Wambeela 40

Zhuuze onotapulela dhooroha dha athu abiili

1Egavirile malabo, musogoleli a dhoong'wa#40.1 Musogoleli a dhoong'wa aali alobwana ala abiili basasanyedha dhooja ni dhoong'wa dha Farawo. Yoolawiha dhaatedhene Farawo ahinaje wi yoone akala kadhanna yoopa. ni musogoleli oosasanya mikaathe yahimuthegelaga nabwiya eewa Farawo, mwene a wEgubuddu. 2Farawo ahitakaleliwaga mmurimani ni anamalaba alene abiili, musogoleli a dhoong'wa ni musogoleli osasanya mikaathe.#40.2 Farawo naali ndina na musogoleli mulubale a Egubuddu, wona <<Kingi>> nili ndina na mwene mulubale a aTakwani. Farawo onawogiwa muniivuru na Okuma kahuwo mmohive ni Farawo ola. 3Ahaafugelaga mukaambura eyene yaali vaade va mpogo a aliba waang'anela, mwemo Zhuuze mwafugeliwiiye. 4Mpogo a aliba waang'anela ahimwiikelelaga Zhuuze alobwana ale abiili wi aakamihedhege. Yahimalaga mudhidhi mwijinji egali mukaambura mwemule.

5Nlabo nimohi musogoleli a dhoong'wa ni musogoleli oosasanya mikaathe dha mwene a wEgubuddu egali mukaambura mwemule, abiili ale yahirohaga mahiyu. Dhooroha nde dhatapulelaga moohiyana-hiyana. 6Obebehini wiwa, Zhuuze agawaaddamele, ahaafwanyaga abiili ale ekubanyaga. 7Vevale ahaakohaga anamalaba ale a Farawo, eeraga: <<Peeno kove dheenyu kadhihagalale mwaha bwaddi?>> 8Aliwa yahimwaakulaga, wiira: <<Sowi niire oroha mahiyu, kuhukalavo owaanda onitapulela dhooroha dheehu>>. Vevale Zhuuze ahiiraga: <<Mulugu dinaatapulele dhooroha ndo! Gaaddeleni dhooroha deenyu>>.#40.8 Mulugu dinatapulela dhooroha mooligana. Mwaasuuzihaga amohiwa enofuneya wawaaddeliha mwemo Mulugu munakamihedheliiye mudhidhi woorusa. Okale oononelamo ni oliba murima owogege ni athu oofuneya wona Zhuuze muwogeliiye. We ohukalana murima oyene teto?

9Musogoleli a dhoong'wa ahambeelaga; omwaaddela Zhuuze yooroha yaaye, eeraga: <<Girohile muthanko wa uuva odhaaga osogolo waaga. 10Muthanko ole wahikanna mijindda dhiwa miraaru, dhipwedheyaga, dhaaluwaga tododhiwa, dhivaha miwowo dhoovaha dhiwa dhowiitwadhene. 11Mmadani mwaaga mugali nakoma a Farawo. Gihapaga dhoovaha dhiwa, gifinyedhaga munakomani mwemule, gimvahaga oliye>>.

12Zhuuze ahimwaaddelaga, wiira: <<Yootapulela ya yooroha eyene si ela: Mijindda miraaru dhinatapulela malabo maraaru. 13Yavira malabo maraaru, Farawo onodha oovenyihemo mukaambura mwemu wi owelele mabasa aawo yaalabiiwe. Mowindala oneerege omwiikelela Farawo nakoma aaye mmadani ni dhoong'wa wona weereliiwe ogali musogoleli a dhoong'wa. 14Ginowuuloba wi oguubuwelele mabasa aawo yeeddaga pama, okale oowoma murima wagiwogelelege wa Farawo wi miyo givenyemo mukaambura mu. 15Vowi gihiddiwe owanuhu, elabo ya aHeberi, wuno kagiirile yego yoofwaneelela ofugeliwa mukaambura mu>>.

16Musogoleli oosasanya mikaathe vooniligiiye wi Zhuuze ahitapulela mwa pama yooroha ele, ahiiraga wa oliye: <<Miyo girohile ngapwathele middanga miraaru dha mikaathe vamuru. 17Muddanga waali vadhulu mwahikala bolu ni mikaathe dha misawo-misawo dha Farawo. Dhoodha balame dhijaga dhooja dhapwatheliimi vamuru>>.

18Zhuuze ahimwaaddelaga, wiira: <<Yootapulela ya yooroha eyo si ela. Middanga miraaru dhinatapulela malabo maraaru. 19Yavira malabo maraaru Farawo onoodha avenyihewo muru waawo, otomeyiwe vamuthankoni, balame dinoodha dhijege muruthu waawo>>.

20Ebaribareene egamalile malabo maraaru, Farawo ahisasanyaga mathanga owaakwaniha yaaka dhaaye, waavaha yooja anamalaga aaye aatene. Vaari va athu aatene alene, ahimvenyihagamo mukaambura musogoleli a dhoong'wa ni musogoleli osasanya mikaathe. 21Ahimuwelihedhaga mabasa aaye musogoleli a dhoong'wa wi amvahege Farawo nakoma aaye mmadani. 22Wa musogoleli osasanya mikaathe, ahithongaga wi asijiwe, atomeyiwe vamuthankoni wona mwemule Zhuuze mwatapuleligiiye. 23Mbwenye musogoleli a dhoong'wa ahiddiwaalaga omuwogelela Zhuuze wa Farawo.

Currently Selected:

Wambeela 40: tke

Highlight

Copy

Compare