Matewuzhi 24

Etoonyihedho ya makuthulo a dhaatedhene

(Maruku 13.1-31; Luka 21.5-37)

1Yesu akumaga mu nyuba ya Mulugu, anamasuuza aaye yahimwaaddamelaga wi emoonihe mamagiwelo a nyuba ya Mulugu.#24.1 Mamagiwelo a nyuba ya Mulugu Yawoga ndo mwaha wi nyuba eyo kayaalivo emohive dhaalivo nyuba dhijinjidhene. 2Oliye ahiiraga: <<Munowoona dhaatedhene dhedhi? Ebaribareene ginowuwaaddelani wi kudha okala nibwe vadhulu va nibwe nikwaaye nihinaadhe nihibwanyuliwe>>.

3Yesu, agakaraatile vaMwaangoni wa Olivera, anamasuuza aaye yahimwaaddamelaga, omukoha ombale, wiira: <<Kanaaddeleni dhego dhedho dhineereyege alini? Kanaaddeleni etoonyihedho baani nneeriihu noonege ya odha weenyu ni omakuthulo wa dhaatedhene?>>

4Oliye ahaakulaga, wiira: <<Pole-pole, ahikalevo oneere ooholoseni. 5Vowi enoodha efiye athu ajinji mu ndina naaga yiirege: <Miyo gili Kirixtu#24.5 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. Moone teto maverisikulu 23, 24 ni 26. ole aroromeliwe>, eneere waaholosa athu ajinji. 6Teto muhukuuwe mweewaga koddo naari dhooruma dha koddo, mwaha wi soofuneya wi dhego ndo dhiireyege, mbwenye makuthulo kinafiye. 7Vowi nlogo nneerege owana koddo ni nlogo nimohi, omwene oneerege owana ni omwene omohi, enoodha ekalewo dala ni othikeya wa elabo mburo dhoohiyana-hiyana. 8Dhoopadduwa ndo dhinaakale dhooligana ni dhoovoreya dhowambeela dha mwihiyana mudhidhi wa obala.

9<<Vano nyo muneerege ooharahariwa, woonihiwa goyi, amohi ofiyedha opiwa. Munakala owiiddiwa ni malogo maatene, mwaha wa ndina naaga. 10Mudhidhi oyene athu ajinji enoodha ehiye nroromelo neewa, epelekanege ni wiiddana. 11Eneerege okumelela anamavuhulela ajinji ooratha, yaanyengethege athu ajinji. 12Vano mwaha woweenjedhedheya dhootakala, odhivela onoodha oyeve vaari va athu ajinji. 13Mbwenye oyene onaavilele ofiyedha omakuthulo, onoodha avulumusiwe. 14Muselu Wapama wa Omwene ola, onoodha olaleyiwe elabo yaatene ya vati okale onamoona wa malogo maatene. Mowindo finaadhe makuthulo a dhaatedhene.

15<<Mwadha moona yoonyakavala yoobwanyula yawogile namavuhulela Daniyeli vamburoni woweela, (ole oneelenga eewelelemo),#24.15 Daniyeli 9.27; 11.31; 12.11. 16ole onaakale oZhudeya athawele omwaangoni. 17Ole onaakale ode kavolowe mba wi athukule dhego. 18Ole onaakale omudda kawelele vaade wi athukule kasaako yaaye. 19Ooddilu bi ahiyana enaakalena wari mudhidhi oyene teto enawaamwihege ahima! 20Lobelani wi othawa weenyu ohudhe wiireya mudhidhi wa muzongwe#24.20 Naari wi: mudhidhi wooddiddila. naari nlabo na sabuddu. 21Mwaha wowi mudhidhi oyene okubanya ni masooso malubale enaakalewo kinakalegewo wambeela vipaddusiwe elabo ofiyedha peeno. Teto kadhidha dhiireya dila emohi. 22Malaboya yaheere ehivuguliwa, kalivo muthu naari mmohi aavulumusiwe. Mbwenye malaboya ehivuguliwa mwaha wa athu yaasakuliiye. 23Vano muthu owaaddelani, eera: <Moone! Kirixtu ole aroromelihiwe oli va!> naari eera: <Ole oli wule!> kamurumeedhe. 24Ginawogela ela vowi eneere okumelela athu ajinji ooratha, eneerege: <Nili Kirixtu ole aroromelihiwe> ni anamavuhulela ajinji ooratha. Makuru meenddi ala eneerege waanyengetha athu, yiiragana dhitoonyihedho ni dhootikiniha dhuulubale, mowindo eneerege oxixa wi dhaandeyaga, yanyengethege ni oosakuliweene a Mulugu. 25Mvuruwane, miyo ginowuwaaddelani dhedhi dhihinapadduwe.

26<<Mowindo yeera: <Kirixtu ole aroromelihiwe, oli okokolani!> kamuyewo; naari yeera: <Oli muwari mwa nyuba>, kamurumeedhe. 27Mwaha wowi wona mwemo ozherima onakuma onakumela nduwa wooneyele ofiyedha omadhowelo wa nduwa, odha wa Mwaana a Muthu onadha wiireyege ndo. 28Wewo onakale muruthu funaatugamane mbidha.

29<<Mowaaguva yavira masooso a malabo alene,

<nduwa nnoodha nribe,

mweeri kunaamoneyege,

ttendderi dhinoodha dhimorewo odhulu,

kopolo dha odhulu dhinoodha dhithikeye> # 24.29 Ezaya 13.10; 34.4. .

30<<Vano odhulu onoodha wooneye etoonyihedho ya Mwaana a Muthu, malogo maatene a vati enoodha ekubanyege emoonaga Mwaana a Muthu adhaaga mmiraboni dha odhulu ni owodha ni nthithimiho nookwaranya. 31Oliye oneere waaruma angero aaye ni oruma wuulubale wa palaza wi yaatugumanye oosakuliwa a Mulugu a elabo yaatene, dhipaddi nnayi dha mmagomelo mwa elabo ya vati ni ya odhulu.

32<<Musuuze dhinasuuziha namutaambwi,#24.32 Naari wi: namutaambu. moonaga mijindda dhiwa dhambeelaga ofeewa, mataakuru epwedheyaga, nyo munonona wi elimwe ehaaddamela. 33Mwa mukalelo mmohive nyo mwadha moona dhego dhaatedhene dhedhi munone wi Mwaana a Muthu ohaaddamela, oli vamulagovene. 34Ebaribareene ginowuwaaddelani wi nlogo ndda kannamale, dhihinapadduwe dhaatedhene nda. 35Elabo ya vati ni odhulu dhinoodha dhimale, mbwenye madhu aaga kidha emala.

36<<Mbwenye dha nlabo nddo ni mudhidhiya kalivo ononile, naari angero a odhulu kinonile, naari Mwaana kanonile, ononile di Babe baahi. 37Dhapadduwile malabo a Nowe#24.37 Wambeela 6.5-8. teto sinapadduwe odha wa Mwaana a Muthu. 38Mudhidhi olene ehinafiye malabo a mutokora athu yooja, yoong'wa, yootela ni oteliwa, ofiyedha nlabo navolowile Nowe mmwanddeyani mulubale. 39Kayanonelemo yego ofiyedha ofiya mutokora,#24.39 Wambeela 7.6-24. waadhowiha aatene. Dhinadha dhiireyege ndo odha wa Mwaana a Muthu. 40Mudhidhi olene alobwana abiili enoodha ekale vamudda, mmohi athukuliwegevo, mmohiwa ahiyiwege. 41Ahiyana abiili enoodha elabege vasiloni, mmohi athukuliwegevo, ahiyiwegevo mmohiwa.

42<<Mowindo eng'anelani mwaha wi kamunonile nlabo nnadha Nabwiya eenyu. 43Mwiiwe teto ela, mwiinya a vaade ahaanonege mudhidhi onadha mbava, eerege wiing'anela, kaahiyege wi nyuba yaaye ekupuliwe. 44Mowindo nyo mwiisasanyedhe, vowi mudhidhi ohunoobuweleliinyu, Mwaana a Muthu fineeriiye adhe.

45<<Vano oli mwiimeleli oororomeleya, oowaraala baani? Kahuwo ole athomiwe ni nabwiye okala pogo a amwiimeleli akwaaye wi aagawelege dhooja mudhidhiya waakwana? 46Ooreelihiwa di mwiimeleli oyene nabwiye adhaaga onamfwanyiiye eeragana ndo. 47Ebaribareene ginowuwaaddelani wi nabwiye onomwiira musadoro a dhookalana dhaaye dhaatedhene. 48Mbwenye mwiimeleli ole akala ootakala, onoobuwelela mmurimani mwaaye, eeraga: <Nabwiya aaga onoribeliwa>, 49ambeela waaddwadha amwiimeleli akwaaye, ajaga ni ong'wa ni athu oolezela. 50Nabwiya a mwiimeleli ole onoodha afiye nlabo nihinajejihiiye, naari wora ehinoniliiye. 51Oneere omooniha goyi vajinji, amudhowihe mburo mmohive ni aliba onyengetha, wewo onaakale wuundda ni otakuna meeno>>.

Currently Selected:

Matewuzhi 24: tke

Highlight

Copy

Compare