Wambeela 42

Addibila a Zhuuze wEgubuddu

1Yakobo vanoniliiye wi wEgubuddu ohukala dhooja, ahiiraga wa anaaye: <<Mwaha bwaddi munakaleliinyu wiing'ananave mmohi ni mukwaaye? 2Gihiiwa wi wEgubuddu onogulihiwa dhooja. Dhowani, mwagule wi naande okalawo, nihikwe dala>>.

3Vevale addibile Zhuuze kumi yahimaruwaga wi yagule dhooja wEgubuddu. 4Mbwenye Yakobo kaamwihiyilege Benzhami, ddibile oobaliwana a Zhuuze wi athaane. Oovaga wi enamwiireyele yego yootakala mundila. 5Ndala ahima aEzarayeli yahidhowaga ogula dhooja vamohi ni athu amohiwa a elabo elene ya oKanani vowi dala yahitthabwa.

6Zhuuze dalamula wEgubuddu, daagulihedha dhooja athu. Mowindala addibile Zhuuze yahidhaaga wa oliye okokora, oworomihedha kove dheewa vati.#42.6 Ndala yooroha ya Zhuuze, etapuleliwe muniivuru Wambeela 37.5-11, yahaakwaniheliwa. 7Zhuuze agawoonile addibile, ahaadidelaga, mbwenye awaakelilege wona amarala, ahaakohaga ni owali, wiira: <<Nyoovo munadheela wuuvi?>> Aliwa yahaakulaga, wiira: <<Nnadha elabo ya oKanani wi nigule dhooja>>.

8Zhuuze ahaadidelaga addibile, mbwenye aliwa kayamudidelilege. 9Zhuuze ahuubuwelelaga dharohesiiye dha addibile akalaga ni aliwa, wiira: <<Nyo muli anameeddelela, mudheele wi moone okala wa elabo ela!>> 10Aliwa yahaakulaga, wiira: <<Kahuwo mwemo, nabwiyani! Hiyo, anamalaba eenyu, nidheele ogula dhooja baahi. 11Hiyo aatene nili ahima a babiihu mmohive, nili athu oororomeleya; hiyo anamalaba eenyu, kannaabihege okala anameeddelela!>> 12Zhuuze ahawaakulaga, wiira: <<Munooratha! Mudheele weeddelela wi moone okala wa elabo ela!>> 13Mbwenye aliwa yoolibihedhagave owoga wi: <<Hiyo, anamalaba eenyu, naali kumi ni abiili oddibilave, aatene hiyo ahima a babiihu mmohive, amagile elabo ya oKanani. Ethogohiya ohalile owani ni babiihu, mmohi dirimeele>>.

14Mbwenye Zhuuze ahaakulaga, wiira: <<Si eyene miyo guwaaddeliimini, nyo muli anameeddelela! 15Ndoweni goweeheni, noone. Ginolibela egumi ya Farawo, kamunavenyawo wuno ahidhiile ddibilinyu a ethogohiya. 16Mmohi a nyo amudhowele ddibilinyu, amohi mugali mukaambura. Akala ebaribareene eyene muwogiliinyu ya ddibilinyu, gineere girumeedhe dhoowoga dheenyu dhimohi. Dhaahikala dhooratha, ginolibela egumi ya Farawo, nyoovo muli anameeddelela>>. 17Zhuuze ahaafugelaga mukaambura mule, okalamo malabo maraaru.

18Nlabo nendde na neethaaru, Zhuuze ahiiraga wa aliwa: <<Miyo gili muthu oomuthithimiha Mulugu. Mwaafunaga wi mukale agumi, mwiirena eyene ginoorumiimini. 19Akala ebaribareene muli athu oororomeleya, ahale mukaambura muthu mmohi, athu amohiwa ginowuuhiyani wi mudhowege, ethukule dhooja wi aniinyu yape dala. 20Mbwenye mugidheelena wuno ddibilinyu a ethogohiya wi goone yoowoga yeenyu akala ebaribari mweera ndo kamunaakwe>>.

Aliwa yahaakulelaga wiirana ndale. 21Yahambeelaga owoga mmohi ni mukwaaye, yiiraga: <<Ebaribareene nnorabulihiwa odheela mwaha wa ddibilihu Zhuuze. Nahimoona wukuuwa waaye anilobaga omweeddiwela thagaraga mbwenye kanarumeedhelege, siilena enarabuleliihu>>.

22Rubeni ahiiraga: <<Vale miyo gahiiraga wi kanimwiirele yootakala muzombwe ole, mbwenye kamwafunilege ogiiwa. Koonani, ninowoonihiwa goyi mwaha wa okwa waaye>>.

23Aliwa kayanonaga wi Zhuuze owawiiwaga dhedho dhawogigiiwa, mbwenye ahiwogaga wona ahikalavo muliba otapulela. 24Zhuuze ahivenyagavo, anddaga. Ahiwelelaga owoga ni aliwa, olamula wi Simiyoni amagiwe mudhidhi olene vameentoni va athu aatene, afugeliwe mukaambura.

25Zhuuze ahilamulaga wi ehudde dhooja mmasakwini mweewa teto ehelemo korowa dha kadda muthu dhaguliisuna dhooja dhende. Ahaalamulaga wi evahiwe pooso a voolenddoni. Ela yahiireyaga. 26Addibile Zhuuze yahimagelelaga vaabuuruni eewa, owelelaga owaniwa.

27Egafiyile vamburoni voogona, mmohi ahitapulaga nsakwi naaye wi athukulemo yooja amvahe buuru aaye, afwanyilege korowa omulomoni wa nsakwi. 28Ahawaaddelaga akwaaye, wiira: <<Ohugiwelihedha korowa! Koonani, nda dhili musakwini mu!>> Aliwa yahitutuwaga egurumelaga, ewogaga mmohi ni mukwaaye, yiiraga: <<Elena Mulugu eniireliiye ddi?>>

29Egafiyile oKanani wa babiiwa Yakobo, yahimwaaddelaga dhaatedhene dhaapadduwelege, wiira: 30<<Mulobwana oyo onalamula elabo ele, awoga ni hiyo mwa owali eeraga hiyo naali anameeddelela a elabo ele. 31Mbwenye nahimwaakulaga wi nili athu oororomeleya, kannaabihege weeddelela. 32Nahimwaaddelaga wi naali kumi ni abiili omambeelelo, babiihu mmohive, ethogohiya ohalile owani ni babiihu mu elabo ya oKanani. 33Ndale mulobwana ole onalamula elabo ele, ahinaakulaga, wiira: <Wi ginone ebaribari yowi nyoovo muli athu oororomeleya, ahale wuno mmohi a nyo, amohiwa muthukule dhooja wi aniinyu yapena dala. 34Mbwenye mwamudhana ddibilinyu ethogohiya. Ndo fineeriimi ginone ebaribari wi nyoovo kamuli anameeddelela, mbwenye athu oororomeleya. Veva fineeriimi guuwelihedheni ddibilinyu vano muneeddege ofuna weenyu mu elabo ela> >>.

35Veethiliiwa masakwi eewa, kadda muthu ahifwanyagamo nipwethu na korowa dhagwingwi musakwini mwemule. Vooniliiwa korowa nde, yahidhaaliwaga woova vamohi ni babiiwa.

36Vevale Yakobo ahiiraga: <<Nyo munogaaka ahima aaga! Zhuuze kaliwo, Simiyoni kaliwo. Munafuna teto ogaaka Benzhami? Dhaatedhene dhenda dhinagiireyela miyeeneve>>.

37Ndala Rubeni ahawaakulaga ababe, wiira: <<Gaahimuwelana Benzhami, mwaape ahima aaga abiili. Mugihiyedhe miyo, ginomuwelana>>. 38Mbwenye Yakobo ahaakulaga, wiira: <<Mwaanaga kanooharani vowi ddibile ohukwa. Ola yampadduwela yego mundila, munogiruma miyo mwanakalaba okwa ni okubanya>>.

Currently Selected:

Wambeela 42: tke

Highlight

Copy

Compare