Luka 2

Obaliwa wa Yesu

(Matewuzhi 1.18-25)

1Mudhidhi olene ahikalawo kingi mulubale a elabo yaatene,#2.1 Kingi mulubale a elabo yaatene Naari wi: Sezari. eeriwa Aguxtu. Ahivuwiha nlamulo neeriliiye wi athu aatene elebeliwe. 2(Vano waali olebela wowambeela, Kureniyo aaliiye kuminadori a elabo ya oSiriya.) 3Vano athu aatene yahidhowa kadda muthu mudhi woobaliwela wi yalebeliwe.

4Mwaha wa ela, Zhuuze ahivenya mudhi wa oNazarethi wa oGalileya. Odhowa nluwa na oBetelemi, oZhudeya, wewo wabaliwe kingi Davidi. Vowi oliye aali a nlogo na Davidi. 5Ahidhowa wi alebeliwe ni mwihiyanaaye Mariya, aganna wari.

6Zhuuze ni Mariya egali oBetelemi wewule, wahifiya mudhidhi wowi oliye abale. 7Ahimbala mwaanaye, mwaana-pongwe owambeela. Ahimuhuruwedha mwaanaye ni guwo. Omukonaantiha munigulani mwajela aneenyama munikolani mwemo pwagoniiwa, mwaha wi suubi a aleddo kamwaali mburo.

Amakambuzi a mabila ni angero

8Mmuruddani mule yahikalamo amakambuzi a mabila. Ayene yawang'anelaga aneenyama eewa ni mahiyu. 9Vano vowaaguva mungero a Nabwiya Mulugu ahifiya vameentoni veewa. Mungero ole agafiyile, waara wa nthithimiho na Nabwiya Mulugu wahaamoneyelaga vaaligiisu, aliwa yahirurumuwaga ni woova. 10Vano mungero ahiwogaga ni aliwa, wiira: <<Ee! Kamoove! Guhudhelanaani Muselu Wapama, oyene onavahe odhiveliwa wuulubale athu aatene. 11Vuruwanani, museluya buula: Muhubaliweliwa peeno veva, muluwani na Davidi, Mvulumusi, Kirixtu#2.11 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. Moone teto verisikulu 26. ole aroromelihiwe, Nabwiya. 12Yoonihedhoya enaakale ela: muneere omfwanya mwaana agabaliwe ohuruwedhiwe ni guwo, okonaantihiwe munigulani moojela aneenyama>>.

13Vano vowaaguvavene, yahifiya angero ajinji anyakoddo a odhulu, yegi omutamaala Mulugu ni madhu ala:

14 <<Athithimihiwe Mulugu odhulu woolapesesa,

murenddele elabo ya vati wa athu alene Mulugu enaadhiveliiye>>.

15Vano dhahipadduwa angero egavenyile vameentoni va amakambuzi a mabila, odhowa odhulu, yegi owoga mmohi ni mukwaaye: <<Kabeni dhiinoveva oBetelemi noone dhedho dhipadduwile dhinoonihile Nabwiya Mulugu>>.

16Vano yahimaruwaga mowaaguva edhowaga oBetelemi. Yahimfwanyaga Mariya ni Zhuuze, egamukonaantihile mwaana munigulani. 17Vano egamoonile mwaanaya, yahambeelaga olaleya muselu wawaaddelile mungero mwaha wa mwaana ole. 18Vano athu aatene yeewaga dhende, dhalaleyaga amakambuzi a mabila, yahitikinaga. 19Vano Mariya oologolelaga nda mmurimani apimaga, asayelaga ononelamo. 20Vano amakambuzi a mabila ale yahimaruwaga owelela mundduli. Edhowaga mundila yegi omuthithimiha emutamaalaga Mulugu, mwaha wa dhaatedhene dhedho dheewiliiwa wona mwaaddeliwiisu.

Yesu onodhowiwana nyuba ya Mulugu

21Egavirile malabo matanu ni maraaru mwaanaya ahiineliwa mooligana ni mMalamuloni a Mozezi. Ageeneliwe yahimuthwa ndina na <<Yesu>> wona mwawogele mungero Mariya ahinakanne wari.

22Egaakwanile malabo oweelihiwa wona Malamulo a Mozezi yahimuthukulelaga mwaanaya oZheruzalemi wi oonihiwe wa Nabwiya, 23(Wona mulebeliwiiwa mMalamuloni a Nabwiya: <<Ana-pongwe aatene owambeela eneerege oveleeliwa wa Nabwiya>>,#2.23 Okuma 13.2, 12.) 24ni mvahi wa mukutho wona dhilebiwe mMalamuloni a Nabwiya: <<Paara emohi ya maziya naari kangayiwa biili dhing'onong'ono>>.#2.24 Levitiku 12.8.

25OZheruzalemi wahikala mulobwana oyene eeriwa Simiyawu. Oliye aali oohariha, oomoova Mulugu. Oojejihedha wooboliwa wa Ezarayeli. Muneba Woweela waali ni oliye. 26Wahimvuhulela Muneba Woweela wi kanaakwe ahimoonile Kirixtu ole aroromelihiwe ni Nabwiya. 27Moosogoleliwa ni Muneba Woweela ahivolowaga nyuba ya Mulugu. Ababiinya a mwaana yahimudhowana Yesu wi yaakwanelihe dhaatedhene dhilebiwe mMalamuloni dhooligana ni mwaana abaliwa. 28Egamfiyilena wule, Simiyawu ahimuthukulaga mwaana mmadadani mwaaye, omutamaalela Mulugu eeraga:

29 <<Vano Nabwiya, gipaganyeni ni murenddele

miyo, mwiimeleli eenyu, wona mwagiroromelihe nyo.

30 Mwaha wi dhiinova meento aaga

ehoona ovulumusa weenyu,

31 wewo osasanyedhe nyo vameentoni va athu aatene,

32 waara wi waamoneyele athu a milogo dhimohi#2.32 Ala bi ayene yahaali aZhudewu.

dinavaha nthithimiho wa nlogo neenyu Ezarayeli>>.

33Ababe ni amaaye a Yesu yootikinaga dhawogaga Simiyawu dha mwaanaya. 34Simiyawu ahaareeliha, wiira wa Mariya, amaaye a Yesu: <<Mwaana ola ohusakuliwa wi akale totela yootongwa naari ovenya wa athu ajinji mu Ezarayeli, onaakale etoonyihedho yoovaanyihana. 35Oliye onodha ooneyihe moobuwelelo a mmirimani mwa athu ajinjeene. Nyo mmani okubanya onodha olate murima weenyu wona supaadda>>.

36Wahikala namavuhulela mmohi a mwihiyana eeriwa Anna mwaana a Fanuweli a nlogo na Azeri. Aali owuuluvaleene agateliwe akalile yaaka tanu nabiili. 37Nuwindo, okala maamukwele yaaka makumi matanu ni maraaru ni yaaka nnayi (84). Kaavenyamo munyuba ya Mulugu, mbwenye oweebedha mahiyu ni mutana ni othuga. 38Vano mudhidhi mmohive olene ahimutamaalelaga Mulugu, awogaga dha nriiho na mwaanaya wa ale aatene yajejihedha wooboliwa wa Zheruzalemi.

39Egamalile oharihamo dhawoga Malamulo a Nabwiya yahiwelela o Galileya oluwani weewa, oNazarethi. 40Mwaanaya owunnuwa ni odhaaliwa tthottho, mahala a Mulugu yaali ni oliye.

Muzombwe Yesu munyuba ya Mulugu

41Yaaka ni yaaka ababiinya a mwaana yoodhowesa oZheruzalemi, Omamuthabelelo Paxkwa.#2.41 Paxkwa yaali mathanga oofuneyesesa a aZhudewu. Moone Okuma 12.1-27. Vowi Yesu avenyihiwe nlabo nenddo na Paxkwa, hiyo dhiinova Paxkwa eehu nnathabela ovenyihiwa wa Yesu muukwani. 42Yesu agaakwanihile yaaka kumi ni biili, aliwa yahidhowa oZheruzalemi omathangani wona moolemeelela. 43Egamalile malabo a mathanga, ewelagawo, Yesu ahihalaga oZheruzalemi, ababiinya ehinonaga. 44Yuubuwelelaga wi oli ni akwaaye a muulenddoni, yaheeddaga nlabo naatenene nuwindo wambeela omusayela mwa amudhi eewa ni mwa ale yamunonile, 45yahamfwanyiligiisu yahiwelelaga oZheruzalemi wi yamusayelege. 46Vigavirile malabo maraaru yahimfwanyaga munyuba ya Mulugu agakaraatile vaari va anamasuuziha a Malamulo avuruwanaga, akohaga. 47Aatene alene yamwiiwaga yootikinaga vajinjivene dha ononelamo waaye ni maakulelo aaye. 48Mowaaguva ababiinya egamoonile yaaligi ootikiniheya, amaaye yahimwiirelaga: <<Mwaanaga, wiiriliiwe ela ni hiyo ddi? Ababo ni miyo nahisimwela ni wuusayela>>.

49Oliye ahawaakulaga, wiira: <<Mwahaya bwaddi mwagisayeleliinyu? Kamunonile wi eli yoofuneya wi gikalege vaade va ababa?>> 50Mbwenye aliwa kayeewelelagamo yawaaddeligiiye.

51Omaruwa vamohi ni aliwa odhowaga oNazarethi. Amaaye yoologolela dhego dhaatedhene dhedhi mmurimani. 52Yesu owunnuwa ni tthottho ni mahala, vameentoni va Mulugu ni va athu.

Currently Selected:

Luka 2: tke

Highlight

Copy

Compare