Wambeela 46

Otamela wa Yakobo wEgubuddu

1Ezarayeli ahimaruwaga ni dhego dhaatedhene dhanniiyena. Agafiyile oBerexeba ahikuthaga mukutho wa Mulugu wona babe Ezaaki. 2Mulugu ahooneyelaga wa oliye mahiyu, ahimwiithana, wiira: <<Yakobo! Yakobo!>> Ahaakulaga, wiira: <<Di miyo, gili va!>> 3Mulugu ahiwoga, wiira: <<Miyo gili Mulugu a ababo. Ohoove odhowa wEgubuddu vowi wewo ginoodha guwiire mwa we nlogo na athu ajinji. 4Miyo ginodhowa vamohi ni nyo wEgubuddu, miyo ginoodha guuwelihewo. We onoodha okwe mmadani mwa Zhuuze>>.#46.4 Mulugu ahimuroromeliha Yakobo wi aakwe mwa murenddele wEgubuddu ni Zhuuze wiipaddini waaye. Ni madhu alena Mulugu ahimulibiha Yakobo vano ahimurumeedhiha ovenyawo elabo elene waliiye.

5Vevale Yakobo ahivenyaga oBerexeba, vamohi ni anaaye. Yahimuthukulaga oliye mukaroni dhedho Farawo dharumihiligiiye vamohi ni ahiyana ni ahima. 6Yahaathukulaga aneenyama eewa aatene ni dhooreela dheewa dhanniiwana oKanani. Yakobo ahidhowaga ni athu aaye aatene: 7Anaaye, anaalobwana ni anaahiyana, ni aniiwa aatene wEgubuddu.

8Ala bi mandina eewa aEzarayeli, enatapulela Yakobo ni anaaye, ayene yatamele wEgubuddu: Rubeni, mwaana owambeela a Yakobo.

9Ahima a Rubeni: Hanoki, Palu, Hezironi ni Karimi.

10Ahima a Simiyoni: Yemuweli, Yamini, Ohadi, Yakini, Zohari, ni Xawuli, aali mwaana a mwihiyana a oKanani.

11Ahima a Leevi: Gerexoni, Kowati, ni Merari.

12Ahima a Zhuda: Eri, Onani, Xela, Perezi ni Zera. Eri ni Onani, yahikwa egali oKanani. Perezi anna ahima abiili: Hezironi ni Hamuli.

13Ahima a Esakari: Tola, Puva, Zhaxube#46.13 Zhaxube Naari wi: Zho. Moone Numero 26.24; Mamwene Owambeela 7.1. ni Ximeroni.

14Ahima a Zebuloni: Seredi, Eloni, ni Zhaleli.

15Ala yaali ahima a Yakobo ni Liya, yaabaliliiye oPadani-Aramu vamohi ni Dina. Alena ni anaaye wiinjiva weewa waali athu makumi maraaru ni athu araaru.

16Ahima a Gadi: Zifiyoni, Hagi, Xuni, Eziboni, Eri, Arodi ni Areli.

17Ahima a Azeri: Yimina, Yixiva, Yisivi, Beriya, vamohi ni Sera, murogoriwa. Ahima a Beriya: Heberi ni Malekiyeli.

18Ala yaali ahima a Yakobo ni Zilipa, namalaba a Labani amvahiliiye mwaanaye Liya, alena ni anaaye wiinjiva weewa waali athu kumi ni atanu nammohi.

19Ahima a Rakeli mwadha a Yakobo yaali Zhuuze ni Benzhami.

20Zhuuze anna ahima abiili, yaabaliliiye wEgubuddu ni Azenati, mwaana a Potifera, namakutha a oOni: Manasesi ni Efarayimu.

21Ahima a Benzhami: Bela, Bekeri, Asibeli, Gera, Naamani, Eehi, Roxi, Mupimu, Hupiimi ni Aredi. 22Ala yaali ahima a Yakobo ni Rakeli. Ahima eewa, wiinjiva weewa yaali athu kumi ni annayi.

23Mwaana a Dani: Huximi.

24Ahima a Nafitali: Zhazeli, Guni, Zhezeri ni Silemu. 25Ala yaali ahima a Yakobo ni Bila, namalaba a Labani amvahiliiye Rakeli. Ala ni aniiwa, wiinjiva weewa waali athu atanu nabiili.

26Athu aatene yafiyile wEgubuddu vamohi ni Yakobo, a nlogo naaye waahiya ahiyaniiwa, wiinjiva weewa waali makumi matanu nammohi ni athu atanu nammohi (66). 27Ahima a Zhuuze yaabaliliiye wEgubuddu yaali abiili. Vowindo, aatene a nlogo na Yakobo egafiyile wEgubuddu yaali athu makumi matanu nameenddi (70).

28Yakobo ahimusogolihaga Zhuda, omwaaddela Zhuuze wi yagumane oGoxeni. Vafiyiligiisu oGoxeni, 29Zhuuze ahisasanyedhaga gareeta yaaye, odhowa wawaakela ababe, Ezarayeli. Vaafwanyiligiiye ahaakubaarelaga, wuundda mudhidhi mujinji.

30Yakobo ahiiraga wa Zhuuze: <<Naari gikwaga, guhuwoona, ebaribareene ohukalawo>>.

31Zhuuze ahiiraga wa addibile ni ahima aatene a ababe: <<Ginoowela gamwaaddele Farawo wi addibilaga, ni ahima ayene yaali oKanani ehidhawo, eli ni miyo wewuno. 32Ginomwaaddela wi ehidhana mabila, mbuzi, ng'ombe, ni dhaatedhene dhinniiwana vowi anamafuwa a aneenyama. 33Farawo owiithanani, ookohagani, eeraga: <Mabasa eenyu ba ddi?> 34Mmwaakule, mwiire: <Hiyo vano, anamalaba eenyu, nili anamafuwa a aneenyama. Wambeela nigali azombwe mabasa eehu baayene naari makolo eehu>. Mowindo fineeriinyu mmage elabo elene ya oGoxeni vowi aEgubuddu yowaatadha amakambuzi a mabila>>.

Currently Selected:

Wambeela 46: tke

Highlight

Copy

Compare