Matewuzhi 9

Yesu onomuyiliha mulobwana ookwa-yaano oKafaranawu

(Maruku 2.1-12; Luka 5.17-26)

1Yesu ahigwelaga mmwanddeyani, olabuwela kobela emohiwa, odhowa nluwa na owaniwa. 2Wewule athu yahimudheelagana mulobwana mmohi ookwa-yaano egamukonaantihile vanteteni. Yesu, agoonile nroromelo nanna athu ale, ahimwiirelaga ookwa-yaano ole: <<Mwaanaga, olibe murima, dhoothega dhaawo dhihileveleliwa>>.

3Vevale anamasuuziha a Malamulo yoowogaga weekiiwa, yiiraga: <<Mulobwana ola onomunyemula Mulugu!>>

4Nuwindo, Yesu, voonona moobuwelelo eewa, ahiiraga: <<Mwaha bwaddi munoobuweleliinyu dhootakala mmirimani mweenyu? 5Etthabwile okweya siivi? Wiira: <Dhoothega dhaawo dhihileveleliwa>, naari owoga, wiira: <Venya weedde?> 6Mbwenye munone wi miyo Mwaana a Muthu gihikanna owodha mwiilaboni ya vati woolevelela dhoothega…>> Oliye ahirugunuwaga owoga ni ookwa-yaano ole, wiira: <<Venya, othukule ntete naawo, odhowege vaade vaawo>>.

7Ookwa-yaano ole ahivenyaga, odhowaga vaade vaaye. 8Anamwinji egoonile nde yahikalagana woova, yoomuthithimihaga Mulugu, aavahile athu kopolo dhowinda.

Yesu onomwiithana Matewuzhi

(Maruku 2.13-17; Luka 5.27-32)

9Yesu agavenyile vevale, ahimoonaga muthu mmohi eethaniwa Matewuzhi agakaraatile vamburoni vookoha musoko, Yesu ahimwiirelaga: <<Ogiharege!>> Matewuzhi ovenya omuharaga.

10Vano Yesu agali mba#9.10 Naari wi: vaade va Matewuzhi. Moone Luka 5.29. ajaga yahidhaaga anamakoha-musoko ajinji ni anamathega, okaraati vamohi ni Yesu ni anamasuuza aaye. 11Vevale aFarizi egoonile nde, yahaakohaga anamasuuza a Yesu, wiira: <<Mwaha bwaddi namasuuziha eenyu onaja ni anamakoha-musoko teto ni athu oothega?>>

12Yesu ageewile dhedho ahiiraga: <<Ale eli agumi kinamurabulela namugu, eehi, mbwenye ale eli aredda. 13Dhowani, mwasuuze yootapulela ya madhu ala: <Ginafuna thagaraga ohiya mukutho>.#9.13 Ozeya 6.6. Vowi kagidheele wawiithana athu apama, mbwenye athu oothega>>.#9.13 Enofwanyeya madhu owi: mbwenye athu oothega wi etthwaruwe mu dhoolebiwa ni madada dhimohi dhixa. Mbwenye anamasuuza ajinji enoobuwela wi wi etthwaruwe kiyalebiwe ni murumiwi Matewuzhi.

Yesu onokohiwa mwaha woothuga

(Maruku 2.18-22; Luka 5.33-39)

14Nuwindo, anamasuuza a Zhuwawu Namabathiza yahimwaaddamelaga Yesu, omukoha, wiira: <<Mwaha bwaddi hiyo ni aFarizi nthugaga [dila dhijinjidhene], anamasuuza eenyu ehithugaga?>>

15Yesu ahawaakulaga, wiira: <<Kadhinaandeya wi aliba wiithaneliwa matelo ekale ookubanya namatelaya agali vevo! Enoofiya malabo eneeriiwa yaakiwe namatelaya, mwa malabo ayene fineeriiwa ethugege.

16<<Kalivo onasonela ecapa exa vaguwoni yawale, mwaha wi ecapa eyo enowoomola guwo yawale, otaleya wiwa onootthabwa. 17Naari vinyu muxa kanaheliwa mmathumbani a makupa awale, mathumbaya enootaleya, vano vinyuya onothathiya, mathumbaya enomala mabasa. Mbwenye vinyu muxa onaheliwa mathumba maxa, ndala dhaabiilidhene dhinologoleleya>>.

Yesu onomuyiliha mwaana a musogoleli ni mma mmohi

(Maruku 5.21-43; Luka 8.40-56)

18Yesu awaaddelaga dhego dhedhi ahifiyaga musogoleli, mmohi a nyuba ya matugumano, ahimwaaddamelaga, okokora, omweebedha, wiira: <<Mwaanaga a mwaana-mwihiyana ohukwa dhiinoveva, mbwenye mudhe, mmuhele ndada, oliye oneere okanna egumi>>. 19Vevale Yesu ahivenyaga omuhara ni anamasuuza aaye.

20Teto vahikalaga mwihiyana mmohi abulela ofiyedha yaaka kumi ni biili, oredda wookuma mwazi. Mwihiyana ole ahidheelaga odduli waaye okahinya nipiyo na yoowara yaaye, 21vowi owuubuwelelaga mmurimani mwaaye yeeka, wiira: <<Giira gikahinya yoowara yaaye ginooyila>>.

22Vano Yesu ahirugunuwaga, omoona, wiira: <<Mwaanaga, olibe murima, nroromelo naawo nuhuuyiliha>>. Mowaaguva, mudhidhi olene, mwihiyana ole oyila.

23Yesu agafiyile vaade va musogoleli ole ahawoonaga anamooba mvilovilo vano athu ajinji owukuuweene yuunddaga, oliye wiira: 24<<Venyavoni mwaha wi mwaana-mwihiyana ola kakwile, onoogona>>. Vano anamwinji yoomuteyaga. 25Nuwindo, athu egavenyilevo Yesu ahivolowaga mba, omwihiddeela ndada mwaana-mwihiyana ole, oliye ovenya. 26Vano bili ya mapadduwo ale yahimwadheyelaga murudda waatene olene.

Yesu onowaayiliha athu abiili oohoona ni muthu oohuwoga

27Yesu amaruwaga vevale yahimuharaga athu oohoona abiili, ekuwaga, yiiraga: <<Mwaana a Davidi,#9.27 Kahuwo wi Yesu aali Mwaana a Davidi; enatapulela namabaliwelamo a nlogo na Davidi. muneeddiwele thagaraga hiyo!>> 28Agavolowile mba yahimwaaddamelaga oohoona ale, vano Yesu ahaakohaga, wiira: <<Munororomela wi ginowaanda wuwiirelani dhedho?>> Aliwa waakula, wiira: <<Ee, Nabwiya!>>

29Vevale Yesu ahaakahinyaga meento eewa, wiira: <<Dhiireye wona ororomela weenyu>>. 30Vano meento eewa yahifuguwaga. Ahaasinjeedhaga vajinjivene, wiira: <<Pole-pole ahikalevo mmohi oneere anone>>. 31Mbwenye aliwa egavenyile vevale, yahilaleyaga murudda waatene olene.

32Oohoona ale evenyagavowene, athu amohi yahimudhaagana wa Yesu muthu oohuwoga, oohiddiwa muneba wootakala. 33Vevale Yesu agakumihile muneba wootakala ole, oohuwoga ole ahambeelaga owoga. Anamwinji yootikinaga, yiiraga: <<Okalawene kinaabihege wooneya yego yowindala wEzarayeli!>>

34Mbwenye aFarizi yoonong'onaga, yiiraga: <<Ola onakumiha mineba dhootakala ni kopolo dhinamvaha musogoleli a mineba dhootakala>>.

Thagaraga dha Yesu

35Yesu oweeddeedda mmaluwani ni mmavade mwaatemwene, asuuzihaga mu nyuba dha matugumano,#9.35 Nyuba dha matugumano Nda mu ewogelo ya eGerego dheeriwa sinagoga. Mabasa eewa kayaali oolobelamoove, naari osuuzamo Malamulo, mbwenye teto yowaathongamo athu yahaaharihamo Malamulo a aZhudewu. alaleyaga Muselu Wapama wa Omwene, ayilihaga dhoovoreya ni dhiredda dhaatedhene. 36Oliye vowawoona anamwinji oowaweeddiwelaga thagaraga vowi yaali ookathamiheya, oohukanna owaakamihedha wona mabila oohiyiwa oohukanna makambuzi. 37Vano ahidhowaga wa anamasuuza aaye, wiira: <<Ebaribareene mabasa oohadda ehunnuwa, mbwenye anamalaba eli vang'ono. 38Mowindo mmulobe Nabwiya, mwiinya a mabasa oohadda wi aarume anamalaba omahaddelo waaye>>.

Currently Selected:

Matewuzhi 9: tke

Highlight

Copy

Compare