Okuma 8

1Oliye ahiwogaga ni Mozezi, wiira: <<Dhowa wa Farawo wamwaaddele, wiire: <Nabwiya dinawoga wi: Ohiye mulogo waaga wi wagilabege. 2Wakooddiha mulogo waaga odhowa, ginoodha guurabulihe ni anamujoro elabo yaawo yaatene. 3Mwihinje onoodha waatotore anamujoro ajinji. Ayene enaagwelege evolowege mba mwaawo, vakamani vaawo, ni nyuba dha anamalaga aawo, ni wa athu aawo aatene, ni mwemule munosiinyumo mikaathe dheenyu ni moopiya mweenyu. 4Anamujoro enaadheege wa we, wa athu aawo ni wa anamalaga aawo aatene> >>.

5Ahiwoga teto Nabwiya wa Mozezi, <<Omwaaddele Aroni, wiire: <Wogoole moono, otoonye ni mukumbuzo waawo mihinje dhaatedhene dhuulubale ni dhing'onong'ono, ni mahinje a mmathiyani vano wabalalesele anamujoro elabo ya wEgubuddu> >>. 6Ndala Aroni ahogoolela moono waaye mahinje a wEgubuddu, vano yahigwela anamujoro, ohuruwedha elabo elene. 7Mbwenye amasenga a Egubuddu yahiirana ndale teto mwa masenga eewa, yahaadhana teto anamujoro elabo ya wEgubuddu. 8Farawo ahawiithana Mozezi ni Aroni, wiira: <<Lobelani wa Nabwiya wi aavenyihevo wa miyo anamujoro ala ni wa athu aaga. Vano ginoodha gilamulele mulogo odhowege wi wakuthe mukutho wa Nabwiya>>.

9Mozezi ahimwaakula Farawo, eeraga: <<Munafuna gamulobele Nabwiya alini wi aavenyihevo anamujoro wa nyoovo ni wa anamalaga eenyu, wa athu eenyu, ni mba mweenyu wi ekale mmwihinjenive?>> 10Oliye ahaakulaga, wiira: <<Menselo>>. Mozezi ahiiraga: <<Dhikale ndo wona muwogeliinyu, munone wi kalivo teto mmohi wona Nabwiya Mulugu eehu. 11Enoodha evenyevo anamujoro va nyoovo, mmanyubani mweenyu, mwa anamalaga eenyu ni wa athu eenyu. Anamujoro enodha ewelele mmwihinjeni>>.

12Vevale yahivenyavo Mozezi ni Aroni wa Farawo. Mozezi ahikuwa wa Nabwiya wi aavenyihevo anamujoro yamurumihedhiiye Farawo. 13Nabwiya ahiirana wona yooloba ya Mozezi; okwa anamujoro yaali mmamba, vaade ni mmiddani. 14Athu yahawuugela milu ni milu, vano elabo yoonukwa yuudde. 15Vooniliiye Farawo wi yahivenyihiwavo anamujoro ale, ahummiha teto murima waaye, karumeedhele wona Nabwiya mwawogeliiye.

Mulili wa dhimbu

16 Nabwiya ahiwogaga ni Mozezi, wiira: <<Omwaaddele Aroni, wiire: <Othukule mukumbuzo waawo oddwadhe nthubi na theya wi nsadduwe dhimbu, dhikale veelaboni yaatene ya wEgubuddu> >>. 17Yahiirana ndo; Aroni ahithukula mukumbuzo waaye oddwadha nthubi na theya, vano dhahaadheela dhimbu athu ni aneenyameene. Nthubi naatenene na wEgubuddu nahisadduwa dhimbu. 18Amasenga yahixixa osasanya teto dhimbu mwa masenga eewa mbwenye kayaandile. Ebaribareene athu ni aneenyama yahirijiwa ni dhimbu. 19Vevale amasenga yahiwoga ni Farawo, yiiraga: <<Ela mwiinya di Mulugu diirilena>>. Mbwenye Farawo murima wahimumma, kaarumeedhileve wona Nabwiya mwawogeliiye.

Mulili wa gulihi

20 Nabwiya ahiwogaga ni Mozezi, wiira: <<Ovenye bebeheene, wagumane ni Farawo aadhowaga ohaba wiiko, vano omwaaddele, wiire: <Nabwiya dinawoga wi: Waahiye athu aaga wi yagilabege. 21Mbwenye waahirumeedha waahiya athu aaga, ginoodha guurumihedhe makwedda a gulihi, wa we ni wa anamalaga aawo, wa athu aawo ni mmanyubani mwaawo. Mmanyubani dha aEgubuddu mwahidhaala makwedda a gulihi, yahihuruwedha theya yaatene. 22Nlabo nenddo ginoodha gitale munddile wa elabo ya oGoxeni wewo omagile athu aaga wi aliwa dhihaafwanye gulihi dhedho; vano onone wi miyo Nabwiya gili mwiilaboni mwemu. 23Ginoodha gaamwalanihe athu aaga ni athu aawo. Menselo eneere yiireye etoonyihedho elena> >>.

24 Nabwiya ahiirana ndo; yahivolowa makwedda malubale a gulihi dhedhi mmanyubani dha Farawo ni dha anamalaga aaye. Dhahitakaliha elabo yaatene ya wEgubuddu. 25Farawo ahawiithana Mozezi ni Aroni, owoga, wiira: <<Dhowani wi mwakuthe mukutho wa Mulugu eenyu mwiilaboni mwemu>>. 26Mozezi ahimwaakulaga, wiira: <<Dhinorumeedheya wi hiyo nikuthe mukutho wa Nabwiya Mulugu eehu mwiilaboni elena, vowi dhili dhootadhiwa mwa aEgubuddu. Neera wi nikuthe mukutho mwemu muliiwa, kinanipe ni mabwe? 27Nnafuna needde olenddo wa malabo maraaru nidhowaga mwiiddeddereni wi nakuthe mukutho wa Nabwiya, Mulugu eehu wona munilamuleliiye>>.

28Ndala Farawo ahiira: <<Ginowuuhiyani wi mwakuthe mukutho wa Nabwiya Mulugu eenyu mwiiddeddereni mbwenye muhudhowe woolapelawene. Mugilobelele teto miyo>>. 29Mozezi ahimwaakulaga, wiira: <<Ginoovenyavo va nyoovo wi gamulobele Nabwiya. Menselo makwedda alena a gulihi enoovenyavo wa Farawo, wa anamalaga eenyu, ni wa athu eenyu. Mbwenye Farawo muhuginyengethe teto wi muhaahiye athu odhowa okutha mukutho wa Nabwiya>>. 30Vevale Mozezi ahivenyagavo va Farawo, ahilobelaga wa Nabwiya. 31Nabwiya ahiirana wona yooloba ya Mozezi. Gulihi dhahivenyavo va Farawo ni va anamalaga aaye vamohi ni athu aaye, kayahalileve gulihi, naari emohi. 32Mbwenye dila ela teto Farawo ahummiha murima waaye kaahiyileve athu wi emaruwe.

Currently Selected:

Okuma 8: tke

Highlight

Copy

Compare