Wambeela 39

Zhuuze vaade va Potifare

1Zhuuze ahidhowiwagana wEgubuddu ni aZhumayili; yahimugulihedhaga mu Egubuddu Potifare, namalaba oororomeleya, mpogo a aliba waang'anela a Farawo, mwene a wEgubuddu.

2 Nabwiya aali ni Zhuuze; dhaatedhene dhoomweeddela pama alabaga vaade va mu Egubuddu ole. 3Nabwiya a Zhuuze ahoona wi Nabwiya aali ni oliye, oomukamihedha mwa dhaatedhene dhahiddiiye. 4Potifare oohagalala ni Zhuuze, omwiira namalaba aaye oororomeleya omwinka anamalaba ni dhooreela dhaatedhene dha vaade vaaye wi Zhuuze ang'anelege.#39.4 Zhuuze aali namalaba apama. Oolaba malabo maatene afunaga wi vaade vale vikalege mpurelo. Ki we? Onolaba ni kopolo ni efunelo wona Zhuuze? Enofuneya niharege efwanafwaniho yaaye. 5Wambeela vevale Zhuuze venkiwiiye ni Potifare anamalaba ni dhooreela dhaatedhene dha vaade vaaye, Nabwiya ahireeliha dha vaade va muEgubuddu ole. Ahireeliha dha vaade teto ni dha mmiddani mwene mwaha wa Zhuuze. 6Mowindala, Potifare ahimwihiyedha dhaatedhene mmadani mwa Zhuuze; kaapwatha yego ehili yooja yajiiye.

Zhuuze aali mulobwana oofwaneeliwa ni ooriya. 7Ogavirile mudhidhi, mwadha Potifare ahambeela omfuna Zhuuze, wiira: <<Odhe, ogone ni miyo>>. 8Zhuuze ahikooddaga, owoga ni mwadha nabwiya aaye, wiira: <<Moone wi veva nabwiya aaga kaasanyeya ni dhego dhaaye. Ohugihiyedha wi gaang'anelege. 9Kalivo vaade va ogikwaranyile miyo, dhaatedhene ginolamula ohiya nyo muli mwihiyanaaye. Gineere gaande addi wiirana yego yootakala yowi ndala wi gimuthegele Mulugu?>>#39.9 Zhuuze ahinona wi dhoothega dhaatedhene soomutakalela Mulugu. Vamohi nnowuubuwela wi omunyengetha muthu kahuwo yego yuulubale, mbwenye owoga mwa ebaribari nnomuthegela Mulugu, kannamuthegela muthuve, baahi. 10Malabo maatene oomuloba Zhuuze, mbwenye oliye ookoodda ogonana. 11Nlabo nimohi Zhuuze ahivolowaga mba wi ahiddege mabasa aaye, mudhidhi olene kaaligivo namalaba mmohi vaade vale. 12Mwadha Potifare ahihiddaga yoowara ya Zhuuze, wiira: <<Ogone ni miyo!>> Mbwenye Zhuuze ahithawelaga vaade, omwihiyedha yoowara ele mmadani. 13Vevale mwadha Potifare, vooniligiiye wi ohalilena yoowarave mmadani, oliye agathawile, 14ahawiithanaga anamalaba amohi a vaade vale, wiira: <<Koonani! Mamunaaga ohunidheelana muHeberi ola vaade va, ohambeela onipudha. Ahidha wi agone ni miyo, mbwenye miyo gahikuwa. 15Vagiiwiliiye okuwa othathila yoowara yaaye, othawela vaade>>.#39.10-15 Weehiwa oli wakopolo vajinji. Soofuneya nithawege moothamaga neehiwaga. Thalako ya Zhuuze enanooniha wi dhinowaandeya okala ni egumi yoweela vaari va elabo ela ya dhoothega.

16Oliye ahilogolelaga yoowara ele ofiyedha nabwiya a Zhuuze odhawo. 17Ahimwaaddelaga mwaha ole, wiira: <<Mudhaari ole muHeberi mugirumihedhiinyu vaade va ahidha wa miyo wi agipudhe. 18Vakuwiimi, ohiya yoowara yaaye ela, othawela vaade>>.

19Nabwiya aaye ole a Zhuuze ahitakaleliwaga, veewiligiiye yoowoga ya mwihiyanaaye, eeraga: <<Mudhaari eenyu dhigiireliiye si nda>>. 20Zhuuze ahihiddiwaga, ofugeliwa mukaambura, mwemo mwaang'aneliwa athu yamuthegela mwene. Oliye agalive mukaambura mwemule, 21Nabwiya aali ni Zhuuze; owoonihedha wa oliye odhivela waaye. Wiirana wi Zhuuze amuhagalalihege mpogo a mukaambura mule. 22Mpogo ole ahimwinka Zhuuze athu aatene oohiddiwa wi aakamihedhege ni osugwa mabasa maatene. 23Mpogo a mukaambura kaasanyeya ni dhego dhaali mmadani mwa Zhuuze mwaha wi Nabwiya aali ni oliye. Nabwiya ahiirana wi dhaatedhene dhahiddiiye dhimweeddelege pama.#39.23 Mulugu onowaanda onireeliha namwiimelela mwa mabasa oofuneya vajinji ni wiiyeviha. Kavili ohiyana ni Oliye. Ohiya okubanya, ni wuundda mwaha wa dhomwiireyela, Zhuuze alaba ni ororomeleya ni wiiyeviha mukaambura. Ala bi makalelo omweebedha Mulugu vili vaatevene. Mulugu ononivaha ya mahala nakala oororomeleya.

Currently Selected:

Wambeela 39: tke

Highlight

Copy

Compare