Maruku 1

Zhuwawu Namabathiza onosasanyedha dila ya Yesu Kirixtu

(Matewuzhi 3.1-12; Luka 3.1-18)

1Wambeela wa Muselu Wapama wa Yesu Kirixtu,#1.1 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. Mwaana a Mulugu. 2Wona mwalebele namavuhulela Ezaya, eeraga:

<<Miyo ginomuruma osogolo waawo

murumiwi aaga, oyene

onaasasanyedhege dila vasogolo vaawo. # 1.2 Malakiya 3.1.

3 Ndhu naaye nnokuwa mwiiddeddereni,

niiraga: <Sasanyedhani rampa wi Nabwiya aviremo,

mogoolele dila yaaye> >>. # 1.3 Ezaya 40.3 (Bibiliya Seputuwazhinta.)

4Okumelela wa Zhuwawu Namabathiza mwiiddeddereni weereyile ndala, owaalaleyela athu eeraga: <<Tthwaruwani dhowiira dheenyu, mbathiziwe wi muleveleliwe dhoothega>>. 5Athu a mirudda dhaatedhene dha oZhudeya, vamohi ni athu aatene a oZheruzalemi yoodhowa wa Zhuwawu Namabathiza. Aliwa yabweka dhoothega dheewa, Zhuwawu owaabathiza mmwihinjeni Zhordawu. 6Zhuwawu awara guwo dhoosasanyiwa ni mooya a mwaneenyama oneethaniwa kamelo, agamagele sintu na nikupa mmwiinuni mwaaye, aja kwaakwa ni enwi ya mukokolani.#1.6 Namavuhulela Eliyazi ahiwara mowinda. Moone Mamwene a Nabiili 1.8. Dhoowara nda dhinatoonya wi Zhuwawu aali namavuhulela. Moone Levitiku 11.22; Zakariya 13.4. 7Owaalaleyela athu, eeraga: <<Mundduli mwaaga onoodha mmohiwa oowodha oogikwaranya, naari kagifwaneelele otapula mingoyi dha sapatho dhaaye. 8Miyo ginowuubathizani ni mahinje. Mbwenye oliye onoobathizegeni ni Muneba Woweela>>.

Obathiziwa wa Yesu

(Matewuzhi 3.13 ofiyedha 4.11; Luka 3.21-22; 4.1-13)

9Va malabo ayene, Yesu akumaga murudda wa oNazarethi, elabo ya oGalileya, ahifiyaga omwihinjeni wa oZhordawu vano ahibathiziwaga ni Zhuwawu Namabathiza. 10Mowaaguva Yesu atavuwaga mmahinjeni, ahoonaga odhulu othuleyaga, vano Muneba Woweela ni mooneyelo a kangayiwa wahikitelaga va oliye, 11odhulu wahiiweyaga ndhu niiraga: <<We oli Mwaanaga oodhivela, mwa we ginohagalala>>.#1.11 Moone Wambeela 22.12; Masaalimu 2.7; Ezaya 42.1.

Weehiwa wa Yesu mwiiddeddereni

(Matewuzhi 4.1-11; Luka 4.1-13)

12Okuma vevale, mowaaguva Yesu ahithukuleliwaga mwiiddeddereni ni Muneba wa Mulugu. 13Mwemule Yesu ahikalagamo malabo makumi mannayi eehiwaga ni Sathana. Oliye akala ni aneenyama a mukokolani, angero a Mulugu yoomwiimelela.

Yesu onowambeela mabasa aaye oGalileya

(Matewuzhi 4.12-14; Luka 4.14-15)

14Zhuwawu agafugeliwe mukaambura, Yesu ahiwelela oGalileya, alaleyaga Muselu Wapama wa Mulugu, 15eeraga: <<Mudhidhi ohaakwana. Omwene wa Mulugu ohufiya. Mutthwaruwe, murumeedhe Muselu Wapama>>.

Wiithaniwa wa anamasuuza owambeela

(Matewuzhi 4.18-22; Luka 5.1-11)

16Yesu eeddaga seresere ya Nyaza ya oGalileya, ahawoonaga addibila abiili, Simawu ni Andire, evokedhaga mathavi munyaza, vowi yaali anamatota. 17Vano Yesu ahawaaddelaga, wiira: <<Mudhe mugiharege, guwiireni anamatota a athu>>. 18Mowaaguva aliwa yahaahiyaga mathavi eewa, omuharaga. 19Egeeddile vang'ono, Yesu ahawoonaga addibila amohi abiili. Tiyago ni ddibile Zhuwawu, ahima a Zebedeyo. Egali mmwanddeyani ni babiiwa esasanyedhaga mathavi eewa. 20Mowaaguva Yesu ahawiithanaga. Aliwa yahimwihiyaga babiiwa Zebedeyo ni anamalaba aaye mmwanddeyani, omuharaga Yesu.

Yesu onowiigara muneba wootakala mwa mulobwana oKafaranawu

(Luka 4.31-37)

21Aliwa yahidhowaga oKafaranawu. Vano nigafiyile nlabo na sabuddu, Yesu ahivolowaga mu nyuba ya matugumano,#1.21 Nyuba dha matugumano Nda mu ewogelo ya eGerego dheeriwa sinagoga. Mabasa eewa kayaali oolobelamoove, naari osuuzamo Malamulo, mbwenye teto yowaathongamo athu yahaaharihamo Malamulo a aZhudewu. wambeela osuuziha. 22Athu yootikinaga dhosuuziha dhaaye, mwaha oosuuzihaga ni othongi, oohiyanihaga ni masuuzihelo a anamasuuziha a Malamulo.

23Mu nyuba ya matugumano eyo mwahikumelelaga muthu ahiddiwe ni muneba wootakala. Ahikuwaga ni ndhu nootaama, wiira: 24<<Ii! Ninna ddi hiyo ni nyo,#1.24 Mu ewogelo ya eGerego onafuna owoge ddi: Munihiye mmurenddeleni. Yesu muNazarethi? Mudheele onitolosa? Miyo guhuunonani wi muli Oweela a Mulugu>>. 25Mbwenye Yesu ahihiihaga muneba wootakala, wiira: <<Wiire pee! Okume mwa muthu ola!>> 26Vevale muneba wootakala ole wahimuthikaga vajinjivene ni kopolo muthu ole, vano wahikuwaga mookwaranya, okumamo. 27Athu aatene yaaligi ootikiniheya, yookohanaga, yiiraga: <<Dhedhi sowi avi? Dhoosuuziha dha musawo dhedhi? Moone! Oliye onolamula ni owodha mineba dhootakala teto dhinomwiiwelela!>> 28Bili yaaye yahivuweyaga mowaaguvamwene mirudda dhaatedhene dha oGalileya.

Yesu onomuyiliha mbogohaaye Simawu ni athu amohi

(Matewuzhi 8.14-17; Luka 4.38-41)

29Mowaaguva Yesu, Simawu, Andire, Tiyago ni Zhuwawu, yahivenyaga mu nyuba ya matugumano, odhowa vaade va Simawu ni Andire. 30Mudhidhi oyene agavolowile mwemule, yahimwaaddelaga Yesu wi Simawu mbogohaaye oli ookonaanteene muredda, mwaha wa nipaddawe nuulubale. 31Yesu ahimwaaddamelaga, omwihiddeela ndada mma ole, omvenyiha, vano nipaddawe omwihiya. Vevale mma ole wambeela waakamihedha aliwa.

32Ociguwoni, nduwa nidhowaga, athu yowaadhaagana wa Yesu akwiiwa aatene aredda ni oohiddiwa mineba dhootakala. 33Athu a murudda waatene yahitugumanaga vamulago wa nyuba ele. 34Yesu ahaayilihaga ajinji alene yarabula teto ni dhiredda dhoohiyana-hiyana, ahiigara mineba dhootakala dhijinji. Mbwenye minebadha kaahiya wi dhiwogege, mwaha dhahimudidela.

Yesu onoolaleya oGalileya

(Luka 4.42-44)

35Bebeheene, ohunasese, Yesu ahivenyaga odhowa omburoni wahavira athu pweepwe. Wewo oolobelaga. 36Simawu ni akwaaye ale yahivenyaga omusayelaga. 37Egamfwanyile yahimwaaddelaga, wiira: <<Athu aatene enowuusayelani>>. 38Mbwenye oliye ahiiraga: <<Kabeni nidhowe mirudda dhimohi dhowaaddamela wewuno, galaleye teto, wewo madhu vowi bi mabasa yadheeliimi>>. 39Vano Yesu ahidhowaga weddeedda oGalileya waatewene, oolaleyaga mu nyuba dha matugumano teto owiigaraga mineba dhootakala.

Yesu onomuyiliha muthu a maredda

(Matewuzhi 8.1-4; Luka 5.12-16)

40Muthu mmohi amaredda#1.40 Maredda mu ewogelo ya eGerego kinaagana mareddave mbwenye teto dhiredda dhoohiyana-hiyana dha nikupa na muthu. ahidhaaga wa Yesu. Okokora wambeela omuloba-loba, eeraga: <<Mwafuna, munowaanda ogeeliha>>.#1.40 Ogeeliha Naari wi: mugiyilihe. 41Yesu ahimweeddiwelaga thagaraga. Ahimutapulelaga ndada omukahinya, wiira: <<Ee, gihifuna. Weele!>> 42Mowaaguva maredda aaye ale yahinaanelaga, aheelihiwaga. 43Vano Yesu ahimulamulaga wi adhowege, ahimwaaddelaga madhu akopolo. 44Ahiiraga: <<Ogivuruwane, kumwaaddele muthu mmohi dhedhi. Odhowege, weyooneyihe wa namakutha,#1.44 Levitiku 14.1-32. waveleele mukutho ole walamulele Mozezi. Oyene okale onamoona wa athu aatene wi ohuyilihiwa>>.

45Mbwenye muthu ole agavenyile vevale, ahambeelaga olaleya dhaatedhene ni osoriha dhende dhamwiireyele. Mwaha wa dhedho Yesu kaakwanihilege wooneyela voweela mirudda dhaatedhene. Mbwenye oliye akala woolapela okwibi mburo wahaviriwesesa; athu yoodhowaga wa oliye okumela wula ni wula.

Currently Selected:

Maruku 1: tke

Highlight

Copy

Compare