mbwenye wa amohiwa eli ode wa Omwene, dhaatedhene eneewela mmisibeni, 12vowi, madhu a Mulugu enowoga, yiiraga:

<Woona enowoona,

mbwenye kinoona yego;

wiiwa enowiiwa,

mbwenye kineewelelamo yego,

wi ehitthwaruwe,

mwa ela Mulugu kanaalevelele>#4.12 Ezaya 6.9-10.>>.

Otapulela wa musibe wa namadhala

(Matewuzhi 13.18-23; Luka 8.11-15)

13Nuwindo, Yesu ahaakohaga, wiira: <<Nyo kamuneewelelamo musibe ola? Ki muneewelelemo addi misibe dhimohi? 14Namadhala di ole onadhala madhu a Mulugu. 15Bewu nde dhamorelege mundila dhinatapulela athu ale enawiiwa madhu a Mulugu, mbwenye mudhidhi oyene Sathana onodha, wawaakamo madhu yadhaliwe mmirimani mweewa. 16Bewu dhadhaliwege vatheyani ya mabwe dhinatapulela athu ale enawiiwa madhu a Mulugu, mudhidhi oyene wawaakela ni ohagalala. 17Vano vowi madhu ayo kayanna misisidha dhoddiiha, athu ayo enalibihedha mudhidhi vang'ono baahi. Mowindo yafwanyiwa masooso naari oharahariwa mwaha wa madhu ale, mudhidhi oyene athuya enowelela mundduli. 18Bewu dhadhaliwege vamiingani nde dhinatapulela athu ale enawiiwa madhu a Mulugu, 19mbwenye vosanyeyela ni dha vati vano, odhiveliwa dhooreela ni okalela murogo dhego dhimohi, dhavolowamo enohogeya madhu ale. Mowindo kadhinavahawene furuuta. 20Mbwenye bewu dhadhaliwege vatheyani yapama dhinatapulela athu ale enawiiwa madhu a Mulugu, yawaakela pama. Athu ala enovaha furuuta, amohi makumi maraaru, amohi makumi matanu ni nimohi (60), amohi zana (100)>>.

Musibe wa panti

(Luka 8.16-18)

21Yesu ahiwelelaga, waakoha, wiira: <<Kalivo onahiddiha panti akuneela ni mpika, naari ohela vati va kama, eehi. Kinahela mburo wowooneyela? 22Vevale kayiivo yoologoheya ehinaadhe yooneyele, naari yowiipiteya ehinaadhe yooneye voweela. 23Oyene winna mabaru owiiwana, eewe!>>

24Ahawaaddelaga, wiira: <<Mwaakameelege madhu ayene munawiiwiinyu. Mpimo oyene munaapimiinyuna akwiinyu, Mulugu onodha oopimeleni oyene vowuuthongani. Ebaribareene wa nyoovo onoodha Mulugu ookwaranyihedheni. 25Ale yinna, enoodha yaakele dhimohi dhijinji, mbwenye ole ohinna yego, naari eyene yinniiyena enoodha emwaake>>.

Musibe wa bewu dhedho dhinamela ni wunnuwa

26Yesu aheenjedhedhaga wawaaddelaga aliwa musibe mmohi, wiira: <<Omwene wa Mulugu oli wona muthu onadhala bewu mmiddani. 27Naari oliye aagonaga mahiyu, bebehi aavenyaga, mudhidhi waatene, bewu dhadhaliliiye nde dhinomela wunnuwaga, mbwenye mwiinya kananona wi dhinapadduwa havi. 28Vowi theya enovahiha dhilo weekiiwa. Enambeela omela, nuwindo njere, osogolowa mangala teto mangala ale enowiithwa. 29Vano mangala ale yeethwa, muthu ole onothukula mbene woogwaddana, wafiya mudhidhi woohadda>>.

Musibe wa kogolo ya bewu ya mpeza

(Matewuzhi 13.31-32, 34; Luka 13.18-19)

30Mooharela Yesu ahiiraga: <<Omwene wa Mulugu onaligana ni ddi? Nifwanafwanihe ni musibe baani? 31Onaligana ni kogolo ya mpeza, enakala eng'onong'ono yadhaliwa vatheyani, mwaliganiha ni kogolo dhimohi vati vano. 32Mbwenye adhala, enomela, bewuya wunnuwa okwaranya bewu dhimohi dha mukwani, dhinokalana mijindda dhuulubale, balame dhinowaanda omagamo dhitunji mmurintini mwiwa>>.

33Yesu aasuuzihaga athu ni misibe dhijinji dhooligana ni nda teto aasuuzihaga mwa mukalelo wa athu ayo waandiisu wiiwelelamo. 34Kaasuuziha vihili misibe. Mbwenye akala yeeka ni anamasuuza aaye, owaatapulela dhaatedhene.

Yesu onomaaliha nipevo nuulubale

(Matewuzhi 8.23-27; Luka 8.22-25)

35Nlabo nenddo, nduwa nigadhowile, Yesu ahawaaddelaga anamasuuza aaye, wiira: <<Kabeni nilabuwele kobela emohi ya nyaza>>. 36Vano aliwa yahaahiyaga anamwinji ale, ogwela mmwanddeyani mwaaligi Yesu. Vahikalaga teto mwanddeya dhimohi dhaaharaga. 37Nuwindo, nahitatamuwaga nipevo nuulubale. Kuluzi yoovolowaga mmwanddeyani, mmwanddeyanimo mwahambeelaga odhaala mahinje. 38Mbwenye mudhidhi oyene Yesu aaligi mundduli mmwanddeyani, agonaga agasameele yoosameela. Vevale anamasuuza ale yahimvenyihaga, wiira: <<Namasuuziha, kamunapwatha yowi hiyo nnooddadda?>> 39Yesu ahivenyaga, omaaliha nipevo ndde, olamula nyaza, wiira: <<Maala! Okale murenddele!>> Nipevo ndde nahimaalaga, nuwindo okala murenddele mulubale. 40Vevale Yesu ahaakohaga, wiira: <<Mwaha bwaddi munooviinyu vajinji? Nyoovo kamwinna nroromelo?>> 41Mbwenye aliwa yowoovagave vajinji, yookohanaga mmohi ni mukwaaye, yiiraga: <<Olaya muthu baani, onafiyedha wiiweleliwa nipevo ni nyazeene?>>

Currently Selected:

Maruku 4: tke

Highlight

Copy

Compare