Maruku 11

Yesu onovolowa muZheruzalemi ni ovuwa

(Matewuzhi 21.1-11; Luka 19.28-40; Zhuwawu 12.12-19)

1Yesu ni anamasuuza aaye yaaddamelaga oZheruzalemi, vakukuuve oBetifazhe ni oBetaniya, waaddamela Mwaango wa Olivera, Yesu ahaarumaga anamasuuza aaye abiili, 2wawaaddela, wiira: <<Dhowani mudhi onooniinyu oyo. Mwaavolowagawene munomfwanya mwaana a buuru agamageleliwe, ohunagweliwege ni muthu; mmutapule, mmudhena. 3Muthu onookoheni, eera: <Nyo eneeriinyu eyo ddi?> Mmwaakule, mwiire: <Nabwiya dinamfuna, mowaaguva onomuweliha> >>. 4Anamasuuza ale yahidhowaga omfwanya mwaana a buuru agamageleliwe vamavolowelo va cinga, waaddamela mundila, omutapula. 5Athu yaaligi vevo egawoonile, yahaakohaga, wiira: <<Eneeriinyu eyo ddi, munamutapulela ddi buuru oyo?>> 6Anamasuuza yahaakulaga wona mwemo Yesu mwawaaddeligiiye. Nuwindo, athu ale yahaarumeedhihaga omudhowana buuru ole. 7Anamasuuza yahimudhaagana buuru ole vaaligi Yesu. Yahitadeelaga dhoowara dheewa vamutanani wa buuru#11.7 Moone Zakariya 9.9. ole, Yesu ogwelavo. 8Athu ajinji yootadeelaga dhoowara dheewa murampani, amohiwa yootadeelaga matadu a mithanko yaakotholigiiwa mukokolani. 9Athu aatene yasogolilege vamohi ni ale yaaligi mundduli mwa Yesu, yookuwaga, yiiraga:

<<Hozana!#11.9-10 Hozana mu ewogelo ya eHeberi enatapulela Nabwiya nivulumuseni, naari wi: Athithimihiwe. Moone teto verisikulu 10. Ooreelihiwa di oyene onadha

mundina na Nabwiya!>>#11.9 Masaalimu 118.25-26.

10 <<Woriiheya bu Omwene onadha

wa nikolo neehu Davidi!>>

<<Hozana a mudhulu-dhulu!>>

11Yesu ahivolowaga muZheruzalemi, ofiya nyuba ya Mulugu woona dhaatedhene dhaali mwemo, ahikumagamo odhowaga oBetaniya vamohi ni anamasuuza aaye ale kumi ni abiili, vowi vaaligi ciguwo.

Yesu onodduba mfigera

(Matewuzhi 21.12-17; Luka 19.45-48)

12Obebehini wiwa evenyaga oBetaniya wule, Yesu ahikalagana dala. 13Ahoonaga muthanko wa mfigera#11.13 Mfigera bu muthanko onavaha furuuta dhooligana ni furuuta dha namutaambwi. Moone teto maverisikulu 20-25. (onaligana ni namutaambwi) voolapelavene oganna mataakuruve, ahifiyagavo wi oone akala aaddoddevo furuuta dhiwa. Mbwenye kaafwanyilegemo yego, afwanyilegemo mataakuruve baahi, vowi kawaali mudhidhi woovaha dhoovaha. 14Vevale ahiwogaga ni muthanko ole, wiira: <<Muthanko we, wambeela peeno ahikalevo onaadhe aje dhoovaha dhaawo>>. Madhu ale anamasuuza yahawiiwaga.

Yesu onoweeliha nyuba ya Mulugu

(Matewuzhi 21.12-17; Luka 19.45-48)

15Aliwa yahifiyaga oZheruzalemi. Yesu ahivolowaga vathaddo#11.15 Vathaddo va nyuba ya Mulugu onaagiwana mburo waapeelele nyuba ya Mulugu athu vagulihiiwa nagooso wi eveleelege mvahi mu nyuba ya Mulugu. va nyuba ya Mulugu, wambeela wathamagihamo athu yamweeddaga nagooso mwemule. Ahaatongwihaga meeza vacenjiwaga korowa ni dhittengu dha anamaguliha kangayiwa. 16Teto kaahiyilege wi athu evirege vathaddo va nyuba ya Mulugu egathukule dhego. 17Vano ahambeelaga waasuuziha, eeraga: <<Kadhilebiwe wi:

<Nyuba yaaga eneethaniwege

nyuba ya matugumano a malobelo

a malogo maatene>#11.17 Ezaya 56.7.?

Mbwenye nyo muhusaddula okala nikungu na ambava>>.#11.17 Moone Zheremiya 7.11.

18Apogo a anamakutha ni anamasuuziha a Malamulo egeewile dhedhi, yahambeelaga osayela mukalelo wowi empe. Aliwa yoofunaga wiirana nda, vowi yoomoovaga Yesu mwaha wi athu aatene yootikinaga dhoosuuziha dhaaye.

19Vigaribile, yahivenyagawo oluwani wule.

Dhoosuuziha dha mfigera ole wooddubiwa

(Matewuzhi 21.18-22)

20Omenseloni wiwa mudhidhi wa bebehi yeeddaga murampani yahoonaga muthanko wa mfigera ole ogommile wambeela vati ni misisidhene. 21Vevo Peduru ahuubuwelelaga madhu ale, omwaaddela Yesu, wiira: <<Namasuuziha, koonani mfigera ole mwaddubiliinyu, ohumma>>. 22Yesu ahimwaakulaga, wiira: <<Mukalena nroromelo mwa Mulugu. 23Ebaribareene ginowuwaaddelani wi mwakalana nroromelo kadda muthu oneerege wiirela mwaango ola: <Ovenyevo, wakale munyaza>, awogaga moohaanganyedha, dhiwogiliiye dhineerege wiireya wona muwogeliiye. 24Mwahaya buuyene ginowaaddeliimini wi mwaalobelaga mmulobaga Mulugu yego eli yaatene, muroromelege wi muhaakela teto muneerege waakela. 25Vano mwaafunaga olobela, mwambeelege waalevelela akwiinyu, akala muhukalana mwaha. Mweera ndo, Babiinyu oli odhulu onowuulevelelani dhoothega dheenyu. 26[Mbwenye akala nyo kamunaalevelela akwiinyu, Babiinyu oli odhulu, kadha alevelela dhoothega dheenyu>>.]

Yesu onokohiwa dha owodha waaye

(Matewuzhi 21.23-27; Luka 20.1-8)

27Dhigavirile nde, yahiwelelaga oZheruzalemi. Yesu eddeeddaga mu nyuba ya Mulugu, apogo a anamakutha, anamasuuziha a Malamulo ni makolo a mutugumano yahimwaaddamelaga 28omukoha, wiira: <<Onaaddele owodha oneeriiwena dhego dhi okumilena waani? Wuuvahile owodhawo wowiiragana dhego dhi baani?>> 29Yesu ahawaakulaga, wiira: <<Miyo teto ginowuukohani yego emohi. Mwagaakula, ginowuwaaddelani ogivahile owodha oneeriimina dhego dhi. 30Mugaakule: Amvahile Zhuwawu Namabathiza owodha wi abathizege aali Mulugu, yaali athu?>>

31Aliwa yahambeelaga okohana vakaleligiisu, yiiraga: <<Neera amvahile di Mulugu, ononikoha eere: <Ki mudhe muhumurumeedhege?> 32Teto neera avahiwe ni athu>>. Aliwa yowawoovaga athu vowi aatene yeera ebaribareene Zhuwawu aali namavuhulela. 33Mowindo yahaakulaga, wiira: <<Hiyo kanimunonile>>. Vano Yesu ahawaaddelaga, wiira: <<Naari miyo teto kaginowaaddelani okumiliimina owodha oneeriimina dhego dhi>>.

Currently Selected:

Maruku 11: tke

Highlight

Copy

Compare