Matewuzhi 3
3
Zhuwawu Namabathiza onosasanyedha dila ya Yesu Kirixtu
(Maruku 1.2-8; Luka 3.1-18)
1Mwa malabo alene, ahikumelela Zhuwawu Namabathiza, owaalaleyela athu mwiiddeddereni ya oZhudeya, eeraga: 2<<Tthwaruwani dhowiira dheenyu mwaha wi Omwene wa Odhulu ohaaddamela!>> 3Vowi namavuhulela Ezaya ahiwoga dha Zhuwawu, eeraga:
<<Ndhu na muthu nnakuwa
mwiiddeddereni:
<Sasanyedhani rampa
wi Nabwiya aviremo,
mogoolele dila yaaye> >>.#3.3 Ezaya 40.3 (Bibiliya Seputuwazhinta).
4Zhuwawu awara guwo dhoosasanyiwa ni mooya a mwaneenyama oneethaniwa kamelo,#3.4 Namavuhulela Eliyazi ahiwara mowinda. Moone Mamwene a Nabiili 1.8. Dhoowara nda dhinatoonya wi Zhuwawu aali namavuhulela. Moone Levitiku 11.22; Zakariya 13.4. agamagele sintu na nikupa mmwiinuni mwaaye teto yooja yaaye yaali kwaakwa ni enwi ya mukokolani. 5Athu a oZheruzalemi, a mirudda dhaatedhene dha oZhudeya, vamohi ni mburo dhaatedhene dhowaaddamela mwihinje Zhordawu, yoodhowa wa Zhuwawu Namabathiza. 6Aliwa yabweka dhoothega dheewa, Zhuwawu owaabathiza mmwihinjeni Zhordawu.
7Zhuwawu agoonile wi aFarizi ajinji ni aSaduseyi yoodhaaga vevale vabathizigiiye, ahiiraga: <<Nyo, mulogo wa dhivili, wuwaaddeleni baani othawa owali wa Mulugu onafuna odha? 8Mwihidde mabasa owooneyiha wi muhutthwaruwa dhoothega dheenyu. 9Mmurimani mweenyu muhuubuwelege owoga, mwiiraga: <Nihikanna babiihu Abarahamu>.#3.9 Moone Zhuwawu 8.33. Vowi miyo ginowuwaaddelani wi Mulugu onowaanda waasaddula mabwe alena wi ekale ahima a Abarahamu. 10Badho ehipanihiwa wi egwaddena misisi dha mithanko. Mithanko dhaatedhene dhihinavaha dhoovaha dhapama dhineere okakatthiwa wi dhivokedhiwe vamunddoni.
11<<Miyo ginoobathizani ni mahinje enooniha wi nyo muhutthwaruwa dhoothega dheenyu, mbwenye ole onadha mundduli mwaaga onogikwaranya, kagifwaneele othukula sapatho dhaaye. Oliye onoobathizegeni ni Muneba Woweela ni munddo. 12Etelo yaaye eli mmadadani wi amveethena tirigu, amulogolele vatatani, aakahe makataya ni munddo woohuthima>>.
Obathiziwa wa Yesu
(Maruku 1.9-11; Luka 3.21-22)
13Malabo alene Yesu ahimaruwaga oGalileya odhowa mwihinje Zhordawu wi abathiziwe ni Zhuwawu. 14Mbwenye Zhuwawu ahixixaga okoodda, eeraga: <<Miyo difwaneele obathiziwa ni nyo, vano nyo munafuna wi miyo guubathizeni?>>
15Mbwenye Yesu ahimwaakulaga, wiira: <<Dhiinova orumeedhe, mwaha wi fumwemo munafuneyeliiwa wi niirena Mulugu dhinafuniiye>>. Vano Zhuwawu ahirumeedhaga.
16Yesu agabathiziwe ahivenyagamo mwinko. Nuwindo, odhulu wahifuguwaga, Yesu ahoonaga Muneba wa Mulugu ni mooneyelo a kangayiwa okitaga, odhaaga va oliye. 17Vano nahiiweyaga ndhu odhulu, neeraga: <<Ola di Mwaanaga oodhivela, onagihagalaliha>>.#3.17 Masaalimu 2.7; Ezaya 42.1.
Currently Selected:
Matewuzhi 3: tke
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.