Matewuzhi 10

Yesu onowaaruma arumiwi kumi ni abiili

(Maruku 3.13-19; 6.7-13; Luka 9.1-6)

1Yesu ahawiithanaga anamasuuza aaye kumi ni abiili waavaha owodha woolamula ni wiigara mineba dhootakala, ni oyiliha dhoovoreya ni dhiredda dhaatedhene.

2Anamasuuza kumi ni abiili ayene teto yeethaniwa arumiwi, mandinaya baala: owambeela Simawu, oononeya ni ndina na Peduru, Andire, ddibila aaye; Tiyago, mwaana a Zebedeyo, ni ddibile Zhuwawu. 3Filipi ni Baritolomeyo; Tome ni Matewuzhi, namakoha-musoko; Tiyago, mwaana a Alifiyu, ni Tadeyu. 4Simawu (a nikuru na aZeloti,)#10.4 AZeloti Aliwa yaali a nikuru na aZhudewu yeethukulela oPalextina wona anamurala. Aliwa yoofuna wiinyuwela mwa pwere wi yaagonjihe ni wawiigara aRoma. ni Zhudasi a oEsikariyothi, ole ampeleke.

5Kumi ni abiili ala Yesu ahaaruma, wiira: <<Kamudhowe wa athu oode, naari ovolowa mmaluwani a aSamariya, 6mbwenye mudhowe wa mabila oorimeela a nyuba ya aEzarayeli. 7Munaavirigiinyu mulaleyege, mwiirege: <Omwene wa Odhulu ohaaddamela>. 8Mwaayilihege aredda, mwaavenyihege ookwa, mwaweelihege a maredda,#10.8 Maredda mu ewogelo ya eGerego kinaagana mareddave mbwenye teto dhiredda dhoohiyana-hiyana dha nikupa na muthu. mwiigarege mineba dhabure. Mwaakelile mwa mahala; vahani mwa mahala. 9Kamuthukule oro, kamuthukule parata, kamuthukule korowa ya mukuwa musintuni mweenyu. 10Kamuthukule thumba na voolenddoni, kamuthukule maleya meenddi, kamuthukule sapatho, kamuthukule mukogodho, vowi namalaba onofwaneela waakela yooja yaaye.

11<<Mwaavolowaga muluwani naari mmuruddani mukohedhelege dha muthu oofuna wuwaakelani, mukalege vevo ofiyedha nlabo noovenyamo. 12Mwaavolowaga mbamo mwiirege: <Murenddele okale ni nyo>. 13Vano athu a vaade vo yowaakelani moofwaneelela murenddele weenyu okale ni aliwa; yahuwaakelani moofwaneelela murenddele owelelege wa nyo. 14Muthu oli aatene ahuwaakelani, naari ahivuruwana madhu eenyu, mwaavenyaga vaade vevale naari muluwani mule mutatege nthubi na mmanyaloni mweenyu.#10.14 Yesu ahaalamulaga anamasuuza aaye wi etate nthubi na manyalo eewa wooniha wi ale enakoodda Muselu Wapama enakala ookoneya. Moone Maruku 6.11; Luka 9.5; 10.11; Meerelo a Arumiwi 13.51. 15Ebaribareene ginowuwaaddelani wi Nlabo na Othongi, Mulugu onoodha amweeddiwele thagaraga vajinji Soddoma ni Gomora,#10.15 Wambeela 18.20; 19.24-28. ohiya nluwa nddo. 16Mwiiwe pama, miyo ginowuurumani wona mabila vaari va miiji; mowindo mukale ooxaga wona nyowa, oofwaasa wona kangayiwa.

17<<Muxage ni athu mwaha wi eneerege wuupelekani mmithegoni mwa miladdu, muneerege owaxuliwa mu nyuba dha matugumano,#10.17 Nyuba dha matugumano Nda mu ewogelo ya eGerego dheeriwa sinagoga. Mabasa eewa kayaali oolobelamoove, naari osuuzamo Malamulo, mbwenye teto yowaathongamo athu yahaaharihamo Malamulo a aZhudewu. 18mwaha wa miyo muneerege othukuleliwa vameentoni va makuminadori ni va mamwene wi mwaakulele onamoona wa aliwa ni wa athu oode. 19Mwaathukuleliwaga omuladduni muhukathamiheyege, mwiiraga: <Ginawoge ddi?> Vowi va mudhidhi oyene muneerege ovahiwa madhu oofuna owoga. 20Vowi onawogege kahuwo nyo mbwenye Muneba wa Babiinyu bunawogege mwa nyoovo.

21<<Ddibila onoodha ampelekege ddibile wi apiwe, vano baabi onoodha ampelekege mwaanaye, ahima enoodha yawiinyuwelege ababiwa ofiyedha waapa. 22Aatene eneerege wuwiiddani mwaha wa ndina naaga, ole onaavilele ofiyedha omakuthulo oneere ovulumusiwa. 23Mwaaharahariwaga va nluwa nimohi muthawelege nluwa nimohiniwa, vowi ebaribareene ginowuwaaddelani wi kamunamarihe weddeedda maluwa maatene a Ezarayeli ahifiyile Mwaana a Muthu.

24<<Kalivo namasuuza onamukwaranya namasuuziha aaye, naari kalivo mwiimeleli onamukwaranya nabwiye. 25Mowindo sowaakwanela wi namasuuza aliganege ni namasuuziha aaye, mwiimeleli aliganege ni nabwiye. Ki akala mwiinya a vaade athu enamwiithana wi Belezebu,#10.25 Belezebu Ndina nnavahiwa Sathana vookala musogoleli a mineba dhootakala. ki emudhi ya vaade vo kinamwiithanena mandina ootakala ookwaranya ndda?

26<<Ndala muhumoove muthu, vowi kilivo yookuneeleya ehinaadhe yooneyihiwa, kilivo yawipiini ehinaadhe enoniwa. 27Dhedho dhinowaaddeliimini mowiipiteya nyo muwogege voweela, nde dhinaaddeliwiinyu moonong'ona mulaleyege ni ndhu nootaama. 28Kamwawoovege ayene enapa mwiili mbwenye kinaanda opa muneba. Mmoovege oyene onaanda obwanyulela muneba ni mwiili omunddoni woohuthima. 29Kinagulihiwa anamandwi abiili ni sentaavu mmohi? Mbwenye kavili balame emohi enaamorevo Babiinyu ahirumeedhihe. 30Owoga dha nyo, ni mathitheene a mmuruni enoweelengiwa. 31Mowindo kamoovege, vowi muli oofuneya waakwaranya anamandwi ajinji.

32<<Mowindo ole onagirumeedha vameentoni va athu, miyo teto ginoodha gimurumeedhe vameentoni va aBaba eli odhulu. 33Mbwenye ole onagikoodda vameentoni va athu teto miyo ginoodha gimukoodde vameentoni va aBaba eli odhulu.

34<<Muhuubuwelele wi miyo gidhiilena murenddele mwiilaboni ya vati; kagidhiilena murenddele, mbwenye gidhiilena koddo. 35Vowi gidheele ommwalaniha mulobwana ni ababe, mwaana-mwihiyana ni amaaye, nzala ni nzaliye. 36Mowindo amwiiddani a muthu enaakalege amudhi a vaade vaaye.#10.36 Moone Mikeya 7.6.

37<<Ole onaadhivela ababe naari amaaye ogikwaranya miyo kanafwaneela okala namasuuza aaga; ole onamudhivela mwaanaye a mulobwana naari a mwihiyana ogikwaranya miyo kanafwaneela okala namasuuza aaga; 38ole ohunathukula muraddi waaye agiharaga, kanafwaneelela okala namasuuza aaga. 39Ole onalogolela egumi yaaye onorimeeliha, mbwenye onarimeeliha egumi yaaye mwaha wa miyo onofwanya.

40<<Ole onowaakelani onagaakela miyo; onagaakela miyo onamwaakela ole ogirumile. 41Onamwaakela namavuhulela#10.41 Namavuhulela onaagiwana olene onalaleya mutheenga wa Mulugu. mwaha wowi namavuhulela onoodha aakele yoothuviwa ya namavuhulela, onamwaakela ooharihamo mwaha wi onoharihamo efunelo ya Mulugu onowaakela yoothuviwa ya ooharihamo. 42Ole oneere amvahe kopo ya mahinje ooddiddila mmohi mwa oofuneya vang'onong'onove mwa anamasuuza aaga, mwaha wookala namasuuza aaga, ebaribareene ginowuwaaddelani wi kadha ayeleela yoothuviwa yaaye>>.

Currently Selected:

Matewuzhi 10: tke

Highlight

Copy

Compare