Maruku 15

Yesu omuthegoni wa miladdu wa Pilatu

(Matewuzhi 27.1-2, 11-14; Luka 23.1-5; Zhuwawu 18.28-38)

1Ode ogasile bebeheene apogo a anamakutha, apogo a aZhudewu ni anamasuuziha a malamulo, vamohi ni Nikuru nuulubale na apogo aZhudewu aatene yahitugumanaga. Aliwa ommaga Yesu omudhowagana wa Pilatu.

2Pilatu ahimukohaga Yesu, wiira: <<We oli mwene a aZhudewu?>>

Yesu ahimwaakulaga, wiira: <<Onawoga di nyo>>.

3Apogo a anamakutha ale yegi omusumela ni dhego dhijinji. 4Pilatu ahiwelelaga omukoha, wiira: <<Kwinna yowaakula? Mwa dhaatedhene dhedhi dhinoosumeliisuna!>>

5Mbwenye Yesu kaakulilege yego. Pilatu ahitikinaga.

Yesu onokoniwa ni okwa

(Matewuzhi 27.15-26; Luka 23.13-25; Zhuwawu 18.38b ofiyedha 19.16)

6Sowi mudhidhi wa Othabela wa Paxkwa,#15.6 Paxkwa thi nlabo noreelihiwa noofuneya wa aZhudewu. Yaaka yaatene aliwa yooja dhooja dhoosakuleleya va nlabo nendde wi emuubuwelele Mulugu wi ahaatapula muudhaarini we Egubuddu mudhidhi wa Mozezi. Pilatu ahilemeelela omutapula munyakaambura mmohi, oyene nlogo naamulobiiwa. 7Ahikalawo muthu mmohi eethaniwa Baraba. Oyene aali mukaambura mwemule ni athu amohiwa yafugeleliwe, mwaha wowaapa athu ajinji mudhidhi wowiinyuwela. 8Anamwinji yahitugumanaga va Pilatu wambeela omuloba wi awiirele dhedho dhalemeeleliiye.

9Pilatu ahaakohaga, wiira: <<Munafuna wi guutapuleleni <Mwene a aZhudewu>?>> 10(Pilatu ahiwogaga nda vowi ahinonaga wi apogo a anamakutha yampelekele Yesu mwaha wa nrima.) 11Mbwenye apogo a anamakutha yootuzhaga nlogo emulobaga wi atapuliwe Baraba.

12Vevale Pilatu ahaakohaga dila biili, wiira: <<Ki vano ola munamwiiriinyu <Mwene a aZhudewu>, gimwiirena avi?>>

13Anamwinji aatene yookuwaga, yiiraga: <<Mmukomele vamuraddini!>>

14Vevale Pilatu ahaakohaga, wiira: <<Yabure ddi yiiriliiyena?>> Anamwinji yootthabwaga okuwa, yiiraga: <<Mmukomele vamuraddini!>>

15Vevale Pilatu voofuna ohagalaliha nlogo ndde, ahaatapulelaga Baraba, olamula wi Yesu awaxuliwe, vooharela akomeliwe vamuraddini.

Anyakoddo enoomunyemula Yesu

(Matewuzhi 27.27-31; Zhuwawu 19.2-3)

16Anyakoddo yahimudhowagana Yesu nyuba yoolibihiwa wewo wakaliisu, yaali nyuba ya kuminadori.#15.16 Naari wi: Peretoriyo. Nikuru naatenene na anyakoddo yahitugumanaga vevale. 17Nuwindo, yahimuwarihaga mukanjo wa roxa,#15.17 Mukanjo wa roxa yaali yoowara yoolapa yawara aZhudewu vadhulu va guwo dhimohi, yaali etoonyihedho yooniha othongi wa aRoma, ni aZhudewu. yahiluwaga kara#15.17 Kara yaali etoonyihedho yooniha othongi wa aRoma, ni aZhudewu. ya miinga omuwariha mmuruni mombedda. 18Vevale wambeela omulojelaga, yiiraga: <<Nnowuulojelani, Mwene a aZhudewu!>> 19Aliwa yoomuddwadhaga muru ni bango, omutaperaga mare, yookokoraga emweebedhaga mombedda. 20Egamalile ombedda, yahimukuguulaga mukanjo waroxa, omuwariha dhoowara dhaaye, vooharela yahimuthukulelaga ode wi yamukomele vamuraddini.

Okomeliwa wa Yesu vamuraddini

(Matewuzhi 27.32-44; Luka 23.26-43; Zhuwawu 19.17-27)

21Mundila yahigumanaga ni muthu mmohi a nluwa na oSirene aweruwaga omidda eethaniwa Simawu, ola aali baba a Alixandere ni Rufu; anyakoddo yahimuwaddihedhaga othukula muraddi wa Yesu. 22Aliwa yahimudhowagana Yesu mburo oneethaniwa Gologotha, enatapulela <<Mburo wa Egarigadhi>>. 23Vevale yahimvahaga vinyu oomutaganyiha ni mira#15.23 Mira waali murombwe wamaaliha dhoovoreya, wataganyihiwa ni vinyu. wi amung'we, mbwenye oliye ahimukooddaga. 24Egamukomele vamuraddini, yahigawanaga dhoowara dhaaye. Yahombezelaga gari wi yoone kadda muthu yaathukuliiye.

25Mudhidhi wamukomeligiisu Yesu waaligi wora tanu nennayi dha bebehi. 26Vamuraddini, vadhulu va muru wa Yesu, yahikomelagavo ntabwa valebiwege dhoomusumelana, yiiraga: <<MWENE A AZHUDEWU>>. 27Yahimukomelaga Yesu vamuraddini teto yahaakomelaga ambava abiili, mmohi omoononi wooja, mmohiwa omoononi woong'oto. 28[Mowindo yahaakwanela wona Maleba mwaawogeliiwa, yiiraga: <<Oliye ohutaganyihedhiwa ni ambava>>.] 29Athu yaviraga vevale yoomunyemulaga, ethikaga miru, yiiraga: <<Kahuwo weene weeresa: <Ginoodha gibwanyule nyuba ya Mulugu, gimage mwa malabo maraaru?> 30Okite vamuraddinivo, wiivulumuse weeka!>>

31Apogo a anamakutha ni anamasuuziha a Malamulo, yoomunyemulaga ewogaga mmohi ni mukwaaye, yiiraga: <<Waavulumusa athu amohi, vano kunaanda wiivulumusa weeka>>. 32Kakita vamuraddini Kirixtu,#15.32 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. mwene a Ezarayeli, nuwoone, nuuroromelege! Ambava yakomeliwigiiyena, yoomuruwanaga ni makalelo mamohive.

Okwa wa Yesu

(Matewuzhi 27.45-56; Luka 23.44-49; Zhuwawu 19.28-30)

33Mudhidhi wa wora ya neekumi nabiili ya mutana yiihi yahikuneelaga elabo yaatene, yahilogelaga wora thaaru ogali wooribawene. 34Mudhidhi wa wora thaaru dha ciguwo, Yesu ahikuwaga moolibiha, eeraga: <<Eloyi, Eloyi, lama sabakathani?>> Enatapulela wi: <<Mulugu aaga, Mulugu aaga, mugihiyele ddi?>>#15.34 Masaalimu 22.1.

35Veewiligiisu madhu alena, ale yeemelilege vevale yahiiraga: <<Kamwiiweni, onamwiithana Eliyazi>>.

36Vevale muthu mmohi ahithamagaga othukula nthoje, obwiniha mvinyuni oonyuunya, oseredha obangoni, omvaha Yesu wi amung'we. Nuwindo, muthu ole ahiiraga: <<Kamwihiyeni! Nimoone akala Eliyazi onaadhe amvenyihevo vamuraddini vale!>>

37Vano Yesu ahikuwaga moolibiha, okwa.

38Mudhidhi olene, guwo yagawa nyuba ya Mulugu#15.38 Guwo yagawa nyuba ya Mulugu yaali guwo yatomeyiwe munyuba ya Mulugu yagawa Mburo Woweela ni Mburo Woweelesesa. Moone Okuma 26.33. yahitaleyaga dhipaddi biili, okuma vadhulu, ofiya muddibani. 39Sinturiyawu#15.39 Asinturiyawu yaali asogoleli a anyakoddo zana (100) a aRoma. eemelilege osogolo wa Yesu, [ahimwiiwaga okuwa,] oliye ahimoonaga mukalelo wakwiligiiye, wiira: <<Ebaribareene, mulobwana ola aali Mwaana a Mulugu!>>

40Ahiyana teto yowoonaga woolapelawene, yaaligi Mariya a oMagadala, Salome ni Mariya, maaye a Tiyago mung'onong'ono ni ddibile Zhuuze. 41Ahiyana ala yoomuharaga okuma oGalileya emukamihedhaga Yesu. Teto ahiyana ajinji yamuharaga okuma oZheruzalemi yaaligi vevale.

Ologohiwa wa Yesu

(Matewuzhi 27.57-61; Luka 23.50-56; Zhuwawu 19.38-42)

42Naaligi Nlabo Noosasanyedha, ela sowi sabuddu ahinafiye. Omadhowelo wa nduwa,#15.42 AZhudewu yeelenga nlabo wambeela omadhowelo wa nduwa. 43wahikala mulobwana mmohi eeriwa Zhuuze a oArimateya, oorumeedheya ni Nikuru nuulubale na mpogo, oofuneya a aZhudewu, oyene teto ajejiha Omwene wa Mulugu. Oliye ahiilibihedhaga odhowa wa Pilatu, omuloba mwiili wa Yesu. 44Pilatu ahitikinaga veewiligiiye wi Yesu ohukwa. Ahimwiithanaga musogoleli mmohi a anyakoddo zana (100), omukoha akala ebaribareene Yesu ahikwa. 45Ageewile pamadhene dha okwa wa Yesu ni waaddeliwa wa musogoleli a anyakoddo zana (100), Pilatu ahimurumeedhaga Zhuuze othukula muruthu wa Yesu. 46Zhuuze ahigulaga guwo yoweela ya liinyu, agavenyihilevo muruthu wa Yesu vamuraddini, ahihuruwedhaga ni guwo ele yoweela ya liinyu. Nuwindo, okonaantiha munsiyeni#15.46 Masiye a mudhidhi olene yakala wona nikungu. natopiwe vanibweni, opigiriselavo nibwe nuulubale, ofugana omulago wa nsiye ndde. 47Mariya a oMagadala ni Mariya, maaye a Zhuuze, yaaligi vevale yahoonaga valogohiwege muruthu wa Yesu.

Currently Selected:

Maruku 15: tke

Highlight

Copy

Compare