Matewuzhi 16

AFarizi ni aSaduseyi enoloba etoonyihedho

(Maruku 8.11-13)

1AFarizi ni aSaduseyi yahimwaaddamelaga Yesu wi emuwage muwano, omuloba wi awoonihe etoonyihedho yootikiniha yookumela odhulu.

2Oliye ahawaakulaga, wiira: <<Wafiya mudhidhi wa ciguwo, munowiira: <Oneere okala mudhidhi wapama mwaha wowi odhulu poofiila>, 3vano bebehi munowiira: <Peeno onokala pevo mwaha wowi odhulu ohukala murabo woofiila ni wooriba>. Muhunona ebaribareene ohiyaniha mukalelo wa odhulu, mbwenye kamunadidela dhitoonyihedho Mulugu dhineeriiyena vaari va nyo dhiinova. 4Nlogo nootakala murima, noohuroromeleya nnaloba etoonyihedho, mbwenye kannavahiwe etoonyihedho emohi ehili etoonyihedho ya Zhonasi>>. Ahaahiyaga, okwaranyavo.

Pole-pole ni emela ya aFarizi ni ya aSaduseyi

(Maruku 8.14-21)

5Vano anamasuuza egafiyile okobela ya nyaza, yahiddiwaalaga othukula mikaathe. 6Yesu ahawiirelaga: <<Pole-pole, muxage ni emela#16.6 Emela yaali etoonyihedho yalabihiwana ni ovaha mukalelo wabure. ya aFarizi ni aSaduseyi>>. 7Aliwa yoowogaga vakaleligiiwa, yiiraga: <<Ndo onawogela mwaha wi kanidhiilena mikaathe>>.

8Yesu aganonile, ahiiraga: <<Munawoga ddi weekiinyu mwiiraga kamwinna mikaathe, athu ooyeva nroromelo? 9Kamuneewelelamoove nivano? Kamunoobuwelela mikaathe mitanu dhajihiwege athu macikwi matanu (5.000)? Kamunoobuwelela middanga mingaasi mwaddoddeliliinyu dhoohaladha? 10Naari mikaathe mitanu ni miinddi, dhajihiwege athu macikwi mannayi (4.000), middanga mingaasi mwaddoddeliliinyu dhoohaladha? 11Ki muhuneewelelamo addi wi kagiwogile dha mikaathe? Mbwenye muxage ni emela ya aFarizi ni aSaduseyi>>. 12Vano yahiiwelelagamo wi kaawogaga wi exage ni emela ya mikaathe, mbwenye ni dhoosuuziha dha aFarizi ni aSaduseyi.

Wiisoriha wa Peduru

(Maruku 8.27-30; Luka 9.18-21)

13Yesu adhowaga dhipaddi dha oSezareya oFilipi, ahaakohaga anamasuuza aaye, wiira: <<Miyo, Mwaana a Muthu, athu enagiira gili aani?>>

14Aliwa yahaakulaga, wiira: <<Amohi eneera muli Zhuwawu Namabathiza; amohi eneera muli Eliyazi; amohiwa eneera muli Zheremiya, naari namavuhulela mmohi>>.

15Vevale Yesu ahaakohaga, wiira: <<Ki nyo, munagiira aani?>>

16Simawu Peduru ahaakulaga, wiira: <<Nyo muli Kirixtu ole aroromelihiwe, Mwaana a Mulugu mugumi>>.#16.16 Kirixtu mu ewogelo ya eGerego enatapulela Muthikitheliwi, Misiya, naari wi Oosakuliwa a Mulugu, oyene onaavulumuse athu.

17Yesu ahimwaaddelaga, wiira: <<We oli ooreelihiwa, Simawu, mwaana a Zhonasi, mwaha wi kahuwo muthu wuwaaddele, mbwenye aBaba eli odhulu buwaaddele. 18Vano miyo ginowuwaaddela wi we oli Peduru,#16.18 Peduru mu ewogelo ya eGerego enatapulela nibwe. va nibwe nddi ginomagavo gerezha yaaga, naari kopolo dha okwa kadhidha dhigonjiha. 19Ginowuuvaha macavi a Omwene wa Odhulu; we dhineeriiwe omagege elabo ya vati, dhineerege omagiwa odhulu; we dhineeriiwe otapulege elabo ya vati, dhineerege otapuliwa odhulu>>. 20Yesu ahaawaraalihaga anamasuuza wi ehidhe emwaaddela muthu wi oliye di Kirixtu ole aroromelihiwe.

Yesu onovuwiha olenddo wowambeela okwa waaye ni ovenyihiwa waaye

(Maruku 8.31 ofiyedha 9.1; Luka 9.22-27)

21Ovenya mudhidhi olene, Yesu ahambeelaga wawooniha anamasuuza aaye wi yaali yoofuneya odhowa oZheruzalemi, arabulihiwe ni dhijinji wa makolo, apogo a anamakutha ni anamasuuziha a Malamulo, apiwe, avenyihiwe muukwani nlabo na neethaaru.

22Vano Peduru ahimwiithanelaga vowi hivale, omwihiiha, wiira: <<Nabwiya, kadhiireye dhedho, Mulugu karumeedhe wi dhiireye>>.

23Mbwenye Yesu ahimurugunuwelaga, wiira: <<Okwaranyevo viliimi va, Sathana! We wa miyo oli nibwe nookwakwathusa. Kunapwatha dha oMulugu, mbwenye onapwatha dha omuthu>>.

24Vano Yesu ahawaaddelaga anamasuuza aaye, wiira: <<Muthu onafuna odha wa miyo eekoodde yeeka, athukule muraddi waaye, agiharege. 25Mowindo onafuna ovulumusa egumi yaaye, onowiirimeeliha; mbwenye ole onarimeeliha egumi yaaye mwaha wa miyo, onoodha afwanye. 26Vano muthu onapura ddi aakela elabo ya vati yaatene, arimeeliha egumi ya ebaribari? Muthu onalive ddi wi oobole egumi yaaye ya ebaribari? 27Vowi Mwaana a Muthu onoodha adhe mu nthithimihoni na aBabe ni angero aaye, amvahe kadda muthu mooligana dhowiira dhaaye. 28Ebaribareene ginowuwaaddelani wi amohi mwa nyo muli veva kamunafiyedhe okwa muhoonile odha wa Mwaana a Muthu muuMweneni waaye>>.

Currently Selected:

Matewuzhi 16: tke

Highlight

Copy

Compare