Matewuzhi 21

Yesu onovolowa muZheruzalemi ni ovuwa

(Maruku 11.1-11; Luka 19.28-40; Zhuwawu 12.12-19)

1Yaaddamelaga oZheruzalemi, yahifiyaga oBetifazhe, va Mwaango wa Olivera, Yesu ahaarumaga anamasuuza aaye abiili, 2wawaaddela, wiira: <<Dhowani mudhi onooniinyu ole, mowaaguva munomfwanya buuru ni mwaanaye egamageleliwe. Mwaatapule, mwaadhena wa miyo. 3Akalavo onookoheni, mmwaakule, mwiire: <Nabwiya dinaafuna>. Vano oliye oneere wuwinkani mowaaguva>>.

4Vano nda dheereyele wi dhaakwanele dhawogile namavuhulela dhowi:

5 <<Mwawaaddele athu a oZiyoni:#21.5 Ziyoni naali ndina nimohi na Zheruzalemi.

<Keeng'anani, onoodha mwene eenyu,

owiiyeviha, agagwelile vabuuruni,

vamwaana a buuru, oomfuwa oothukula dhoobo> >>. # 21.5 Ezaya 62.11; Zakariya 9.9.

6Anamasuuza egadhowile yahiiragana dhaaddeliwigiisu. 7Yahimudhaagana buuru ni mwaanaye, otadeela dhoowara dheewa vamutanani va abuuru, Yesu okaraati vadhuluviwa. 8Athu ajinji yootadeelaga dhoowara dheewa murampani, amohiwa yookotholaga mijindda dha mithanko otadeelaga murampani. 9Vano anamwinji, ale yadhowaga osogolo ni ale yadhaaga mundduli, yookuwaga, yiiraga:

<<Hozana,#21.9 Hozana mu ewogelo ya eHeberi enatapulela Nabwiya nivulumuseni. Moone teto verisikulu 15. Mwaana a Davidi!#21.9 Mwaana a Davidi Ndda naali ndina nimohi na Misiya nanoniwiiyena ni aZhudewu. Moone teto verisikulu 15.>>

<<Ooreelihiwa di oyene onadha mu ndina na Nabwiya!>> # 21.9 Masaalimu 118.26.

<<Hozana mudhulu-dhulu!>>

10Agavolowile muZheruzalemi nluwa naatenene nahithikeyaga, athu yookohanaga, yiiraga: <<Olaya baani?>>

11Anamwinji yookuwaga, yiiraga: <<Ola di namavuhulela Yesu, a oNazarethi a oGalileya>>.

Yesu onoweeliha nyuba ya Mulugu

(Maruku 11.15-19; Luka 19.45-48)

12Yesu agafiyile vathaddo va nyuba ya Mulugu ahaathamagihagavo athu aatene yagulihagavo ni oogula. Ahaabidhulaga meeza a athu oocenja korowa teto ahibidhulaga dhittengu dha anamaguliha kangayiwa. 13Ahawaaddelaga, wiira: <<Dhilebiwe ndala: <Nyuba yaaga eneethaniwege nyuba ya matugumano a malobelo>.#21.13 Ezaya 56.7. Mbwenye nyo muhusaddula okala <nikungu na ambava>#21.13 Zheremiya 7.11.>>.

14Agali vathaddo va nyuba ya Mulugu, yahidhaaga wa oliye oohoona, ooragala; oliye waayiliha. 15Mbwenye apogo a anamakutha ni anamasuuziha a Malamulo yahitakaleliwaga egoonile dhootikiniha nde Yesu dheeriligiiye, vowawiiwa ahima ekuwaga mu nyuba ya Mulugu yiiraga: <<Hozana wa Mwaana a Davidi!>> 16Apogo ni anamasuuziha ale yahimunyanyuwelaga, wiira: <<Onowawiiwa ala dhinawogiiwa?>> Yesu ahawaakulaga, wiira: <<Ee, kamuneelengege dhowi:

<Muwano mwa ahima ang'onong'ono

ni mwa manyenya muhusasanyedhamo wi

mukumege matamaalelo eenyu>?>> # 21.16 Masaalimu 8.2.

17Ahaahiyaga, ovenyamo muluwani mule, odhowaga oBetaniya, nluwa ning'onong'ono wavireliwigiiye mahiyu maatene.

Yesu onodduba mfigera#21.18-22 Mfigera bu muthanko onavaha furuuta dhooligana ni furuuta dha namutaambwi.

(Maruku 11.20-25)

18Yesu bebeheene awelagawo oluwani ahikalagana dala. 19Agoonile muthanko wa mfigera (onaligana ni namutaambwi) waaddamela mundila ahaaddamelagavo, mbwenye kaafwanyilegemo yego, afwanyilegemo mataakuruve baahi. Vevale ahiwogaga ni muthanko ole, wiira: <<Muthanko we, wambeela peeno kudha ovahave yego!>> Mudhidhi olene mfigera ole wahummaga.

20Anamasuuza egoonile nde yahitikinaga, wiira: <<Mfigera ola wummile addi mowaaguva!>>

21Vevale Yesu ahawaakulaga, wiira: <<Ebaribareene ginowuwaaddelani wi mwakanna nroromelo muhaanganyedhaga kamuneerena dhedhive dhimwiirimina namutaambwi ola. Mbwenye nyo mweerela mwaango ola: <Venyavo, weevokedhe munyaza>, dhineerege wiireya wona munawogeliinyu. 22Teto dhaatedhene dhinaalobigiinyu mwa nlobelo muroromelaga, muneerege waakela>>.

Yesu onokohiwa dha owodha waaye

(Maruku 11.27-33; Luka 20.1-8)

23Yesu agafiyile nyuba ya Mulugu asuuzihaga, apogo a anamakutha ni apogo a nlogo yahimwaaddamelaga omukoha, wiira: <<Onaaddele, owodha baani oneeriiwena dhego dhi? Wuuvahile owodhawo baani?>>

24Yesu ahawaakulaga, wiira: <<Miyo teto ginowuukohani yego emohi, mwagaakula ginowuwaaddelani odhiliimina owodha oneeriimina dhego dhi. 25Amvahile Zhuwawu Namabathiza owodha wi abathizege baani? Aali Mulugu, naari yaali athu?>> Vano yoovaanyihanaga mmohi ni mukwaaye yiiraga: <<Neera wadhiile wa Mulugu, onowiira ki mudhe muhumurumeedhege oliye. 26Teto neera wadhiile wa athu, nnowoova nlogo, vowi athu aatene yahiroromela wi Zhuwawu aali namavuhulela>>.

27Yahimwaakulaga Yesu, wiira: <<Kannonile>>. Oliye teto ahawaakulaga, wiira: <<Naari miyo teto kaginowaaddelani okumile owodha oneeriimina dhedhi>>.

Musibe wa ahima abiili

28<<Ki munoobuwela avi? Mulobwana mmohi ahikanna anaaye abiili. Ahidhowaga wa owambeela obaliwa, wiira: <Mwaanaga, odhowe peeno walabe omudda wa uuva>.

29<<Oliye ahaakulaga, wiira: <Kaginadhowawo>. Nuwindo, ahuubuwelelaga, otthwaruwa, odhowawo.

30<<Baabi ole ahidhowaga wa a nabiili owoga emodha-modhave. Oliye waakula, wiira: <Ginoyawo, nabwiya!> Nuwindo, kaagelewo.

31<<Mwa ala abiili eerilena ofuna wa ababe duuvi?>>

Yahimwaakulaga, wiira: <<Owambeela>>.

Yesu ahawaaddelaga, wiira: <<Ebaribareene ginowuwaaddelani wi anamakoha-musoko ni ajeberuwe enovolowa muuMweneni wa Mulugu yuuhiyagani mundduli. 32Mwaha wi Zhuwawu Namabathiza ahidha wa nyo owoonihagani dila yowogoowa, kamwamuroromele, mbwenye anamakoha-musoko ni ajeberuwe yahimuroromela. Nyo naari mugoonileve dhedho kamwatthwaruwile wi mmuroromele oliye.

Musibe wa anamalima abure

(Maruku 12.1-12; Luka 20.9-19)

33<<Vuruwanani musibe mmohiwa. Wahikala mulobwana mmohi alimile mudda wa uuva. Ahaapeeleliha cinga, osasanyamo moovoddela uuva, omaga sanja yowiing'anela. Nuwindo, mudda ole ahibolihiha wa anamalima amohi. Ageere ndo ahivenyagamo mwiilaboni mule. 34Ogafiyile mudhidhi woohadda muliba mudda ahaarumaga amwiimeleli aaye wa anamalima ale wi yathukule dhoovaha dhafunigiiye.

35<<Anamalima yahaahiddaga amwiimeleli ale; mmohi omuddwadha, mmohiwa ompa, oogomihedha omvonya ni mabwe. 36Muliba mudda ahaarumagawo amwiimeleli amohi ajinji waakwaranya owambeela, wawiirela emodha-modhave. 37Voogomihedha ahimurumihagawo mwaana aaye-aaye, eeraga: <Ola oli mwaanaga, eneere omuriiha>.

38<<Mbwenye anamalima egamoonile mwaanaya, yahaaddelanaga mmohi ni mukwaaye, yiiraga: <Ola di namahalana mudda, nimpe wi nihalena mureeleloya>. 39Yahimwihiddaga, omvokedha ode wa mudda, ompa.

40<<Ki muliba mudda ole adhaaga onawiirena avi anamalima ale?>>

41Yahimwaakulaga, wiira: <<Onoodha aape mowaarabuliha mapanga ale, muddaya aabolihihe athu amohi, enaaveleelege dhoovaha va mudhidhiya>>.

42Yesu ahaakohaga, wiira: <<Kamuneelengege ndo mMalebani Ootaleleya?

<Nibwe nenddo nakooddile anamamaga nyuba,

ndda nihisadduwa okala nibwe noohiddeela nyuba

Nabwiya deerilena dhedhi,

dhili dhootikiniha vameentoni veehu> >>. # 21.42 Masaalimu 118.22-23.

43<<Mowindo ginowuwaaddelani wi Omwene wa Mulugu muneere waakiwa, ovahiwe nlogo nimohi nnavahege dhoovaha dha Omwene wa Mulugu. 44Olene onatongwele nibwe nddi onogwaddanyeya, ole nnammoreliiwa nibwe nddi onoosileya>>.#21.44 Verisikulu ela kinafwanyeya egalebiwe mu dhoolebiwa ni madada dhinjinji.

45Apogo a anamakutha ni aFarizi egeewile madhu ale, yahiiwelelagamo wi aawogaga aliwa. 46Mowindo yoosayelaga omwihidda, mbwenye yowawoovaga anamwinji vowi athu yoororomela wi Yesu aali namavuhulela.

Currently Selected:

Matewuzhi 21: tke

Highlight

Copy

Compare