Wambeela 41

Zhuuze onotapulela dhooroha dha Farawo

1Dhigavirile yaaka biili, nlabo nimohi Farawo ahirohaga. Arohilege agali seresere ya mwihinje Nilu. 2Ahoonaga ng'ombe dhamukolo tanu nabiili dhapama ni dhooruva dhikumaga muNilu, dhijaga thongwe. 3Mooharela dhahikumaga mwinko mwemule ng'ombe dhimohi dhamukolo tanu nabiili dhootakala, dhowoondda dhigeemelile seresere ya mwihinje, vamohi ni nde dhowambeela. 4Vevale ng'ombe dhootakala, dhowoondda dhoomiraga dhapama, dhooruva nde. Egamalile ela Farawo ahirurumuwaga. 5Agawelele ogona, ahirohaga teto yego emohi. Mangala matanu nameenddi a mahele apama ni malubale egakumile vamutatini mmohive. 6Voohulogela yahikumaga mangala mamohi matanu nameenddi oovabala, owummeene mwaha wa pevo yooviha. 7Mangala ale oovabala yahaamiraga mangala ale matanu nameenddi a mahele apama, malubale. Vevale Farawo ahirurumuwaga, woona wi waali oroha baahi. 8Ogasile, ahukuuwaga vajinji, wawiithaniha amasenga aatene vamohi ni atthottho a wEgubuddu wi awaaddele dhooroha dhaaye. Mbwenye kaalivo aandile omutapulela Farawo.#41.8 Amasenga ala yahikalana kopolo dha muneba wabure mbwenye kayaakwanihile otapulela dhooroha. Kopolo dha muneba wabure kadhili dhookwaranya kopolo dha Mulugu. Kopolo dha Mulugu, baahi saakwanihe otapulela yooroha elena.

9Vevale musogoleli a dhoong'wa ahiwogaga wa Farawo, wiira: <<Ebaribareene peeno ginowuubuwelela ovirigana waaga. 10Mudhidhi olene Farawo vatakaleliwiinyu ni anamalaba eenyu, mugifugela mukaambura wa mpogo a aliba waang'anela vamohi ni musogoleli oosasanya mikaathe. 11Mahiyu mamohi, hiyo abiili nahirohaga, dhooroha dhootapuleleya moohiyana-hiyana. 12Mwahikalaga mwemule muzombwe mmohi, muHeberi, aali namalaba a mpogo a aliba waang'anela. Nahimwaaddelaga dhooroha dheehu, ahinitapulelaga wona mwemo mmohi ni mukwaaye mwaroheligiiye. 13Ebaribareene yahiireya eyene yanaaddeligiiye: Miyo gahiwelihedhiwa mabasa aaga, mbwenye mukwaaga ahisijiwa>>.

14Vevale Farawo ahimwiithanihaga Zhuuze; mowaaguva yahimukumihagamo mukaambura. Zhuuze ahiigaga ereru yaaye, owara guwo dhimohi, odhowa wa mwene. 15Farawo ahiiraga: <<Miyo giire oroha, kuhukalavo oowaanda ogitapulela. Vano giire waaddeliwa wi weewave yooroha onotapulela>>. 16Zhuuze ahaakulaga, wiira: <<Eyo kili mwa miyo, mbwenye Mulugu mwiinya dineere ootapuleleni mooriyela, mwene>>.#41.16 Zhuuze kaarumeedhe wi athu yuubuwelelege wi aali namasuuziha oofwaneelela oriihiwa. Amvahile nthithimiho Mulugu aafwaneelele. Enofuneya hiyo niveleelege nthithimiho wa Nabwiya eehu mwa mareeliho maatene enanivahiiye. 17Vevale Farawo ahimwaaddelaga Zhuuze, wiira: <<Miyo girohile ngali seresere ya mwihinje Nilu. 18Gahoona ng'ombe dhamukolo tanu nabiili dhapama ni dhooruva dhikumaga muNilu, dhijaga thongwe. 19Mooharela mwiwa dhahikumamo ng'ombe tanu nabiili dhootakala, dhowoonddesesa, kaginaabihege woona mu Egubuddu mwemu. 20Ng'ombe nda dhowoondda, dhootakala dhahimira dhowambeela tanu nabiili dhapama ni dhooruva. 21Naari dhamirileve dhikwaaye, kadhariyele. Dhaalive dhootakala wona mwakaleliiwa, gahirurumuwa. 22Gahigonelavo teto, gahiroha mangala matanu nameenddi a mahele apama ni malubale egakumile vamutatini mmohive. 23Voohulogela yahikuma mangala mamohi matanu nameenddi oovabala, owoondda, owummeene mwaha wa pevo yooviha. 24Vevale mangala ale oovabala yahaamira mangala makwaaye matanu nameenddi apama. Gihawaaddela amasenga mbwenye kalivo waandile ogitapulela dhedhi>>.

25Mowinda Zhuuze ahiiraga wa Farawo: <<Dhooroha dhaabiilidhene nda si emohive. Mulugu diirilena wuwaaddelani, mwene eyene enadhiiye eerena. 26Ng'ombe tanu nabiili dhooruva ni mangala matanu nameenddi apama dhinatapulela yego emohive, yaaka tanu nabiili. 27Ng'ombe tanu nabiili dhootakala, dhowoondda ni mangala oovabala, owumma ni pevo yooviha dhili yaaka tanu nabiili dha dala enafuna odha. 28Si eyene guwaaddeliimini mwene: Mulugu dinamooniha Farawo eyene enadhiiye eerena. 29Dhinoodha yaaka tanu nabiili dha dhilo elabo yaatene elena ya wEgubuddu. 30Mbwenye osogolo wiwa, dhinoodha yaaka tanu nabiili dha dala. Athu enoodha eddiwaale dhilo dhili mu Egubuddu, dala eyene enoodha enoonge elabo ela. 31Eneere ekale dala ya owali wi dhooja dhaatedhene dhareeliwe dhinoodha dhimale. 32Oroha weenyu, mwene, wiireyile dila biili sowi Mulugu onowiirana ebaribareene, voohulogela.

33<<Va mwaha olena, mwene, enofwaneela wi mmusayele mulobwana oononelamo a tthottho, mmwinke wi asogolele elabo ela. 34Mwaasakule apogo, mwaarume mwiilaboni ela ya wEgubuddu yatugumanye ya neetanu ya dhooja dhaatedhene dha yaaka dhedhi tanu nabiili dhapama dhinafuna odha. 35Etugumanye dhooja dhaatedhene dha yaaka dhedhi dhapama, elogolele mmaluwani, mmatatani a mwene. 36Ndala enoodha ekameele yooja yowaakamihedhagana athu aatene mwa yaaka dhedhi tanu nabiili dha dala enafuna okalawo wEgubuddu. Mweera ndo athu kinaakwe dala>>.#41.33-36 Muthu mmohi oovuwa wona Zhuuze onowaanda okalana ononelamo wa Mulugu woosasanyedha dhoorusa. Nakalana mpatha yoowoga ni athu yinna othongi enofuneya naalagege mukalelo wookamihedha nlogo mowaakwanela. Nihoovege owoga vameentoni va apogo Mulugu anihiya ogumana ni aliwa.

Zhuuze onosakuliwa okala musogoleli a wEgubuddu

37Yoowoga ya Zhuuze yahimuriyelaga Farawo ni anamalaga aaye aatene. 38Vevale Farawo ahiiraga wa anamalaga: <<Nneere omfwanya ebaribareene muthu owindala, odhaaliwa muneba wa Mulugu?>> 39Mowindala ahiwogaga wa Zhuuze, wiira: <<Vowi Mulugu ohuuvaha ononelamo dhego nda, kalivo muthu mmohi oononelamo a tthottho owuukwaranya weevo. 40Wambeela peeno oneere okale musogoleli a omwene waaga, athu aaga aatene eneerege wuwiiwelela. Miyo gineere gikale mpogo owuukwaranya weevo vowi gili mwene>>. 41Ahiwelelaga owoga Farawo, eeraga: <<We oli musogoleli a elabo yaatene elena ya wEgubuddu>>. 42Ahidhaagana pethe yaaye yoomwene,#41.42 Pethe yaaye yoomwene Dhego thaaru nda dhavahiwe Zhuuze dhaali dhitoonyihedho dha othongi wa Farawo wona karimbu, oyene wavahiwe Zhuuze. omuwariha Zhuuze. Ahimuwarihaga guwo dha mutheengo wookwima ni mungoyi wa oro mukohi mwaaye. 43Mwene ahimugwelihaga gareeta yaaye ya nabiili, yoomwene. Osogolowa ookuweliwaga, yiiraga: <<Mukokoreleni!>> Mowindala Zhuuze ahisakuliwa okala musogoleli a wEgubuddu waatewene.

44Farawo ahiwogaga ni Zhuuze, wiira: <<Miyo gili mwene, mbwenye waahirumeedhela, kalivo oneeregena yego mu Egubuddu mwemu>>.

45Farawo ahimvahaga Zhuuze ndina nimohi, Zafinati-Paneya. Ahimuteliha ni Azenati mwaana a Potifera, namakutha a oOni. Vevale Zhuuze ahambeela weeddelela elabo yaatene ya wEgubuddu.

46Zhuuze aganna yaaka makumi maraaru fambeeliiye mabasa wa Farawo mwene a wEgubuddu. Ahivenyaga wa mwene, weddeeddaga Egubuddu aatene. 47Va yaaka dhedho tanu nabiili dha dhilo, theya yahivaha dhoovaha dhijinji. 48Zhuuze ahitugumanya dhooja dha yaaka dhende dha dhilo tanu nabiili, yahilogolela mmatatani a maluwa a wEgubuddu. Nluwa ni nluwa yoologolela dhooja dha midda dhowapeelela. 49Ndala Zhuuze ahaanda otugumanya dhooja dhijinji, wona miseenga dha munyaza. Ahihiya opima, vowi kadhandeya.

50Ehinafiye yaaka ya dala, Azenati, mwaana a Potifera, namakutha a oOni, ahimbalela Zhuuze ahima abiili. 51Owambeela, Zhuuze ahimuthwa ndina nowi Manasesi,#41.51 Manasesi mu ewogelo ya eHeberi nneeweya wona: Oddiwaala. wiira: <<Mulugu ohiirihedha wi giddiwaale goyi yaaga yaatene vamohi ni amudhaaga>>. 52A nabiili ahimuthwa ndina nowi Efarayimu,#41.52 Efarayimu mu ewogelo ya eHeberi nneeweya wona: Okalana ahima. wiira: <<Mulugu ohiirana wi gikalena ahima mwiilaboni mwarabulihiwiimi>>.

53Dhigamalile yaaka dhende tanu nabiili dha dhilo wEgubuddu, 54yahambeela dala ya yaaka tanu nabiili wona Zhuuze mwawogiliiye. Dhilabo dhaatedhene mwahikala dala, mbwenye wEgubuddu wahikala dhooja. 55Athu a wEgubuddu vambeeliwa ovoliwa dala, yadhowa wa Farawo olobaga dhooja. Oliye owawaakula aatene, eeraga: <<Dhowani wa Zhuuze, eyene oneeriiye oorumeni, mwiirena>>.

56Dala vaakwaniliiwa elabo yaatene, Zhuuze ahifugula matata a dhooja wi aagulihedhege aEgubuddu, vowi dala yahitthabwa wEgubuddu. 57Athu a dhilabo dhaatedhene yoodhowa wEgubuddu wi yagulege dhooja ni Zhuuze, vowi dala yootthabwave dhipaddi dhaatedhene.#41.57 Mulugu ahimuroromeliha Abarahamu wi elabo enakale yoreelihiwa wa anamabaliwelamo. Vala nnowoona wi mmohi wa anamabaliwelamo, di Zhuuze, oliye ahikamihedha elabo yaatene mu mudhidhi wa dala. Moone Wambeela 12.2-3.

Currently Selected:

Wambeela 41: tke

Highlight

Copy

Compare