Wambeela 44

Zhuuze onowaweeha addibile

1Zhuuze ahimulamulaga musogoleli a anamalaba a vaade vaaye, wiira: <<Odhaalihege dhooja mmasakwini a alobwana ala, ehuddeye pama, omulomoni wiwa ohelegewo korowa dha parata#44.1 Korowa dha parata Mudhidhi olene korowa dhaatedhene dhaali dha gwingwi. dha kadda muthu. 2Ohelemo musakwini mwa ole amung'onong'ono nakoma aaga, ola a parata, vamohi ni korowa dhaguliisuna dhooja>>. Musogoleli ole ahiiragana ndale. 3Bebeheene addibile yahipaganyaga omaruwa, waathukula abuuru. 4Egeeddile vang'ono okuma muluwani, Zhuuze ahimwaaddelaga namalaba aaye, wiira: <<Waaguve, waathamagele alobwana ale. Waafwanya, weere: <Ki mwaha bwaddi muliveliinyu yapama ni yootakala? 5Muhumwiiya nakoma a nabwiya aaga amung'weliiye ni woombezela makanga! Ebaribari mwihiirana yootakala> >>.#44.4-5 Mwiimeleli ola ahinona wi owoombeza makanga a mudhidhi olene yalabiha nakoma a musawo olene yoombezaga makanga. Kannonile akala Zhuuze owiirana teto naari keerana. Yaaka mazana mannayi dhigavirile woombeza wahikooddihiwa mwa nlamulo na Mulugu naavahiliiye aEzarayeli muniivuru Deteronomiyo 18.9-13. Ovuhulela 21.8 ononaaddela wi athu eneeddela dhookwiri naari dhoowombeza enadha emalele onyaza ya munddo, yoonege goyi woolapela vameentoni va Mulugu mudhidhi waatene.

6Namalaba ahaafwanyaga, waawogana wona mwaaddeleliwigiiye. 7Aliwa yahimwaakulaga, wiira: <<Madhu owindala nabwiya, munawogela ddi? Hiyo kaniirilena yego yowindo! 8Muubuwelele wi nahidhaagana wi niwelihe korowa nde dhafwanyiligiihu mmasakwini mweehu oKanani. Nnaande addi omwiiyela nabwiya parata naari oro? 9Mwamfwanyana nakoma oyene, mmohi a hiyo akwe. Aatene nikale adhaari eenyu>>.

10Namalaba ahaakulaga, wiira: <<Dhihikala pama! Mbwenye oyene oneere afwanyiwena nakoma onakala mudhaari aaga. Amohiwa nyo kamunakalana muladdu>>. 11Mmohi ni mmohi oorulaga nsakwi naaye, otedemaniha otapula. 12Namalaba oosugwaga, wambeela a mulubale ofiyedha wa ethogohi. Amfwanyilege nakoma ole musakwini mwa Benzhami.

13Vooniligiiwa elena yahitalaga dhoowara dheewa yoonihaga okubanya. Aatene yahaarugunusaga abuuru eewa, owelelaga oluwani.#44.13 Otala dhoowara yaali etoonyihedho ya okubanya wuulubale mudhidhi olene. Dila ya nabiili addibila a Zhuuze yahooneyiha wi kayanna nrima ni Benzhami, mbwenye odhivela. Yahimooniha Zhuuze wi yahihiya makalelo eewa. 14Zhuda ni addibile yahimfwanyaga Zhuuze dila biili agali vaade vaaye, okokora oworomihedha kove vati.

15Zhuuze ahaakohaga, wiira: <<Mwiirile ddi? Kamunanona wi muthu owihimiyeene ginowaanda wona dha musogolo mwa makanga?>>

16Zhuda ahimwaakulaga, wiira: <<Hiyo vano nneere niwoge ddi, nabwiya? Nihikanna madhu owaakula? Nnaande wiyeeliha addi? Mulugu ohooneyiha yoothega yeehu. Hiyo nili adhaari eenyu, nabwiya, vamohi ni oyene ofwanyiwena nakoma>>.

17Zhuuze ahaakulaga, wiira: <<Miyo kaginaanda wiira yego yowindo, naari. Oyeneve ofwanyiwena nakoma dineere akale mudhaari aaga. Nyo amohi mudhowege ni murenddele wa babiinyu>>.

18Vevale Zhuda ahimwaaddamelaga Zhuuze, wiira: <<Gihiilevela, nabwiya aaga, mwarumeedha mudhaari eenyu awoge ndhu naaye wa nyo muhutakaleliwe ni miyo, vowi nyo munoligana ni Farawo. 19Nyo nabwiya aaga, olenddo olene mwahinikoha hiyo, adhaari eenyu, wi babiinyu ohukalawo naari muhukalana ddibilinyu mmohiwa. 20Hiyo nahaakulaga nabwiya wi nihikalana, owuuluvaleene, ni ddibilihu a muzombwe, embaliliisu egooluvaleve. Babiihu onomudhivelesa vowi ddibile mmohi a egulu emohive, ohukwa, ohalile ola yeeka. 21Nyo nabwiya, mwahinaaddelaga, mwiiraga: <Mmudhena wuno, ginafuna gimoone>. 22Hiyo nahuwaaddelagani pama nabwiya wi muzombwe kanaakwanihe waahiya ababe, neera ndo ababa enookwa. 23Mbwenye nabwiya mwahididelagave, mwiiraga: <Mwaahimudhana ddibilinyu eethogohi, kagidha guwaakelani>. 24Mowindala, vaweleligiihu wa babiihu, namalaba eenyu, nahimwaaddelaga eyene mwanirumiligiinyu nabwiya.

25<<Vevale babiihu ahiiraga: <Muwelelewo mwagule dhooja>. 26Hiyo nahaakulaga, wiira: <Kanili ooyawo nihimuthukule ddibilihu eethogohi vowi mulobwana ole kananaakela naahimudhowana>. 27Vevale babiihu, namalaba eenyu, ahiiraga: <Muhunona pama wi mwihiyanaaga Rakeli agivahile ahima alenave abiili. 28Mmohi ohugirimeela, ofiyedha peeno kaginamoona. Ginorumeedhela ebaribari wi otakuniwe ni mwaneenyama. 29Ki mwagaaka ola, yampadduwela yego, munomuruma wi mwanakalaba ola akwe ni okubanya>.

30<<Kannanda owelela wa babiihu, namalaba eenyu, nihimuthukulile muzombwe vowi egumi yeewa si emohive mwa oliye. 31Anoonave nihinna muzombwe, onookwa. Hiyo anamalaba eenyu, dinamwiirihe mwanakalaba wi akwe ni okubanya. 32Fi vevo gaaroromelihiimi ababa omukameela, giiraga: <Gaahimudhanawo, gineere gikalena muladdu ni nyoovo egumi yaaga yaatene>.

33<<Mwa mwaha olena, nabwiya aaga, ginowuulobani mugithukule wi gikale mudhaari eenyu, muzombwe ola mmwihiye adhowege ni addibile. 34Owelela wa ababa gineere avi gihimuthukule muzombwe? Kaginaanda ovilela vowawoona ababa yookubanyiha ela yawiireyelaga>>.

Currently Selected:

Wambeela 44: tke

Highlight

Copy

Compare