Maruku 16

Ovenyihiwa wa Yesu muukwani

(Matewuzhi 28.1-10; Luka 24.1-12; Zhuwawu 20.1-10)

1Nuwindo, agavirile sabuddu, Mariya a oMagadala, Mariya, amaaye Tiyago, ni Salome yahidhowaga ogula makura oonukwela wi yakuthulele muruthu wa Yesu. 2Ddimiingu bebeheene, aliwa yahidhowaga onsiyeni, 3yeeddaga yoowogaga weekiiwa yiiraga: <<Onaanipigiriselevo nibwe nifugiwena vamavolowelo va nsiye,#16.3 Masiye a mudhidhi olene yakala wona nikungu. baani?>> Aliwa yawogaga nda mwaha wi nibwena naaligi nuulubale. 4Vano yahisugwaga osogolo, woona wi nibwena nihipigirisiwavo. 5Aliwa egavolowile munsiyeni mule, yahirurumuwaga ni woova, yahimoonaga muzombwe awarilege dhoweela, agakaraatile omoononi wooja.

6Oliye ahawaaddelaga, wiira: <<Kamururumuwe. Nyoovo munamusayela Yesu oNazarethi akomeliwe vamuraddini. Kahuwo ebaribari? Mbwenye oliye mu kalimo, ohuvenyihiwa! Moone mburo walogohiwiiye>>. 7Vano dhowani mwavahe mpaganyo ola wa anamasuuza aaye ni wa Peduru: <<Oliye onakala osogolo weenyu onadhowa oGalileya, nyoovo munamfwanya wewo, ebaribareene wona oliye mwawaaddeleligiiyeni>>.

8Aliwa yahimaruwaga onsiyeni wule egarurumuwile ethawaga egurumelaga vajinji, mbwenye kiyamwaaddelege muthu dhaapadduwelege nde, mwaha wowoova.

[DHOOLEBIWA DHAWALE DHIMOHI KINNA MAVERISIKULU 9 OFIYEDHA 20.]

Yesu onomooneyela Mariya a oMagadala

(Matewuzhi 28.9-10; Zhuwawu 20.11-18)

9[Nuwindo, Yesu agavenyile muukwani, omaselo wa ddimiingu, ahimooneyelaga vowambeela Mariya a oMagadala, ole amwiigareliiye mineba dhaaye dhootakala mitanu na miinddi. 10Oliye ahidhowaga wawaaddela dhoopadduwa nde ale yaali akwaaye a Yesu, aliwa yahikubanya vajinji teto yowuunddaga. 11Aliwa kayarumeedhilege, veewiligiisu wi Yesu mugumi, oliye ahimoonaga.

Yesu onowawooneyela anamasuuza abiili

(Luka 24.13-35)

12Nuwindo, Yesu ahawooneyelaga ni mukalelo mmoheene wa akwaaye abiili, yeeddaga edhowaga mmiruddani. 13Aliwa yahiwelaga wawaaddela anamasuuza amohi, mbwenye teto ni aliweene kayarumeedhilege nde, dhaaddeliwigiisu.

Yesu onowawooneyela anamasuuza kumi ni mmohi

(Matewuzhi 28.16-20; Luka 24.36-49; Zhuwawu 20.19-23; Meerelo a Arumiwi 1.6-8)

14Omagomelowiwa, Yesu ahawooneyelaga anamasuuza kumi ni mmohi ejaga vameeza, ahaasumululaga mwaha woohukalana nroromelo, mwaha wowaaruniha ni ohaarumeedha ale yamoonilege Yesu agavenyile muukwani. 15Oliye ahawaaddelaga, wiira: <<Mmwadheyele mwiilaboni mwaatemwene, mwalaleyege Muselu Wapama wa athu aatene. 16Muthu di muthu onaaroromele vano abathiziwa onovulumusiwa, mbwenye ole ohunaaroromele onokoneya. 17Dhi dhinaakale dhitoonyihedho wa ale enaroromela: aliwa eneerege wiigara mineba dhootakala mu ndina naaga teto eneerege owoga dhiwogelo dhimohi; 18aliwa yahidda nyowa ni madada naari yang'wa ndibwi, kinaapadduwelege yabure; aliwa eneerege waahela madada eewa aredda, vano areddaya eneerege oyila>>.

Yesu onogwela odhulu

(Luka 24.50-53; Meerelo a Arumiwi 1.9-11)

19Vano agawaaddele dhego dhaatedhene dhedhi, Yesu ahithukuliwaga odhowiwagana odhulu, okaraati omoononi wooja wa Mulugu. 20Teto anamasuuza yahimaruwaga, wambeela olaleya Muselu Wapama dhipaddi dhaatedhene. Nabwiya owaakamihedha, awoonihaga ebaribari madhu yalaleyiisu ni dhitoonyihedho dhootikiniha.]#16.20 Madhu ala a maverisikulu 9 ofiyedha 20 kinafwanyeya mu dhoolebiwa dhawale.

Currently Selected:

Maruku 16: tke

Highlight

Copy

Compare