Matewuzhi 23

Yesu onokona onyengetha wa aFarizi ni anamasuuziha a Malamulo

(Maruku 12.38-40; Luka 11.37-52; 20.45-47)

1Nuwindo, Yesu ahiwogaga ni anamwinji ni anamasuuza aaye, wiira: 2<<Anamasuuziha a Malamulo ni aFarizi binna othongi wootapulela Malamulo a Mozezi. 3Mwiiregena ni ologolela dhaatedhene dhinosuuzihiisuni, mbwenye kamuharege dhowiira dheewa, vowi aliwa kineerana dhinasuuzihiisu. 4Enomaga sapo dhoonyemela#23.4 Enofwanyeya madhu owi: Enomaga sapo dhoonyemela dhoorusa othukula elebiwe mu dhoolebiwa ni madada dhimohi dhixa. Mbwenye anamasuuza ajinji enoobuwela wi dhoorusa othukula madhu ala kiyalebiwe ni murumiwi Matewuzhi. ohela mmafuddini mwa athu; mbwenye aliwa naari ni embuno emohi kinafuna ovenyihana.

5<<Enahidda mabasa eewa maatene wi yooniwege ni athu, enowiimagelela dhitoonyihedho dhuulubale dhoolebiwa epaddi emohi ya madhu a Mulugu vakoveni ni vamoononi. Enolapiha mijeba dha mikanjo dheewa. 6Enodhiveliwa okaraati mburo dhowambeela mmathangani ni mu nyuba dha matugumano.#23.6 Nyuba dha matugumano Nda mu ewogelo ya eGerego dheeriwa sinagoga. Mabasa eewa kayaali oolobelamoove, naari osuuzamo Malamulo, mbwenye teto yowaathongamo athu yahaaharihamo Malamulo a aZhudewu. Moone teto verisikulu 34. 7Enodhiveliwa olojeliwa ni nriiho mburo dhowooneya, enodhiveliwa wiithaniwa <anamasuuziha>.#23.7 AnamasuuzihaMu ewogelo ya eHeberi ndhu nddi nneeriwa raabi.

8<<Nyo kamwiiriwege <anamasuuziha>, mwaha wi namasuuziha eenyu oli mmohi baahi, nyo mwaatene muli addibila. 9Elabo ya vati kammwiithanege muthu babiinyu, mwaha wi oliwo babiinyu mmohi baahi, ole oli odhulu. 10Naari kamwiiriwege <anamatapulela>, mwaha wi Namatapulela eenyu oli mmohi, di Kirixtu.#23.10 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. 11Ookwaranya vaari veenyu akale mwiimeleli eenyu. 12Muthu oneegweliha, dinayevihiwa; ole oneeyeviha, dinagwelihiwa.

13<<Ooddilu di nyo, anamasuuziha a Malamulo, ni nyo aFarizi, nyoovo muli anamanyengetha! Munafugelela ddi Omwene wa Odhulu vameentoni va athu? Nyo kamunavolowa, teto kamunaahiya athu enafuna ovolowa wi evolowe.#23.13 Enofwanyeya verisikulu 14 eneera: Ooddilu di nyo anamasuuziha a Malamulo, ni nyo aFarizi, nyoovo muli anamanyengetha! Munovolowa nyuba dha amaamukwele a ahiyana mwawaakaga dhookalana dheewa, munowiirihedha malobelo oolapa wi mwiiriwege owogoowa. Mwahaya buuyene munaalagiweliinyu moohuhiyedhedha! elebiwe mu dhoolebiwa ni madada dhimohi dhixa. Mbwenye anamasuuza ajinji enoobuwela wi madhu ala kiyalebiwe ni murumiwi Matewuzhi. Moone Maruku 12.40 ni Luka 20.47.

15<<Ooddilu di nyo anamasuuziha a Malamulo, ni nyo aFarizi, nyoovo muli anamanyengetha! Vowi nyo munowapeela nyaza ni odewene mmusayelaga muthu oomutthwarusa, vano mwamutthwarusa, munamwiira oliye wona oofwaneelela omunddoni woohuthima dila biili wuukwaranyani nyo.

16<<Ooddilu di nyo anameeddiha oohoona munawoga mwiiraga: <Muthu alibela nyuba ya Mulugu eyo kahuwo yego, mbwenye muthu alibela oro a nyuba ya Mulugu onowaddihedhiwa eerena elibeliiye>. 17Nyo athu oolodhowa ni oohoona, yuulubale siivi, oro ole naari nyuba ya Mulugu eyo eneeliha oro? 18Muneera: <Muthu alibela ebuwa kahuwo yego, mbwenye onalibela yooveleela eli veebuwani, onowaddihedhiwa wiirana mwaha woolibela>. 19Nyo muli ohoona baahi! Yuulubale siivi, yooveleela naari ebuwa eneeliha dhooveleela? 20Ndala onalibelela ebuwa, onalibelela ebuwa eyo teto ni dhaatedhene dhili veebuwanivo. 21Onalibelela nyuba ya Mulugu, onalibelela nyuba eyo teto ni oyene onakala mwemo. 22Onalibelela odhulu, onalibela mpanddo wa Mulugu ni oleya okaraatile vampanddoni viwa.

23<<Ooddilu di nyo, anamasuuziha a Malamulo, ni nyo aFarizi, nyo muli anamanyengetha! Munoveleela ya neekumi ya mataakuru oonukwela ni bewu dhoowomiha dhooja, mbwenye kamunapwatha magano maatene oofuneya a Malamulo a Mulugu: wogoowa, thagaraga ni ororomeleya wa Mulugu. Soofuneya mwiiregena nda, muhuvenyihagavo Malamulo mamohiiwa. 24Anameeddiha oohoona, munocicitha embu mwa dhoong'wa dheenyu, mbwenye munommira kamelo!#23.24 Kamelo aali mwaneenyama mulubale athukula dhoobo.

25<<Ooddilu di nyo, anamasuuziha a Malamulo, ni nyo aFarizi, nyo muli anamanyengetha! Munahuwa ode wa kopo ni wa muziwo, mbwenye muwari mweenyu mugali moobuwelelo owaaka ni a nrima. 26Nyo aFarizi oohoonawo, vowambeela mweelihe muwari mwa kopo wi ode wiwa teto okale woweela.

27<<Ooddilu di nyo anamasuuziha a Malamulo ni nyo aFarizi, nyo muli anamanyengetha! Munaligana ni masiye oosuluwiwa ni ddowa, enooniha oriya ode wiwa mbwenye muwari mwiwa mugali makuva a anookwa ni dhoovudda dhaatedhene! 28Nyo teto ode munooneya wona ooharihamo efunelo ya Mulugu vameentoni va athu, mbwenye muwari mweenyu muli dhoonyengetha ni dhootakala.

29<<Ooddilu di nyo, anamasuuziha a Malamulo, ni nyo aFarizi, nyo muli anamanyengetha! Munamaga pama masiye a anamavuhulela, muwomihedhaga ni mabwe masiye a athu owogoowa, mwiiraga: 30<Nahaakalewo mudhidhi wa makolo eehu kanaarumeedhele dhowaapa anamavuhulela ayo>. 31Nyo weekiinyu munorumeedhela wi muli ahima a ale yaapile anamavuhulela. 32Mowindo marihani mabasa yambeele makolo eenyu!

33<<Nyo muli nyowa, mulogo wa dhivili! Munaavulumusiwe addi othongiwa wa omunddoni woohuthima? 34Vano mwiiwe, miyo ginowuurumihedhani anamavuhulela, atthottho ni anamasuuziha. Amohi muneere waapa waakomela vamuraddini, amohiwa mwaawaxulege mu nyuba dheenyu dha matugumano, mwaaharaharege nluwa ni nluwa. 35Mowindo Mulugu oneere wuuthongani mwaha wowaapa athu yahanna muladdu vati va elabo, wambeela mwazi wa Abeli aali muthu owogoowa, ofiyedha mwazi wa Zakariya mwaana a Barakiya ampeliinyu vathaddo va nyuba ya Mulugu, vaari ni vaari va mburo woweela ni ebuwa. 36Ebaribareene ginowuwaaddelani wi dhaatedhene dhedhi dhinowadheela athu a mudhidhi ola.

37<<Zheruzalemi, Zheruzalemi we, onaapa anamavuhulela, waavonyaga ni mabwe ale enarumihedhiwiiwe, aa! Dila ngaasi gifunaga waatugumanya anaawo wona mwanaku onaatugumanya anaaye mmompeloni mwaaye, mbwenye we kawafunile! 38Vuruwanani, nyuba yeenyu ela enoodha esadduwe nddebe. 39Ginowuwaaddelani wi wambeela peeno kamudha mugoona ofiyedha mudhe mwiire: <Ooreelihiwa di ole onadha mundina na Nabwiya>#23.39 Masaalimu 118.26.>>.

Currently Selected:

Matewuzhi 23: tke

Highlight

Copy

Compare