Matewuzhi 22

Musibe wa mathanga a matelo

(Luka 14.15-24)

1Yesu ahiwelelaga owoga mwa misibe, eeraga: 2<<Omwene wa Odhulu oli wona mwene asasanyilege mathanga a matelo a mwaanaye. 3Ahaarumaga amwiimeleli wi yawaaddele owiithaneliwa mathanga, mbwenye aliwa kayafunilege odha.

4<<Ahaarumaga amwiimeleli amohiwa ni malamulo owi: <Mwawaaddele owiithaneliwa mathanga wi gihimala osasanyedha dhaatedhene, gihipa ng'ombe ni aneenyama amohi ooruva, dhaatedhene dhihaakwanela. Mudhe omathangani a matelo!>

5<<Aliwa kayapwathilege, kadda muthu oovenyagavo, mmohi agele omudda waaye, mmohiwa ahidhowaga onagoosoni waaye, 6amohiwa yahalilege yahaahiddaga amwiimeleli ale yahawoonihaga goyi, vano waapa. 7Mwene ahitakaleliwaga, waaruma anyakoddo wi yaape mapanga ale, epahe nluwa neewa.

8<<Vano ahawaaddelaga amwiimeleli aaye, wiira: <Mathanga ehaakwanela, mbwenye aliba wiithaniwa kayaali oofwaneelela. 9Dhowani mmakulugano mwa dila, mwamwiithanele mathanga muthu oli aatene onamfwanyiinyu>. 10Amwiimeleli ale egadhowile mmandila yahaatugumanyaga aatene yaafwanyigiisu, apama ni abureene, ofiyedha nyuba moojela mathanga odhaala ni owiithaniwa.

11<<Vano mwene agavolowile wi awoone owiithaniwa yaaligi vameeza, vevale ahimoonaga mulobwana mmohi ahannaga yoowara ya vamathangani. 12Ahimukohaga, wiira: <Mukwaaga, ovolowile addi muno ohuwarile yoowara ya vamathangani?> Oliye kannaga yoowoga.

13<<Vano mwene ahaalamulaga amwiimeleli aaye, wiira: <Mmageni madada ni manyalo, mumvokedhe ode oyiihini, wewo onaakale wuundda ni otakuna meeno>.

14<<Vowi ajinji enowiithaniwa, mbwenye oosakuliwa booyeva>>.

Opeleka musoko wa Sezari

(Maruku 12.13-17; Luka 20.20-26)

15AFarizi egavenyilevo yahitugumanaga opanganelaga mukalelo woomuwaga muwano Yesu. 16Yahaarumaga anamasuuza eewa amohi ni a nikuru na Heroddi wi yamwaaddele, yeere: <<Namasuuziha, nihinona wi nyo munowoga ebaribari, munosuuziha pama madhu a Mulugu, mooligana ni ebaribari. Teto kamuneelenga wi munawoga naani, mwaha wi kamuneeng'ana mukalelo wa muthu. 17Kanaaddeleni, munoona avi? Enofwaneelela opeleka musoko wa Sezari naari kinafwaneelela?>>

18Yesu aganonile ogongomwa weewa ahaakulaga, wiira: <<Munageehela ddi, nyo anamanyengetha? 19Kagooniheni korowa enaliviwa musoko>>. Yahidhaagana korowa emohi ya parata.#22.19 Naari wi: denariyo. Denariyo yaali korowa yawale ya parata ya oRoma mutheengo waliveliwa namalaba alaba nlabo nimohi. 20Oliye ahaakohaga, wiira: <<Nifwanafwaniho nlivo thawani? Ki ndina nilebiwevo thawani?>>

21Yahimwaakulaga, wiira: <<Dha Sezari>>. Vano ahawiirelaga: <<Mumvahege Sezari eli ya Sezari; mumvahege Mulugu eli ya Mulugu>>.

22Egeewile nde yahitikinaga. Vano omwihiya Yesu, odhowaga.

Ovenyihiwa muukwani

(Maruku 12.18-27; Luka 20.27-40)

23Nlabo nendde aSaduseyi yahimwaaddamelaga Yesu. Aliwa enowoga wi kawuli ovenyihiwa muukwani, mwaha wa ela yahimukohaga, wiira: 24<<Namasuuziha, Mozezi ahiira: <Mulobwana akwa ahinna ahima, ddibile amutelege maamukweleya wi ambalele ahima ddibile ole yeelengiwege ahima a mwanookwa>.#22.24 Deteronomiyo 25.5. 25Vano wahikala addibila atanu ni abiili. Owambeela agatelile ahikwa, ahimwihiyile mwaana, vano ddibile omutela maamukweleya. 26Dhahiireya ndo ni ddibila a nabiili ni a neethaaru, ofiyedha ddibila a neetanu ni abiili. 27Dhigeereye ndo teto omagomihedhowa mwihiyana ole okwa. 28Ki nlabo na ovenyihiwa muukwani, mwihiyana ole onadha eeriwege mwadha wani, vowi atanu ni abiili ale yahimutela?>>

29Yesu ahawaakulaga, wiira: <<Munaviriganihela mwaha wa ohunonelamo Maleba Ootaleleya naari owodha wa Mulugu. 30Vowi nlabo noovenyihiwa muukwani kalivo onaatelege naari oteliwa, athu enakalege wona angero a odhulu. 31Nawogaga dha omavenyihiwelo muukwani kamweelengile dhiwogile Mulugu mwiinyeene, eeraga: 32<Miyo gili Mulugu a Abarahamu, Mulugu a Ezaaki ni Mulugu a Yakobo>?#22.32 Okuma 3.6. Mulugu kahuwo Mulugu a athu ookwa, di Mulugu a athu ookalawo>>.

33Egeewile nde anamwinji yahitikinaga ni dhoosuuziha dhaaye.

Nlamulo noofuneya

(Maruku 12.28-34; Luka 10.27)

34Vano aFarizi veewiligiiwa wi Yesu ohuvaanya dhowaakula dha aSaduseyi dhaatedhene, yahitugumanaga. 35Mmohi mwa aliwa, namatapulela a Malamulo, moomweeha ahimukohaga, wiira: 36<<Namasuuziha, mwa Malamulo maatene, nuulubale thiivi?>>

37Yesu ahimwaakulaga, wiira: << <Omudhivelege Nabwiya Mulugu aawo ni murima waawo waatene, ni egumi yaawo yaatene, ni wiiwelelamo waawo waatewene>.#22.37 Deteronomiyo 6.5. 38Ndda thi nlamulo noofuneya teto nowambeela. 39Na nabiili nnoligana ni nenddi: <Omudhivelege mwaaddamani aawo wona muneedhiveliiwe>.#22.39 Levitiku 19.18. 40Mwa malamulo meenddi ala fumageyile Malamulo maatene ni Anamavuhulela>>.

Kirixtu di Nabwiya a Davidi

(Maruku 12.35-37; Luka 20.41-44)

41AFarizi egatugumaneve, Yesu ahaakohaga, wiira: 42<<Munoobuwelela avi dha Kirixtu?#22.42 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. Di mwaana wani?>>

Yahimwaakulaga, wiira: <<Mwaana a Davidi#22.42 Mwaana a Davidi Ndda naali ndina nimohi na Misiya nanoniwiiyena ni aZhudewu.>>.

43Yesu ahaakohaga, wiira: <<Ki mwaha bwaddi Davidi awogile odheela mwa Muneba Woweela amwiithanaga <Nabwiya>, eeraga:

44 <Nabwiya Mulugu ohuwoga wa Nabwiya aaga:

<<Okaraati omoononi waaga wooja

ofiyedha gaahele amwiiddani aawo

vati va manyalo aawo>> >? # 22.44 Masaalimu 110.1.

45Akala Davidi onamwiira <Nabwiya>, onaakale addi mwaanaye?>> 46Mowindo kaalivo aandile omwaakula, naari ndhu nimohi. Okuma vevale, odhowa osogolo, kaalivo aliba murima wi amukohege yego.

Currently Selected:

Matewuzhi 22: tke

Highlight

Copy

Compare