Luka 1
1
Madhu ovolowana
1Wa Tiyofilu ooriiheya, athu ajinjeene yahisayela osasanyedha bili ya dhego dheereyile#1.1 Dheereyile Naari wi: dharumeedhiwe ni ebaribari. vaari va hiyo. 2Aliwa yahileba dhedho dhaaddeliwiisu ni athu yoonile vameentoni okuma omambeelelo, olaleyaga. 3Miyo goosayela-sayela dhego dhaatedhene dhedhi moohariha pama, okuma omambeelelo guhuubuwelela teto wi giire wuulebela we Tiyofilu dhowiireya nda moosasanyedha pama. 4Gihiirana dhedho wi munone wi dhisuuziliinyu seebaribari.
Obaliwa wa Zhuwawu Namabathiza wahivuhuleliwa
5Mudhidhi oyene Heroddi, agali mwene a oZhudeya, wahikala namakutha, ndina naaye eeriwa Zakariya. Aali a nikuru na anamakutha a Abiya. Mwihiyanaaye eeriwa Ezabeli, aali a nihimo na Aroni. 6Aabiileene yaali owogoowa mirima vameentoni va Mulugu, yoohariha mowaakwanela malamulo ni magano a Nabwiya. 7Kayanna mwaana, vowi Ezabeli kaabala. Aabiileene yaali owululeene.
8Nlabo nimohi Zakariya ahiddaga mabasa aaye oonamakutha vameentoni va Mulugu. Waali mudhidhi wa nikuru naaye na onamakutha nowiimelela, 9mooharihedha mukalelo weewa wa onamakutha, ahimoreliwa gari moosakuliwa ovolowa mburo woweela wa Nabwiya wi apahe libani na mukutho.
10Mudhidhi oyene, athu aatene yakala ode olobelaga. 11Mungero a Nabwiya ahidha vowambeela, wiimela omoononi wooja wiibuwani wapahiwa dhoonukwela dha mukutho. 12Zakariya agamoonile ahirurumuwaga ni woova. 13Mungero ahimwiirelaga: <<Zakariya, kawoove! Vowi malobelo aawo ehiiweya. Mwihiyanaawo Ezabeli oneere ombala mwaana, oyene onamuthwiwe ndina na Zhuwawu. 14Oliye onaakale ohagalala ni oteyela wa we, ajinji eneere odhiveliwa ni obaliwa waaye. 15Vowi oliye onaakale mulubale vameentoni va Nabwiya. Kadha ang'wa yoong'wa yoolezeliha, onaakale oodhaaliwa ni Muneba Woweela, naari ahinabaliwe.#1.15 Ahinabaliwe Naari wi: okumela mbaani mwa amaaye. 16Onodha aatthwaruse amwaana Ezarayeli ajinjeene wa Nabwiya Mulugu aaye. 17Vano oneere okala vasogolo va Nabwiya mmunebani ni kopolo dha Eliyazi wi atthwaruse mirima dha ababiinya wa aniiwa, aatthwaruse avuruvuru wi ekanne nthakwithakwi na athu ooharihamo, aasasanyedhe athu wa Nabwiya nlogo nooharihamo>>.
18Nuwindo, Zakariya ahimukoha mungero, wiira: <<Ginanone addi dhedho, vowi miyo ni mwihiyanaaga nuhuuluvala?>>
19Mungero ahimwaakulaga, wiira: <<Miyo gili Gabiriyeli, gineemelela vameentoni va Mulugu. Ogirumile duuliyeene wi giwoge ni we ni wudheelana Muselu Wapama. 20Woone vowi kuroromele madhu aaga, oneere okala oohuwoga ofiyedha nlabo nenddo dhineereye nda>>.
21Athu yoomujejihaga Zakariya, etikinaga ni mwaha wooribeliwa mu nyuba ya Mulugu. 22Agakumile kaakwanihile waawogana. Aliwa ononelamo wi ohooneyeliwa omburoni woweela. Zakariya awoga ni madada, baahi. Kaanda okumiha madhu.
23Dhahipadduwa egaakwanile malabo a mabasa aaye ahiwelela vaade. 24Nuwindo, egavirile malabo ayene Ezabeli ahikanna wari, ofiyedha mweeri mitanu kaavenya vaade. 25Ezabeli ahiiraga: <<Ndala Nabwiya ohiirana wa miyo, ohudhiveliwa ni miyo, ohumaaliha manyazo yanna miyo vaari va athu>>.
Obaliwa wa Yesu wahivuhuleliwa
26Vigavirile mweeri mitanu na mmohi Ezabeli aganna wari, mungero Gabiriyeli ahirumiwa ni Mulugu murudda wa elabo ya oGalileya nluwa na oNazarethi. Wewo wadhowiliiye omfwanya namwali, eeriwa Mariya. 27Oyene ahaamunonile mulobwana. Athomeliwe ni mulobwana, eeriwa Zhuuze, aali a nlogo na mwene Davidi. 28Mungero agafiyile, ahimulojelaga, wiira: <<We ohukanna mahala! Nabwiya oli ni we>>.
29Mariya ageewile ahisimwelaga vajinjivene, wuubuwelaga, eeraga: <<Olojela wula onatapulela ddi?>> 30Mungero ole omwiirela:
<<Mariya, kawoove.
Weevo ohufwanya mahala a Mulugu.
31 Oneere okalana wari.
Onombala mwaana-pongwe,
oyene oneere omuthwa ndina na Yesu.
32 Onaakale mulubale, akopolo.
Oneethaniwege Mwaana a Mudhulu-dhulu.
Nabwiya Mulugu oneere omvaha
othonga wa babe Davidi.
33 Oneerege othonga nlogo na Yakobo okala ni okala.
Omwene waaye kudha omala>>.
34Mariya ahiwogaga, wiira: <<Dhinaandeye addi dhedhi vowi miyo kagimunonile mulobwana?>>
35Mungero ahimwaakula, wiira: <<Muneba Woweela oneere wuukitela kopolo dha Mudhulu-dhulu dhinowuukuneela ni murinti waaye. Vowi Oweela onabaliwe mwa we oneeriwege Mwaana a Mulugu.#1.35 Mwaana a Mulugu Naari wi: vowi mwaana onaabaliwe oneeriwege oweela Mwaana a Mulugu. 36Woone, mmudhi aawo Ezabeli nuliyeene ohukanna wari. Onomujejiha mwaana-pongwe, ola bu mweeri wa neetanu na mmohi. Oliye agali owuuluvaleene, oyene athu aatene yamwiiriiwa muliba ohubala. 37Vowi ni Mulugu kilivo ehinaandeya>>.
38Vano Mariya omwaakulaga, wiira: <<Gili va, mwiimeleli a Nabwiya. Dhiireye wa miyo dhaatedhene mooligana ni madhu eenyu>>. Vano mungero ovenyavo veemeliligiiye.
Mariya onomweeddela Ezabeli
39Malabo alene Mariya ahivenyaga mowaaguva odhowa nluwa na oZhudeya murudda wo mwaangoni. 40Ovolowa mba mwa Zakariya, omulojela Ezabeli. 41Ezabeli ageewile olojela wa Mariya, mwaanaya ahiikahinyaga mbaani mwa amaaye. Ezabeli teto ahidhaaleliwaga Muneba Woweela. 42Ahiwogaga ni ndhu nootaama, wiira:
<<Oreelihiwa di nyo
vaari va ahiyana;
yoreelihiwa si yoovaha ya
mbaani mweenyu!
43Asaa! Dhaandeyile addi wi amaaye a Nabwiya aaga, egeeddele miyo? 44Vowi viiwiliimi olojela weenyu, mwaana ohiikahinya voolubalevene ni ohagalala mbaani mwaaga. 45Muli ooreelihiwa mwaha woororomela wi Nabwiya dhuwaaddeliiyeni, dhineere wiireya!>>
Jibo ya Mariya
46Nuwindo, Mariya ahiiraga:
<<Egumi yaaga enomuriiha Nabwiya,
47 muneba waaga onohagalala
mwa Mulugu, Mvulumusi aaga.
48 Vowi ohoona wiiyeviha wa mwiimeleli aaye.
Okuma dhiinova odhowa osogolo ni anamabaliwelamo
aatene enagiirege ooreelihiwa 49mwaha wi
oowodha ohugiirela dhego dhuulubale.
Oweela thili ndina naaye.
50 Thagaraga dhaaye dhinowaafiyedha
anamabaliwelamo aatene, alene enamuriiha.
51 Ohaabalalesa ni moono waaye owiithukula,
ni moobuwelelo eewa oovirigana.
52 Ohaakitiha mamwene mumpanddoni mweewa,
waagweliha owiiyeviha.
53 Ohaarubaliha ni dhapama aliba dala,
waapaganya ehinna yego ooreela.
54 Ohumukamihedha Ezarayeli mwiimeleli aaye,
kaddiwaalele thagaraga dhaaye 55wa Abarahamu
ni anamabaliwelamo aaye okala ni okala,
wona aroromelihiiye makolo eehu>>.
56Mariya ahikala ni Ezabeli mweeri dhowaakwana miraaru. Vano owelela vaade vaaye.
Obaliwa wa Zhuwawu Namabathiza
57Mudhidhi ogaakwanile wowi Ezabeli abale, ahimbala mwaana-mulobwana. 58Amwaaddamani ni amudhi aaye egeewile wi Nabwiya ohumweeddiwela thagaraga voolubalevene, yahihagalala ni oliye.
59Vigavirile malabo matanu ni maraaru yahimudhowana mwaana wi eeneliwe yafunaga emuthwe ndina na babe, Zakariya. 60Amaaye yahaakulaga, wiira: <<Naari! Eeriwege Zhuwawu>>. 61Yahimwiirelaga: <<Amudhi aawo kalivo winna ndina nenddo>>.
62Omukoha babe a mwaana ni madada wi ki mwaana ola eeriwege aani. 63Ahilobaga ntabwa olebavo: <<Ndina naaye di Zhuwawu>>. 64Mowaaguva mulomo waaye wahifuguwaga, nlumi otapuwa, owogaga, amutamaalaga Mulugu. 65Wahikalaga woova wa amwaaddamani aatene a Zakariya ni murudda dhaatedhene dha omwaangoni dha oZhudeya, dhoowogiwa dhowiireya nde. 66Aatene yeewile nde yoologolela mmirimani, yiiraga: <<Mwaana ola onaakale aani?>> Mwaha wi kopolo dha Mulugu dhaali ni oliye.
Jibo ya Zakariya
67Zakariya, babe Zhuwawu, ahidhaaliwa Muneba Woweela wambeela ovuwiha mutheenga ola, eeraga:
68 <<Ootamaaliwa akale Nabwiya,
Mulugu a wEzarayeli,
vowi oheeddela ni woobola nlogo naaye.
69 Ohunivenyihedha ovulumusa wa kopolo,
odheela vaade va Davidi, mwiimeleli aaye.
70 (Woona Mulugu mwawogeliiye odheela
vamulomoni vanamavuhulela oweela murima
okuma wale-wale.)
71 Wi eere onoobola wa amwiiddani eehu
mmadadani mwa aatene alene enanaaba.
72 Ohooneyiha thagaraga dhaaye wa makolo eehu,
wuubuwelela nipangano no waandana
woopanganela waaye woweela,
73 Olibela wamwiireliiye babiihu Abarahamu:
74 Wi eere onivulumusa mmadadani mwa,
amwiiddani eehu wi nimweebedhege nihoovaga,
75 moweela mirima ni wiiwelela vameentoni vaaye
malabo maatene a egumi yeehu.
76 We mwaanaga, oneerege wiithaniwa
namavuhulela a Mudhulu-dhulu.
Vowi oneere odhowa vasogolo va Nabwiya
wi osasanyedhe dila yaaye.
77 Ni waalaleyela athu a Mulugu ovulumusiwa weewa
odheela mooleveleliwa dhoothega dheewa,
78 vowi Mulugu eehu dathagaraga,
ohuneeddela okumela odhulu
wona ofuwa wa nduwa, 79wi naamoneyele ale
eneedda mwiipipini ni murinti wookwa,
wi aasogolele manyalo eehu mundila ya murenddele>>.
80Mwaana ole owunnuwa ni oliba mwa muneba, ahikala mwiiddeddereni ofiyedha nlabo nenddo neyooneyihiliiye wa Ezarayeli wona pogo.
Currently Selected:
Luka 1: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
