Matewuzhi 17

Ohiyaniheya wa kove ya Yesu

(Maruku 9.2-13; Luka 9.28-36)

1Egavirile malabo matanu ni nimohi, Yesu ahaathukulelaga ombale Peduru ni addibila abiili yaaligi Tiyago ni Zhuwawu, ayeneve waadhowana mwaango wootaama. 2Ahihiyaniheyaga vameentoni veewa; kove yaaye yoozherimelaga wona nduwa, dhoowara dhaaye dhahisadduwaga okala dhoweela wona waara. 3Mudhidhi olene ahikumelelaga Mozezi ni Eliyazi, owogaga ni oliye.

4Peduru ahiwogaga ni Yesu, wiira: <<Nabwiya, eli pama wi nikale wewuno. Teto mwafuna nnomaga misasa miraaru, mmohi weenyu, mmohi wa Mozezi, mmohiwa wa Eliyazi>>.

5Awogagave ndo wahidhaaga murabo wowaara, wakuneela. Mmuraboni mule mwahikumaga ndhu neeraga: <<Ola di Mwaanaga oodhivela. Mwa oliye ginohagalala. Mumvuruwanege oliye!>>

6Anamasuuza egeewile yahoovaga vajinji, otongwela vati ootadeeleyeene ni kove vati. 7Vevale Yesu ahawaaddamelaga, waakahinya, wiira: <<Venyani, kamoove!>> 8Aliwa egaavenyihile meento kayamoonilege muthu mmohi ahili Yesu.

9Aliwa ekitaga omwaangoni, Yesu ahaalamulaga wi ehimwaaddele muthu mmohi dhooniliiwa ofiyedha Mwaana a Muthu avenyihiwe muukwani.

10Anamasuuza yahimukohaga, wiira: <<Mwaha bwaddi anamasuuziha a Malamulo enawoga, yiiraga: <Soofuneya wi Eliyazi adhe vowambeela?> >>

11Yesu ahawaakulaga, wiira: <<Ebaribareene, Eliyazi onoodha vowambeela asasanyedhe dhego dhaatedhene. 12Miyo guhuwaaddelani wi ebaribareene, Eliyazi ohudha, mbwenye kayamudidele, yahimwiirela dhaatene dhafuniiwa omwiirela. Mwa mukalelo mmohive teto Mwaana a Muthu oneere orabulihiwa ni aliwa>>. 13Vano anamasuuza yahiiwelelagamo wi awogaga dha Zhuwawu Namabathiza.

Yesu onomuyiliha muzombwe oohiddiwa ni muneba wootakala

(Maruku 9.14-32; Luka 9.37-45)

14Egafiyile vaaligi anamwinji mulobwana mmohi ahimwaaddamelaga, okokora, wiira: 15<<Nabwiya, mmweeddiwele thagaraga mwaanaga amulobwana, vowi winna ajilejile, onorabula vajinji, dila dhijinji onomorelesa veeko, mudhidhi mmohi onomorelesa mwinko. 16Gahimudhaagana wa anamasuuza eenyu mbwenye aliwa kayaandilege omuyiliha>>.

17Yesu ahiiraga: <<Nlogo noohukanna nroromelo, nooholowa, ofiyedha alini vineeriimi gikale ni nyo? Ofiyedha alini vineeriimi givilele? Kamudhenaani mwaana oyo>>. 18Yesu ahilamulaga muneba wootakala ole, okumamo mwa mwaana, wambeela mudhidhi olene mwaana ahiyila.

19Vano anamasuuza yahimwaaddamelaga Yesu, omukoha ombale, wiira: <<Mwaha bwaddi hiyo nihaandaga okumihamo muneba wootakala ole?>>

20Oliye ahawaakulaga, wiira: <<Mwaha wooyeva nroromelo neenyu. Ebaribareene ginowuwaaddelani wi mwakanna nroromelo nooligana ni kogolo ya mpeza, muneerege wiirela mwaango ola: <Venya va, odhowe wule>, oneerege wuwiiwelelani. Kavinaakale yego ehinaandigiinyu>>.#17.20 Enofwanyeya verisikulu 21 eneera: Mbwenye muneba wa musawo ola kuneegariwa ndo vihili malobelo ni othuga elebiwe mu dhoolebiwa ni madada dhimohi. Mbwenye anamasuuza ajinji enoobuwela wi madhu ala kiyalebiwe ni murumiwi Matewuzhi.

22Egatugumane oGalileya Yesu ahiiraga: <<Mwaana a Muthu ohalile vang'ono oveleeliwa mmadani mwa athu, 23aliwa eneere ompa, mbwenye va nlabo na neethaaru oneere ovenyihiwa muukwani>>. Vano anamasuuza yahukuuwaga vajinji.

Yesu onopeleka musoko waaye nyuba ya Mulugu

24Egafiyile oKafaranawu, anamakoha-musoko amohi a nyuba ya Mulugu yahidhowaga wa Peduru, omukoha, wiira: <<Namasuuziha eenyu kanapeleka musoko wa nyuba ya Mulugu?>>

25Oliye ahaakulaga, wiira: <<Onopeleka>>. Peduru agavolowile mba ahinawoge, Yesu ahiwogaga wiira: <<Simawu, onoobuwela avi? Mamwene a elabo ela enaakela misoko okumela waani? Onakumela wa aniiwa, naari onakumela wa anaweendda?>>

26Peduru ahaakulaga, wiira: <<Onakumela wa anaweendda>>.

Yesu ahiiraga: <<Mowindo aniiwa ehivenyihiwavo, kinapeleka. 27Mbwenye wi hiyo nihikanne nihidda ni ayo enaakela misoko onyubani ya Mulugu, odhowe munyaza, wameze somba. Enambeeliiwe omeza okanganule muwano mwiwa, onofwanyamo korowa dha gwingwi, othukule, wapeleke musoko waaga ni waawoya>>.

Currently Selected:

Matewuzhi 17: tke

Highlight

Copy

Compare