Matewuzhi 25
25
Musibe wa anamwali kumi
1<<Mudhidhi oyene Omwene wa Odhulu onadhe okale wona dheerilege anamwali kumi. Yathukulege panti dheewa wi yagumane ni namatela. 2Anamwali ale atanu yaaligi oolodhowa, atanu yaaligi ooxaga. 3Oolodhowa vathukuligiiwa panti dheewa, kayathukulilege makura mamohi, 4mbwenye ooxaga egathukulile panti teto yahithukulaga makura mmagaraafwani. 5Namatela ahiribeliwaga, aatene yahihiddiwaga ni kove, ogonelavo.
6<<Vaari ni vaari va mahiyu wahiiweyaga okuwa, weeraga: <Namatela ohufiya! Venyani mwagumanena>.
7<<Anamwali aatene ale yahivenyaga, osasanyedha panti dheewa. 8Oolodhowa yahawiirelaga ooxaga: <Nivahemoni vang'ono makura eenyu, mwaha wi panti dheehu dhinoothima>.
9<<Anamwali ooxaga yahawaakulaga, wiira: <Naari, yinniihuna kinaakwanela hiyo teto ni nyo! Dhowani wa anamaguliha, mwaagule eenyu>.
10<<Aliwa egamaruwile wi yaagule, namatela ahifiyaga. Ale yaaligi owiisasanyedheene yahivolowaga ni oliye mwaaligi mathanga ootela, ofugiwa musiwo.
11<<Vigavirile mudhidhi yahifiyaga anamwali oolodhowa, ekuwaga, yiiraga: <Nabwiya, nabwiya, nithuleleni!>
12<<Mbwenye oliye ahaakulaga, wiira: <Ebaribareene ginowuwaaddelani wi kaguunonileni> >>.
13Vano Yesu agamarihile owoga musibe ola, ahiiraga: <<Mwiing'anelege, mwaha wi kamunonile nlabo niwa naari mudhidhiya onaadhe Mwaana a Muthu>>.
Musibe wa matalenti
(Luka 19.11-27)
14<<Omwene wa Odhulu oli wona muthu mmohi anna olenddo, awiithanilege amwiimeleli aaye, waahiyedha dhooreela dhaaye. 15Ahimwinkaga mmohi korowa dhowaakwana matalenti#25.15 Talenti yaali korowa ya oro mutheengo waliveliwa namalaba alaba yaaka kumi ni yaaka tanu. Moone teto maverisikulu 16, 17, 18, 20, 22, 24, 25, ni 28. matanu, mmohi amwinkilege korowa dhowaakwana matalenti meenddi, amwinkilege mmohiwa talenti emohi. Ahiiragana ndo mooligana ni tthottho dha kadda muthu, omaruwa olenddo waaye. 16Ole aakelilege matalenti matanu ahivenyaga mowaaguva, omwiira nagooso, opura matalenti mamohi matanu. 17Emodha-modhave ole avahiwege matalenti meenddi teto ahipuraga mamohiiwa meenddi. 18Mbwenye ole aakelilege talenti emohi wa nabwiye eerege otibela talenti ele.
19<<Vigavirile mudhidhi mujinji, nabwiya a amwiimeleli ale ahidhaaga. Agadhiile aheelengelaga korowa dhaatedhene nde ni amwiimeleli aaye. 20Mwiimeleli ole aakelilege matalenti matanu, ahiveleelaga teto mamohi matanu, wiira: <Nabwiyani, mwagivahile matalenti matanu. Moone, gihipuramo mamohi matanu ala>.
21<<Nabwiye ahiiraga: <Dhihikala pama, we oli mwiimeleli apama ni oororomeleya. We ohuroromeleya ni dhego dhing'onong'ono, ginowuuvaha okameela dhego dhijinji. Volowa ohagalale ni miyo!>
22<<Ahidhaaga teto mwiimeleli ole aakelilege matalenti meenddi, omwiirela: <Nabwiyani, mwagivahile matalenti meenddi. Moone, gihipuramo mamohiiwa meenddi>.
23<<Nabwiye ole ahimwaaddelaga, wiira: <Dhihikala pama, we oli mwiimeleli apama ni oororomeleya. We ohuroromeleya ni dhego dhing'onong'ono, ginowuuvaha okameela dhego dhijinji. Volowa mburo woohagalala wa nabwiya aawo!>
24<<Vano agafiyile ole aakelilege talenti emohi, ahiiraga: <Nabwiya, vowi gihinona wi muli muthu oovaadda murima, munohadda vihidhaliliinyu, munotugumanya vihimidhiliinyu, 25gowuwoovani mwaha wa ela, geere otibela vati talenti yeenyu ela, thukulani eli yeenyu>.
26<<Nabwiye ahimwaakulaga, wiira: <Mwiimeleli abure, ooyimwa, wahinona wi ginohadda vihidhaliliimi, ginotugumanya vihimidhiliimi. 27Vano odhe ohuhelege obanko korowa yaaga, miyo gaweligiimiwo, gowaakela ni yoweenjedhedhavoya.
28<< <Mmwaake talenti eyo mumvahe ole winna matalenti kumi. 29Vowi ole winna oneere weenjedhedhiwa, vano oneere okalana dhowiinjiva, mbwenye ole ohinna, naari yooyeva elene yinniiyena onowaakiwa. 30Vano mwiimeleli ooyimwa oyo, mumvokedhe ode, oli epipi. Wewo onaakale wuundda ni otakuna meeno> >>.
Othongi woogomihedha
31<<Mwaana a Muthu, adha adhaaga ni nthithimiho naaye na omwene, vamohi ni angero aatene, onoodha akaraati vampanddoni vaaye va omwene wa nthithimiho. 32Malogo maatene enoodha etugumane vameentoni vaaye, oliye onoodha aamwalanihe wona makambuzi onamwalaniha mbuzi ni mabila. 33Onoodha aahele mabila omoononi waaye wooja, vano mbuzi onoodha ahele omoononi waaye woong'oto.
34<<Vevo mwene#25.34 Yesu onowoga dhowi mwene oneyaagana oliyeene, mudhidhi oyene onaadhiiye akaraati vampanddoni vaaye va omwene. Vevo onoodha ambeele waathonga athu a elabo yaatene wona mwene athu aatene. onoodha awiirele ale enaakale omoononi wooja: <Mudhe wuno, nyo ooreelihiwa a Ababa! Volowani muuMweneni oyene wasasanyedheliwiinyu okuma opaddusiwa wa elabo ya vati. 35Mwaha wi gahikalana dala mwahigivaha yooja; gahikalana nthona mwahigivaha yoong'wa; gaali mwanaweendda mwahigaakela; 36gaali madave mwahigiwariha; gaali muredda mwahigikameela; ngafugeliwe mukaambura mwahidha ogoona>.
37<<Mowindo ooharihamo efunelo ya Mulugu enoodha emukohege, yiiraga: <Nabwiya, nowoonileni alini muganna dala nuuvahani yooja? Naari muganna nthona nuuvahani yoong'wa? 38Naari nowooniliihuni mugali mwanaweendda nuwaakelani? Naari mugali madave nuuwarihani? 39Ki nowoonileni alini mugali aredda naari mugafugeliwe mukaambura ndha nuwoonani?>
40<<Mwene onoodha awaakulege, eere: <Ebaribareene ginowuwaaddelani wi mudhidhi dhaatedhene mwaakamihedhiinyu amohi mwa addibilaga ang'onong'ono ala, mwagikamihedha miyeene>.
41<<Vevo mwene ole onoodha awiirele ale enakale omoononi waaye woong'oto: <Venyavoni va miyo, ooddubiwa nyo, mudhowe omunddoni woohumala wasasanyedheliwe Ddiyabo#25.41 Ddiyabo naali ndina nimohi na Sathana. ni angero aaye. 42Vowi gahikalana dala kamwagivahile yooja; gahikalana nthona kamwagivahile yoong'wa; 43gaali mwanaweendda kamwagaakelile; gaali madave kamwagiwarihile; gaali muredda kamwagikameele; gahifugeliwa mukaambura kamwadhiile mugoona>.
44<<Aliwa enoodha emukohege, yiirege: <Nabwiya, nowoonileni alini mugali ni dala, ni nthona, mugali mwanaweendda, mugali madave, mugali aredda, naari mugafugeliwe mukaambura nuhuupwathani?>
45<<Mwene onoodha awaakulege, eerege: <Ebaribareene ginowuwaaddelani wi mudhidhi dhaatedhene mwahaakamihedhiinyu amohi mwa addibilaga ala ang'onong'ono, mwahiya ogikamihedha miyeene>.
46<<Vano ayo enoodha edhowege ogoyini yoohumala, mbwenye ooharihamo efunelo ya Mulugu enoodha edhowege wiigumini yoohumala>>.
Currently Selected:
Matewuzhi 25: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
