Matewuzhi 28

Ovenyihiwa wa Yesu muukwani

(Maruku 16.1-8; Luka 24.1-12; Zhuwawu 20.1-10)

1Sabuddu agavirile, ddimiingu ebembe mbee, Mariya a oMagadala ni Mariya mmohiwa yahidhowaga onsiyeni.#28.1 Masiye a mudhidhi olene yakala wona nikungu.

2Mowaaguva wahiiweyaga othikeya wuulubale wa elabo, vowi mungero a Nabwiya ahikitaga odhulu, ofiya, opigirisavo nibwe ndde, okaraatela. 3Mooneyelo aaye yaaligi wona ozherima, dhoowara dhaaye dhaaligi dhoweelesesa. 4Vano anamaang'anela yowoovaga, wambeela ogurumela, okalagahi yiire okwa.

5Mungero ole ahifiyaga vaaligi ahiyana, wiira: <<Muhoove, vowi gihinona wi munamusayela Yesu, oyene okomeliwe. 6Oliye mula kalimo, ohuvenyihiwa muukwani wona mwawogeliiye. Mudhe, moone mburo walogohiwiiye. 7Mudhowe mowaaguva mwawaaddele anamasuuza aaye, mweere: <Oliye ohuvenyihiwa muukwani. Oli osogolo weenyu, onadhowa oGalileya, wewo muneere omoona>. Siyeene yafuniimi wuwaaddelani!>>

8Vano ahiyana ale yahimaruwaga onsiyeni wule ni waaguva, yoovaga teto ni ohagalala wuulubale, yahithamagaga odhowa wawaaddela anamasuuza. 9Mowaaguva Yesu ahifiyaga ogumana ni aliwa, wiira: <<Ginowuulojelani!>> Vano aliwa yahimwaaddamelaga omukubaarela manyalo, omweebedha. 10Nuwindo, Yesu wiira: <<Muhoove! Mudhowe mwawaaddele addibilaga wi edhowe oGalileya, wewo eneere ogoona>>.

AZhudewu enowaanyingala anamaang'anela

11Vevale ahiyana ale edhowaga, anamaang'anela amohi yahidhowaga oluwani wawaaddela apogo a anamakutha dhaatedhene dheereyilege. 12Aliwa yahitugumanaga vamohi ni apogo a nlogo, wiiwananela waanyingala anamaang'anela ale ni korowa dhijinjidhene, 13wawaaddela wi yiirege: <<Anamasuuza aaye bidhiile mahiyu, wiiyamo mwiili wa Yesu nigonaga. 14Dheera dhiiweya wa kuminadori dhoopadduwa ndo hiyo nnomukurumula murima wi ooleveleleni>>. 15Anamaang'anela ale yahaakela korowa nde, wiirana wona mwaaddeleliwiiwa. Mowindo dhooratha nde dhahivuwihiwa vaari va aZhudewu ofiyedha peeno.

Yesu onowaaruma anamasuuza aaye mwiilaboni

16Yahivenyaga anamasuuza ale kumi ni mmohi, odhowaga oGalileya, omwaangoni oyene Yesu waatoonyihedhiiye. 17Vano egamoonile yahimweebedhaga mbwenye amohi yowaanganyedhaga. 18Yesu ahifiyaga vakukuuve wawaaddela, wiira: <<Owodha waatewene ovahiwe wa miyo, odhulu ni elabo ya vati. 19Mwaha wa ela nyo dhowani wa malogo maatene, mwaarugunuse ekale anamasuuza aaga. Mwaabathizege mu ndina na Baba, na Mwaana, ni na Muneba Woweela, 20mwasuuzihaga ologolela dhaatedhene dhedho miyo dhowaaddeliimini. Muubuwelege wi miyo gili ni nyo malabo maatene, ofiyedha omakuthulo wa elabo ela>>.

Currently Selected:

Matewuzhi 28: tke

Highlight

Copy

Compare