Matewuzhi 11

Zhuwawu Namabathiza onowaaruma anamasuuza aaye wa Yesu

(Luka 7.18-35)

1Yesu agamalile wawaaddelihamo anamasuuza aaye kumi ni abiili, ahivenyaga wewule, odhowa osuuzihaga, alaleyaga mmaluwani mweewa.#11.1 Mmaluwani mweewa enaagiwana maluwa yaali a aZhudewu.

2Zhuwawu Namabathiza ahiiwaga agali mukaambura dhiwogiwaga dha mabasa a Kirixtu#11.2 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. ole aroromelihiwe, ahaarumaga anamasuuza aaye wi yamukohe wi: 3<<Di nyo ole eeriwa onofiya,#11.3 Ole eeriwa wi onofiya enamwaagana Muthikitheliwi, oyene aZhudewu aatene yamujejihedhiiwa ofiya, Misiya, naari wi Kirixtu. kaahi nimujejihege mmohi?>>

4Yesu ahaakulaga, wiira: <<Dhowani mwamwaaddele Zhuwawu dhedho dhineewiinyu, dhinooniinyu wi: 5Aliba ohoona enowoona, aliba otopinya enoweedda, aliba maredda#11.5 Maredda mu ewogelo ya eGerego kinaagana mareddave mbwenye teto dhiredda dhoohiyana-hiyana dha nikupa na muthu. enoweelihiwa, aliba ohiiwa enowiiwa, anookwa enovenyihiwa, oorabula enolaleyeliwa Muselu Wapama. 6Ooreelihiwa duule ohunakwakwathuwe mwaha wa miyo>>.

7Nuwindo, anamasuuza a Zhuwawu evenyagavowene, Yesu owaakohaga anamwinji mwaha wa Zhuwawu, eeraga: <<Mwadhowile woona ddi mwiiddeddereni? Bango yoothikeya ni pevo? 8Ki vano mwadhowile woona ddi? Muthu oowara guwo dhoofeewa? Moone enawara guwo dhoofeewa enakala mmavade mwa mamwene. 9Ki vano mwadhowile woona ddi? Mwamoona namavuhulela? Ee, miyo ginowuwaaddelani wi oyene onamukwaranya namavuhulela. 10Ola di Zhuwawu Namabathiza oyene awogiwe mMalebani yiiraga:

<Miyo ginomuruma osogolo waawo

murumiwi aaga, oyene

onaasasanyedhege dila vasogolo vaawo>.#11.10 Malakiya 3.1.

11Ebaribareene ginowuwaaddelani wi athu aatene ebaliwe ni mwihiyana kalivo mpogo okumelele omukwaranya Zhuwawu Namabathiza, mbwenye mung'onong'ono muuMweneni wa Odhulu di mulubale omukwaranya oyene. 12Wambeela malabo a Zhuwawu Namabathiza, ofiyedha dhiinova, Omwene wa Odhulu onowaneliwa, vano ale enawanela ni kopolo binaaka. 13Mwaha wi Anamavuhulela aatene teto Malamulo evuwihile ofiyedha mudhidhi wa Zhuwawu. 14Mwafuna orumeedha nda: Zhuwawu dili Eliyazi, oyene aadhe. 15Ole winna obaruni,#11.15 Enofwanyeya madhu owi: Ole winna obaruni wowiiwana, eewe! mu dhoolebiwa ni madada dhimohi dhixa. Mbwenye anamasuuza ajinji enoobuwela wi wowiiwana kiyalebiwe ni murumiwi Matewuzhi. eewe!

16<<Ginaafwanafwanihe mulogo ola ni aani? Onaligana ni ahima ekaraatile vamusika yaakuwelaga akwiiwa:

17 <Hiyo nuhuwoobelani mvilovilo,

nyo kamwiinile;

nihiiba jibo ya vamakwelo,

nyo kamuunddile>.

18Vowi Zhuwawu ohudha onathuga, ohunamung'wa vinyu, vano athu eni: <Ohukanna muneba wabure!> 19Ohudha Mwaana a Muthu, onaja, onang'wa, athu eni: <Mmoone mulobwana ola, nanrima, namang'wa; akwaaye bi anamakoha-musoko ni anamathega!> Mbwenye tthottho dhinooneya ni mabasa eewa>>.

Oddilu wa maluwa oohutthwaruwa

(Luka 10.13-15)

20Nuwindo, Yesu ahambeelaga osumulula maluwa alene mweerihedhigiiye dhootikiniha dhijinji. Oliye owaasumululaga mwaha woohufuna otthwaruwa, ahiiraga: 21<<Oddilu wa we Koraziimi! Oddilu wa we Betisayida! Yaheereye matikiniho oTiru ni oSidoni#11.21-22 Moone dha oTiru ni oSidoni mmaniivuru a Ezaya 23.1-18; Ezekiyeli 26.1 ofiyedha 28.26; Jhoweli 3.4-8; Amosi 1.9-10; Zakariya 9.2-4. yiiriwana maluwa eenyu, aliwa yootthwaruwa walenene, yoowara guwo dha masakwi, yiikuthulele nddoora. 22Mbwenye miyo ginowuwaaddelani wi Nlabo na Othongi, Mulugu onoodha amweeddiwele thagaraga vajinji Tiru ni Sidoni, ohiya nyo, Koraziimi ni Betisayida. 23Teto we Kafaranawu, onoobuwelela wi oneere wiigweliha ofiye odhulu? Naari, onookitihiwa ovokedhiwe mburo wa anookwa; mwaha wi oSoddoma, yaheeriwewo matikiniho yiiriwena we, ookalawoove ofiyedha peeno. 24Ginowuwaaddelani wi Nlabo na Othongi, Mulugu onoodha amweeddiwele thagaraga vajinji Soddoma, ohiya weevo, Kafaranawu>>.

Mudhe wa miyo mvume

(Luka 10.21-22)

25Va mudhidhi olene Yesu ahiiraga: <<Babani, mwiinya a elabo ya vati ni odhulu, ginowuutamaalani mwaha wowi muhaalogohedha athu atthottho ni oosuuza dhego nda, vano nyo wooneyihedha oohusuuza. 26Ee, Babani, mwafunile wi dhikale ndala.

27<<Dhaatedhene gihivahiwa ni Ababa. Kalivo onamunona Mwaana ahili Babe; vano kalivo onamunona Baabi ahili Mwaanaya teto ni oyene Mwaana onamfuniiye omooneyela.

28<<Dhaani wa miyo, nyo mwaatene oogoma ni oonyemeliwa sapo, vowi miyo ginowuuvahani ovuma. 29Mwiireye sapo yaaga, musuuze wa miyo, mwaha wi gili ookurumuwa ni owiiyeviha murima; vano munoofwanya ovuma wa mineba dheenyu. 30Vowi nipiddi naaga kannarusa, vano sapo yaaga soovevuwa>>.

Currently Selected:

Matewuzhi 11: tke

Highlight

Copy

Compare