Okuma 9

Mulili wookwa aneenyama

1Nuwindo Nabwiya ahiwogaga ni Mozezi, wiira: <<Odhowe wamwaaddele Farawo, weere: <Nabwiya, Mulugu a aHeberi dinawoga, eeraga: <<Waahiye athu aaga wi yagilabege>>. 2Mbwenye walibihedhave waawadeeliha wi ehidhowege, 3kopolo dha Nabwiya dhinoodhana yoolaga ya mulili. Ela enoodha yaape akavalo eenyu, abuuru eenyu, akamelo#9.3 Kamelo aali mwaneenyama mulubale athukula dhoobo. eenyu, ng'ombe dheenyu, ni mabila eenyu. 4Mbwenye Nabwiya onoodha agawe dhoofuwa dha aEzarayeli ni dha aEgubuddu wi dhihikwe aneenyama aEzarayeli> >>. 5Nabwiya ahitoonyaga mudhidhiya, wiira: <<Menselo Nabwiya fineeriiye eerena mwiilaboni mwemu>>.

6Ebaribareene, omenseloni wiwa Nabwiya ahiiragana elena, vano dhoofuwa dhaatedhene dha aEgubuddu dhahikwa mbwenye dha aEzarayeli kadhakwile, naariwene emohi. 7Farawo ahaarumaga athu wi yoone dhoofuwa dha aEzarayeli. Aliwa yahimwaaddelaga wi kadhakwile. Naari ndala Farawo murima wahimumma, kaahiyilege athu wi emaruwe.

Mulili wa analibwe oopuduwa

8 Nabwiya ahiwogaga wa Mozezi ni Aroni, wiira: <<Muhavule mmadani mweenyu nddoora na muthukuthani, vano Mozezi avavihedhe odhulu, Farawo oonaga. 9Nenddo nneere nsadduwe nikale nthubi nivavele veelaboni yaatene ya wEgubuddu. Ndda nneere osadduwa nikale analibwe enapuduwege wi ekale makwadda wa athu, ni wa aneenyama aatene a elabo ya wEgubuddu>>.

10Aliwa yahithukulaga nddoora na muthukuthani, vano yahooneyihaga wa Farawo. Mozezi ahivavihedhaga odhulu, vano nahisadduwaga okala analibwe ayene yahipuduwa osadduwaga anamungovola wa athu ni wa aneenyama. 11Amasenga kayaandile ofiya vameentoni va Mozezi mwaha wa analibwe oopuduwa. Yaali ni aliba masengeene wona teto aEgubuddu aatene. 12Naari ndala Nabwiya ahummiha murima wa Farawo, ohurumeedhela wona Nabwiya mwawogeliiye ni Mozezi.

Mulili wa muzongwe a maralala

13 Nabwiya ahiwogaga ni Mozezi, wiira: <<Ovenye bebeheene, wagumane ni Farawo, omwaaddele, wiire: <Nabwiya, Mulugu a aHeberi dinawoga wi: Waahiye athu aaga emaruwe wi yagilabege. 14Vano ginoodha girumihe mulili dhaaga dhaatedhene wa weevo mwiinya, wa anamalaga aawo ni wa athu aawo, onone wi mwiilaboni yaatene ya vati kalivo onafwanafwana ni miyo. 15Gahaafune wuupa ni athu aawo aatene ni yoolaga ya kopolo dhaaga, wootolowa mwiilaboni ya vati. 16Gahuulogolela wi gawoonihedhe kopolo dhaaga wi ndina naaga nivuwihiwe mwiilaboni yaatene. 17Naari ndala onowaakooddiha athu aaga wi emaruwe. 18Menselo mudhidhi wowi huulena ginomurubwiha muzongwe mujinji a maralala, oyene ohunarubwege wEgubuddu wambeela vevo vipaddusiwe elabo eyo ofiyedha peeno. 19Vano wavenyihevo ng'ombe dhaawo ni dhego dhaatedhene dhili ode. Athu aatene ni aneenyama waathawihedhe mba, vowi dhafwanyiwave muzongwe a maralala oyo dhinookwa> >>.

20Anamalaga amohi a Farawo yahoovaga madhu a Nabwiya, yahaathawihedhaga mba anamalaba eewa ni aneenyama eewa. 21Ale yaheewelelege madhu a Nabwiya yahaahiyaga ode anamalaba eewa ni aneenyama eewa. 22Nabwiya ahiwogaga ni Mozezi, wiira: <<Otedeedhele moono odhulu, wewo onoodha odhe muzongwe mulubale a maralala emorele elabo yaatene ya wEgubuddu. Enoodha yaaddwadhe athu, aneenyama ni dhoovaha dhaatedhene dha mmiddani mwa elabo eyene>>. 23Mozezi ahitedeedhelaga mukumbuzo waaye odhulu, vano Nabwiya ahirumiha ozherima, maralala ni dari veelaboni. Ebaribareene Nabwiya ahimurubwiha muzongwe a maralala elabo ya wEgubuddu. 24Maralala ale yaali malubale ni dari dhooharana, yaaligi yego ehineereyege wambeela vevale athu vamagiliiwa wewule. 25Mwiilaboni yaatene ya wEgubuddu, muzongwe ole a maralala ahiddwadha onoonga dhego dhaatedhene dhaali ode, wambeela athu, aneenyama, dhoovaha, ni mithanko dhaatedhene dha mukokolani. 26Mbwenye muzongwe ole a maralala kaafiyile elabo ya oGoxeni wakala aEzarayeli.

27Vevale Farawo ahimwiithanaga Mozezi ni Aroni, wiira: <<Vano gihithega. Nabwiya dowogoowa, ndala miyo ni athu aaga nihikalana muladdu. 28Lobani wa Nabwiya. Dhihinaakwana dari dhedhi dhuulubale ni muzongwe ola a maralala. Miyo ginoodha guuhiyeni mudhowege; kamudha mukalave mwemu>>.

29Mozezi ahaakulaga, wiira: <<Gaakumaga muluwani mu ginomuloba Nabwiya. Dari nda dhinomaala, ahikalewo teto muzongwe a maralala wi munone yowi elabo ela sa Nabwiya. 30Mbwenye gihinona wi nyoovo ni anamalaga eenyu ebaribareene nivanove kamunamoova Nabwiya Mulugu>>.

31Nthoje ni mahele dhahinoongeya, vowi dheereya mahele egamagile mihubu vano nthoje niganna todo. 32Mbwenye tirigu ni dhoodhaliwa dhimohi kadhawaxuliwe vowi dhaali dhihinamele.

33Mozezi ahivenyagavo va Farawo ahikumagamo muluwani mule, otadeelela moono wa Nabwiya, olobela. Dhahimaalaga dari ni muzongwe a maralala ahiremusaga, kuhurubwaga mwiilaboni. 34Vooniliiye Farawo wi muzongwe ni dari dhahimaala ahiwelela othega; wummiha murima waaye vamohi ni anamalaga aaye. 35Vevale Farawo mwa ohaaddeleya waaye kaarumeedhele wi aEzarayeli emaruwe wona Nabwiya mwawogeliiye ni Mozezi.

Currently Selected:

Okuma 9: tke

Highlight

Copy

Compare