Matewuzhi 19

Yesu onowoga dha omwalana

(Maruku 10.1-12)

1Yesu agamalile owoga madhu alena, ahimaruwaga oGalileya, odhowaga murudda wa oZhudeya olabuwela kobela emohi ya mwihinje Zhordawu. 2Anamwinji yahimuharaga, oliye owaayilihaga wewule.

3AFarizi amohi yahimwaaddamelaga, omukohaga moomweeha wi emfwanyena mwaha, wiira: <<Nlamulo nnorumeedhiha wi mulobwana amwalane ni mwihiyanaaye va mwaha oli waatene?>>

4Oliye ahawaakulaga, wiira: <<Kamuneelenge Maleba Ootaleleya wi omambeelelo Mpaddusi ampaddusile mulobwana ni mwihiyana?#19.4 Wambeela 1.27. 5Mulugu ahiwoga, wiira: <Mwaha wa ela mulobwana oneerege omwihiya babe ni amaaye ataganyihedhane ni mwihiyanaaye, abiili ala enakala mwiili mmohive>.#19.5 Wambeela 2.24. 6Vowi kinakala athu abiili, enakala mwiili mmohive. Mowindo ele Mulugu egumanihiliiye, muthu kamwalanihe>>.

7AFarizi yahimukohaga, wiira: <<Ki mwaha bwaddi Mozezi alamule wi nivahege kaarata yoomwalana ni omwiigara?>>

8Yesu ahawaakulaga, wiira: <<Mozezi ahirumeedha omwalana mwaha wa ovaadda mirima dheenyu, mbwenye vowambeela kadhaali ndo. 9Vano miyo ginowuwaaddelani wi oyene onamwalana ni mwihiyanaaye, vihili mwaha wa oraruwa, amutela mmohi, onooraruwana>>.#19.9 Enofwanyeya madhu owi: oyene onamwalana ni mwihiyanaaye, vihili mwaha wa oraruwa, amutela mmohi, onooraruwana, teto onamutele oohiyiwa ole ni oliyeene onooraruwana elebiwe mu dhoolebiwa ni madada dhimohi dhixa. Mbwenye anamasuuza ajinji enoobuwela wi teto onamutele oohiyiwa ole ni oliyeene onooraruwana madhu ala kiyalebiwe ni murumiwi Matewuzhi.

10Anamasuuza aaye yahiiraga: <<Akala dhinakala ndo vaari va mulobwana ni mwihiyanaaye dhili pama ohutela>>.

11Yesu ahawaakulaga, wiira: <<Kahuwo athu aatene enaanda waakela mutheenga ola mbwenye aleneve evahiwe ni Mulugu. 12Ehikalawo ehinatela mwaha wi ebaliwe ookuvuweene; okalawo amohi ehinatela mwaha wi yiire ofuuliwa ni athu amohi; ehikalawo amohi yiikooddihe otela weekiiwa mwaha wa Omwene wa Odhulu. Ole onaanda waakela aakele>>.

Yesu onowareeliha ahima

(Maruku 10.13-16; Luka 18.15-17)

13Nuwindo, yahaadhaagana ahima wa oliye wi aahele madada, aalobelele wi aareelihe, mbwenye anamasuuza yowaahiihaga.

14Yesu ahiiraga: <<Ahiyeni ahima edhe wa miyo, kamwaahiihe, sowi Omwene wa Odhulu bwa athu enaligana ni aliwa>>. 15Vano ahaahelaga madada, wareeliha. Ageere ndo ahivenyawo wewule.

Muzombwe ooreela

(Maruku 10.17-31; Luka 18.18-30)

16Muzombwe mmohiwa ahimwaaddamelaga, omukoha, wiira: <<Namasuuziha, yapama ddi gineeriimi giirena wi gifwanye egumi yoohumala?>>

17Yesu ahimwaakulaga, wiira: <<Mwaha bwaddi onagikohiiwe eli yapama? Apama oliwo mmohive, di Mulugu. Waafunaga ovolowa mu egumi yoohumala ologolele malamulo>>.

18Oliye ahimukohaga, wiira: <<Owi avi?>> Yesu ahimwaakulaga, wiira: <<Kumpe muthu, kuraruwe, kawiiye, kumwiinkedhe mukwaawo, 19waariihege ababo ni amaayo>>,#19.19 Okuma 20.12-16; Deteronomiyo 5.16-20. teto <<omudhivelege mwaaddamani aawo wona oneedhiveleliiwe>>.#19.19 Levitiku 19.18.

20Muzombwe ole ahaakulaga, wiira: <<Dhaatedhene dhedho ginohara. Ki egihalile ddi?>>

21Yesu ahimwaaddelaga, wiira: <<Waafunaga okala owaakwanela, odhowe wagulihe dhaatedhene dhinniiwena, korowadha waavahe athu oorabula, dhooreela onoodha ofwanye odhulu. Weera ndo, ogiharege>>.

22Muzombwe ole ageewile madhu ale, ahivenyagavo, agali owukuuweene vowi ahikanna dhooreela dhijinji.

23Vano Yesu ahiwogaga ni anamasuuza aaye, wiira: <<Ebaribareene ginowuwaaddelani wi soorusa vajinji athu ooreela ovolowa muuMweneni wa Odhulu. 24Ginowuwaaddelani teto wi eli yookweya kamelo#19.24 Kamelo yaali aneenyama alubale yathukula dhoobo. ovira mookupula mwa singano, ohiyana wi athu ooreela evolowe muuMweneni wa Mulugu>>.

25Anamasuuza egeewile nde yahitikinaga vajinji, yahiiraga: <<Akala dhili ndo, ki onaande ovolowa baani?>>

26Yesu ahaasugwaga, wiira: <<Ndo soohaandeya wa athu, mbwenye ni Mulugu kilivo ehinaandeya>>.

27Vevale Peduru ahiiraga: <<Hiyo nihihiya dhaatedhene, wuuharagani. Nnakanne ddi?>>

28Yesu ahawaakulaga, wiira: <<Ebaribareene ginowuwaaddelani wi Mulugu asasanyedha elabo exa, vano miyo Mwaana a Muthu, gikaraati vampanddoni vaaga va omwene wa nthithimiho, nyo mwagiharile teto muneere okaraati mumpanddoni kumi ni miinddi wi mwaathonge malogo kumi ni meenddi a Ezarayeli. 29Aatene alene ehiyile nyuba dheewa, addibiliwa, arogoriwa, ababiwa, ameewa,#19.29 Enofwanyeya madhu owi: Aatene alene ehiyile nyuba dheewa, addibiliwa, arogoriwa, ababiwa, ameewa, naari ahiyaniiwa, naari yaahiye ahima eewa…elebiwe mu dhoolebiwa ni madada dhimohi dhixa. Mbwenye anamasuuza ajinji enoobuwela wi naari ahiyaniiwa madhu ala kiyalebiwe ni murumiwi Matewuzhi. naari yaahiye ahima eewa, naari midda dheewa, mwaha wa ndina naaga, enowaakela dila zana okwaranya dhihiyiliiwa teto enowaakela egumi yoohumala. 30Vowi athu ajinji eli owambeela enoodha ekale oogomihedha, ale eli oogomihedha binaakale owambeela>>.

Currently Selected:

Matewuzhi 19: tke

Highlight

Copy

Compare