Wambeela 45

Zhuuze onowiyooneyiha wa addibile

1Vevale Zhuuze kaakwanihaga wiilibihedha vaari va athu aatene yannigiiyena. Ahaalamulaga anamalaba aaye, wiira: <<Venyavoni mwaatene!>> Ndala kavahalilege muthu mmohi Zhuuze eyooneyihaga wa addibile. 2Zhuuze ahoobaga kutho, aEgubuddu yiiwaga, athu a Farawo yahaaddeliwaga teto.

3Zhuuze ahiiraga wa addibile: <<Di miyo, Zhuuze! Ababa nivano ehikalawo?>> Mbwenye aliwa kayaandilege omwaakula vowi yahitutuwaga vameentoni vaaye, yoovaga. 4Zhuuze ahididelaga, wiira: <<Mugaaddamele>>. Yahimwaaddamelaga Zhuuze, ahiiraga: <<Miyo gili Zhuuze, ddibilinyu olene mwamugulihiliinyu adhowiwana wEgubuddu. 5Mbwenye muhukubanye naari ogurumela mwaha wi mwahigiguliha wuno, vowi Mulugu dagisogolihe wi athu ehikwe. 6Dheereya yaaka biili dala egali mwiilaboni, dhigahalile yaaka tanu athu ehilimaga naari ohadda wene. 7Mulugu ahigisogoliha ndala wi aniinyu ekale agumi wi owooboleni mootikiniha.#45.7 Mulugu onowiirihedha dhego dhootikiniha wa hiyo. Naari dhego dhinooneya dhootakala odhaari wa Zhuuze dhinowaandeya okala epaddi ya moobuwelelo a Mulugu wa hiyo vano. Kaniwogege wi dhoorusa dhaatedhene dhinapadduwa sookwiri. Zhuuze eere Mulugu darumeedhe orabulihiwa waaga wi aakamihedhe athu ajinji evulumusiwe mwa dala yuulubale. 8Kahuwo nyo mugidhiihile wuno, Mulugu digiirilena okala wona baabi a Farawo wi gaasogolelege anamalaba aaye aatene ni olamula elabo yaatene ya wEgubuddu.

9<<Dhowani mowaaguva mwawaaddele ababa wi mwaaninyu Zhuuze onowuwaaddelani wi: <Mulugu ohiirana wi miyo gikale nabwiya a wEgubuddu waatewene. Yaaguvege odha wa miyo. 10Muneere mmage elabo ya oGoxeni, vakukuuve ni miyo. Ohukala mburo oyene muneeriinyu mukalegewo nyoovo, aniinyu, aniiwa, mabila eenyu, mbuzi dheenyu, ni ng'ombe dheenyu ni dhaatedhene dhili dheenyu. 11Wewo miyo gineerege wuuvahani dhooja, nyoovo ni aniinyu, ni dhaatedhene dhedho dhili dheenyu, vowi dhihihalawo yaaka tanu dha dala> >>.

12Ahiwelelaga owoga, wiira: <<Nyoovo mwaatene vamohi ni ddibilaaga Benzhami munowoona ni meento eenyu wi ebaribareene di miyeene. 13Mwawaaddele ababa dha nthithimiho ginniimina wEgubuddu wuno ni dhaatedhene dhendo mooniliinyu. Mwaadhena wuno mowaaguva ababa>>. 14Ndala Zhuuze, ahimbezharigi Benzhami, yuunddaga, aabiileene yahihabaga mitori. 15Anddagave Zhuuze ahaabezharigi aatene. Vevale yahambeelaga owoga ni oliye.#45.14-15 Zhuuze oonihile wi ahaalevelela. Muthu onamuhara Mulugu aalevelelege ale enamunyengetha wona Zhuuze mweereliiye. Moone ARoma 12.17, 19-21.

16Mwaha olena wa odha addibile Zhuuze, wahiiweya vaade va Farawo. Vevale mwene ni anamalaga aaye yahihagalalaga. 17Farawo ahimwaaddelaga Zhuuze, wiira: <<Addibilo yaasasanyedhe aneenyama eewa, ewelelege oKanani. 18Yaadhenaawo ababo vamohi ni aniiwa aatene wi ekale wuno ni miyo. Ginowaavaha aliwa mburo wapama oli wEgubuddu wuno wi ejege dhooja dhapamadha dha elabo ela. 19Wawaaddele wi ethukule karo dha wewuno wi yaadhena aniiwa, ahiyaniiwa vamohi ni babiinyu. Edhe ebaribareene. 20Ehukuuwe ni dhendo dhineeriiwa ehiye wewo vowi dhapama dha wEgubuddu wuno dhineere dhikale dheenyu>>.

21Ahima aEzarayeli yahiiragana ndale. Zhuuze ahawinkaga karo wona Farawo mwawogeligiiye, ahaavahaga pooso oomuja mundila. 22Ahaavahaga dhoowara dhixa mmohi ni mmohi. Mbwenye Benzhami ahivahiwaga korowa dha parata mazana maraaru (300) vamohi ni dhoowara dhoomodari dila tanu. 23Zhuuze ahaarumihedhaga ababe abuuru kumi othukula dhego dhapama dha wEgubuddu ni abuuru amukolo kumi othukula dhooja, ni mikaathe ni dhimohi okala pooso oomuja mundila.

24Ahaapaganyaga addibile, emaruwaga Zhuuze ahiiraga: <<Muhupambihanege mundila>>. 25Aliwa yahimaruwaga wEgubuddu ofiya wa babiiwa oKanani.

26Vamwaaddeligiisu wi Zhuuze ohukalawo, di oliyeene onalamula wEgubuddu waatewene, Yakobo kaakulilegeve, kaarumeedhege yoowoga yeewa. 27Mbwenye yahimwaaddelaga dhaatedhene Zhuuze dhawogiligiiye, vooniligiiye karo nde dharumihiligiiye wi emuthukulena, Yakobo ahiilibihedhaga. 28Vevale ahiiraga: <<Dhihaakwana, mwaanaga Zhuuze ohukalawo. Ginodhowa gamoone gihinakwe!>>

Currently Selected:

Wambeela 45: tke

Highlight

Copy

Compare