YouVersion Logo
Search Icon

Matewuzhi 2

2
Atthottho enomweeddela Yesu
1Yesu abaliwe oBetelemi murudda wa oZhudeya, Heroddi agali mwene. Yesu agabaliwe, oZheruzalemi wahifiyaga atthottho ookumela omadheelo wa nduwa. 2Yahikohedhelaga, wiira: <<Mwene aZhudewu obaliwe oli wuuvi? Vowi noonile ttendderi yaaye omadheelo wa nduwa. Nidheele wi nimweebedhe>>.
3Mwene Heroddi ageewile nda ahikathamiheyaga teto ni athu a oZheruzalemi aatene. 4Nuwindo, ahaatugumanyaga apogo a anamakutha aatene ni anamasuuziha a Malamulo a nlogo, waakohaga wi Kirixtu#2.4 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. ole aroromelihiwe aabaliwe wuuvi. 5Aliwa yahaakulaga, wiira: <<OBetelemi, oZhudeya, vowi dhilebiwe ndo odheela mwa namavuhulela:
6 <We Betelemi,
elabo ya oZhuda,
ni vang'onong'ono kwiyiire mung'onong'ono
vaari va maluwa a oZhuda;
vowi mwa we muneere okuma musogoleli
onaalamulege nlogo naaga Ezarayeli> >>. # 2.6 Mikeya 5.2.
7Nuwindo, mwene Heroddi ahawiithanaga mowiipiteya atthottho, waakoha mudhidhiya wooniliiwa ttendderi eyo. 8Vano ahaarumaga wi edhowe oBetelemi, wiira: <<Mweelibihedhe omusayela ofiyedha mumfwanye mwaana oyo, mwamfwanya mudhe mugaaddele wi ni miyeene gidhowe gamweebedhe>>.
9Egeewile madhu a mwene Heroddi yahimaruwaga, odhowaga. Ttendderi yooniligiiwa omadheelo wa nduwa yowaasogolelaga, egafiyile vamburoni vaaligi mwaana, ttendderi ele yahiimelaga vadhulu va mburo vaaligi mwaana. 10Aliwa egoonile ttendderi ele yahihagalalaga vajinji. 11Egavolowile mba yahimfwanyaga mwaana ni amaaye Mariya. Yahikokoraga omweebedha mwaana ole, waatapula mathumba a mvahi dheewa, oveleela oro, libani noonukwela ni makura eneeriwa mira. 12Mulugu ahawaaddelaga aliwa moorohani wi ehiwelele wa Heroddi. Mowindo yahiwelelaga owaniwa ni dila emohi.
Ababiinya a Yesu enomuthawelana wEgubuddu
13Egadhowile atthottho ale, mungero a Nabwiya ahimooneyelaga Zhuuze moorohani, wiira: <<Ovenye, omuthukule mwaana ni amaaye, othawele wEgubuddu. Wakale wewo ofiyedha wi guwaaddele, vowi Heroddi onomusayela mwaana wi ampe>>.
14Vevale Zhuuze ahivenyaga ni mahiyu, omuthukula mwaana ni amaaye, othawela wEgubuddu. 15Yahikala wewule ofiyedha okwa wa Heroddi. Nda dhahipadduwa wi dhaakwanelihe nde dhawogile Nabwiya odheela mwa namavuhulela, eeriliiye: <<Miyo gihimwiithana Mwaanaga aali elabo ya wEgubuddu>>.#2.15 Ozeya 11.1.
16Heroddi vooniligiiye wi atthottho ale ehimunyengetha, ahitakaleliwaga vajinji. Ahilamulaga wi epiwe anaalobwana aatene a yaaka biili oya mundduli a oBetelemi ni a mirudda dhowapeelela. Oliye ahiirana nda moohariha ni mudhidhi atthottho wamwaaddeliiwa wooniliiwa ttendderi. 17Nuwindo, dhahaakwanela dhawogile namavuhulela Zheremiya, dhowi:
18 <<Ohiiweya ndhu oRaama,
ndhu nowundda ni okubanya,
Rakeli onawuunddela anaaye;
onokoodda omaalihiwa,
vowi anaaye aatene yahirimeela>>. # 2.18 Zheremiya 31.15.
Owelawo wEgubuddu
19Heroddi agakwile, mungero a Nabwiya ahimooneyelaga Zhuuze moorohani agali wEgubuddu, omwaaddela, wiira: 20<<Ovenye, omuthukule mwaana ni amaaye, owelele wEzarayeli mwaha wi ale yafuna ompa mwaana oyo ehikwa>>.
21Vano Zhuuze ahivenyaga, omuthukula mwaana ni amaaye, owelela elabo ya Ezarayeli. 22Mbwenye aganonile wi Arikelawu, mwaana a Heroddi, dinalamula oZhudeya vamburoni va babe ahoovaga wi adhowe akalege wewo. Zhuuze ahaaddeliwaga moorohani dhoofuna wiira, nuwindo ahidhowaga murudda wa oGalileya, 23okalaga wewo. Nluwa nneeriwa Nazarethi. Nda dheereyile wi dhaakwanelihiwe dhawogile anamavuhulela, dhowi: <<Oliye oneerege wiithaniwa muNazarethi>>.

Currently Selected:

Matewuzhi 2: tke

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy