Maruku 3

Yesu onomuyiliha muthu ooragala ndada

(Matewuzhi 12.9-14; Luka 6.6-11)

1Nlabo nimohi Yesu ahivolowaga mu nyuba ya matugumano. Mwemo mwahikalaga muthu mmohi akwile ndada. 2Athu amohiwa yoomusugwaga, esayelaga woona akala aamuyilihe muthu nlabo na sabuddu wi ekalena yoomusumelana. 3Yesu ahimulamulaga muthu ole, wiira: <<Wiimele, odhe osogolo wuno>>. 4Ahaakohaga athu ale, wiira: <<Ki va nlabo na sabuddu enarumeedheya siivi? Wawiirela athu dhapama, naari wawiirela dhabure? Ovulumusa egumi ya muthu, naari omwihiya akwe?>> Athu ayo omaala pee. 5Vevale Yesu murima waaye womvoreyaga, vowoona wi yaali athu oohaandeya ndale, ahawang'anaga ni otakaleliwa. Vano ahimulamulaga muthu ole, wiira: <<Tapula ndada naawo>>. Oliye ahitapulaga, ndada naaye owelelamo okala pama. 6Vevale aFarizi ale yahikumaga otugumana emuwogaga mawuje vamohi ni athu a nikuru na Heroddi wi epanganele dila yoompela Yesu.

Wiinjiva wa athu oNyaza ya oGalileya

7Yesu vamohi ni anamasuuza aaye yahivenyagavo odhowa oNyaza ya oGalileya. Nikuru nuulubale na athu nahimuharaga. 8Athu ale yadhiilege oGalileya, amohi a oZhudeya, amohiwa oZheruzalemi, amohiwa a oEddumeya ni ookobela wa oZhordawu teto owaaddamela oTiru ni oSidoni. Aatene yahifiyaga vaaligi oliye, mwaha wi yahiiwaga dhedho oliye dheeriligiiye. 9Yesu ahawaaddelaga anamasuuza aaye wi emwaaddamihedhe mwanddeya vakukuuve; woova wi athu enaamfinyege, mwaha yahinjivaga vajinji. 10Mwa anamwinji ala yahikalagavo aredda ajinji yafunaga omukahinya wi eyile. 11Mineba dhootakala dhamoona, dhootongwelaga vati vakukuuve ni oliye okuwaga, dhiiraga: <<Nyo muli Mwaana a Mulugu>>. 12Mbwenye oliye oosumululaga mwa kopolo wi dhihimvuwihege.

Yesu onowaasakula arumiwi kumi ni abiili

(Matewuzhi 10.1-4; Luka 6.12-16)

13Nuwindo, Yesu ahigwelaga omwaangoni, vevo ahawiithanaga athu ayene oliye yaafuniiye, aliwa odhowa wewo waaligiiye. 14Ahaasakulagavo kumi ni abiili <<arumiwi>>. Ahawaaddelaga, wiira: <<Guhuusakulani nyo wi mukalege ni miyo, ginoodha guurumeni wi mwalaleyege, 15teto guuvaheni kopolo dhowiigarana mineba dhootakala>>. 16Athu kumi ni abiili alene yaasakuliligiiye baala: Simawu (oyene Yesu amvahiliiye ndina nowi Peduru), 17Tiyago ni ddibile Zhuwawu, ahima a Zebedeyo (alena yaavahiiwe ndina nimohi nowi <<Bowaneje>>, enatapulela wi <<Oonyagula wona dari>>), 18teto Andire ni Filipi, Baritolomeyo, Matewuzhi, Tome, Tiyago (mwaana a Alifiyu), Tadeyu, Simawu (a nikuru na aZeloti)#3.18 AZeloti Aliwa yaali a nikuru na aZhudewu yeethukulela oPalextina wona anamurala. Aliwa yoofuna wiinyuwela mwa pwere wi yaagonjihe ni wawiigara aRoma. 19teto Zhudasi a oEsikariyothi (oyene ampeleke Yesu wa amwiiddani aaye).

Yesu ni Belezebu

(Matewuzhi 12.22-32; Luka 11.14-23; 12.10)

20Nuwindo, Yesu ahidhowaga vaade vaaye, vano athu ajinji yahitugumanaga, vevale oliye ni anamasuuza aaye kayannaga mudhidhi wooja yego. 21Anaamudhi aaye egeewile dhedhi, yahidhaaga wi emuthukule, mwaha yoobuwelaga wi winna aneba.

22Anamasuuziha amohi a Malamulo, yahidhaaga okumela oZheruzalemi, yoowogaga, yiiraga: <<Muthu ola ohiddiwe ni Belezebu>>. Yeeraga teto: <<Kopolo dhineegariiyena mineba dhootakala dhinakumela wa Belezebu, mpogo a mineba ndo>>. 23Vano Yesu ahawiithanaga athu wi edhe vakukuuve, oowogaga misibe, eeraga: <<Ki Sathana onaande addi wiyiigara yeekaaye? 24Athu a muumweneni mmohive yambeela wiinyuwelana, omweneya kunaliba. 25Vano athu a emudhi emohive yambeela ogawanyeya, emudhiya yowindo kinaliba. 26Vano akala a muumweneni wa Sathana enowiinyuwelana amohive egawanyeya, Sathana oyo kanaalibe, enatapulela wi omweneya ohumala baahi.

27<<Kalivo onavolowa mba mwa muthu akopolo wi amwaake dhookalana dhaaye ahaabihile ommaga, eera ndo athukula dha mbamwa.

28<<Ebaribareene ginowaaddelani wi athu enoleveleliwa dhoothega dheewa dhaatedhene teto ni dhoowoga dhoomunyemula Mulugu. 29Mbwenye ole onanyemula Muneba Woweela, kanaleveleliwa. Yoothega yaaye enakala ya okala ni okala>>. 30Yesu ahiwogaga dhedhi vowi athu ale yoowogaga, yiiraga: <<Ohiddiwe ni muneba wootakala>>.

Amaaye ni addibile Yesu

(Matewuzhi 12.46-50; Luka 8.19-21)

31Amaaye ni addibile Yesu yahidhaaga vaade vale. Wiimela ode, waaruma athu wi yamwiithane. 32Athu ajinji yakaraatilege vati omwaapeelela. Aliwa yahimwaaddelaga, wiira: <<Amaayo ni addibilo eli vaadeva, enowuufunani>>. 33Mbwenye oliye ahiiraga: <<Amma ni addibilaga baani?>> 34Vevale ahaasugwaga athu ale yamwaapeelelege, eeraga: <<Amma ni addibilaga baalena eli veva. 35Aatene eneerana ofuna wa Mulugu, ayene biili addibilaga, arogoraga ni amma>>.

Currently Selected:

Maruku 3: tke

Highlight

Copy

Compare