Okuma 7
7
1Vevale Nabwiya ahiwogaga ni Mozezi, wiira: <<Osugwe wi guwiirile wona Mulugu vaari va Farawo, vano ddibilo Aroni wona namavuhulela aawo. 2Weevo omwaaddelege ddibilo Aroni dhaatedhene gineerigiimi guulamulelege, oliye amwaaddelege Farawo wi aahiye aEzarayeli evenyemo mwiilaboni mwaaye. 3Mbwenye ginoodha gimummihe murima Farawo wi geenjedhedhe dhitoonyihedho ni dhootikiniha dhaaga mwiilaboni ya wEgubuddu. 4Farawo kadha arumeedha mbwenye miyo ginoodha goonihedhe kopolo dhaaga mu Egubuddu. Ginoodha gikumihemo mulogo waaga, aEzarayeli, makuru aaga a anyakoddo, gaathonge ni goyi ejinji aEgubuddu. 5Enoodha enone aEgubuddu wi miyo gili Nabwiya, veva ginoonihiimi kopolo dhaaga, gaavenyihagamo aEzarayeli>>.
6Mozezi ni Aroni yahiirana dhedho wona Nabwiya mwaarumeliiye, yahiiragana ndo. 7Mozezi anna yaaka makumi matanu namaraaru (80), Aroni anna yaaka makumi matanu namaraaru ni yaaka thaaru (83) mudhidhi wawogiliisu ni Farawo.
Mukumbuzo wa Aroni
8 Nabwiya ahiwogaga wa Mozezi ni Aroni, wiira: 9<<Akala wi Farawo oorumani wi: <Mwiirena yootikiniha>, omwaaddele Aroni wi athukule mukumbuzo waaye avokedhe vinaakale Farawo. Oyene onoodha osadduwe nyowa yuulubale>>. 10Veva Mozezi ni Aroni yahigumana ni Farawo, wiirana wona valamuleliwiiwa ni Nabwiya. Aroni ahivokedhaga mukumbuzo waaye vaaligi Farawo vamohi ni anamalaga aaye; mukumbuzo osadduwa okala nyowa yuulubale. 11Farawo ahawiithana atthottho, akwiri ni amasenga aEgubuddu. Aliwa yahiirana emodha-modhave mwa masenga eewa. 12Yahivokedhaga mukumbuzo dheewa mmohi ni mmohi, vano mikumbuzo dhahisadduwaga nyowa. Mbwenye mukumbuzo wa Aroni wahimira mikumbuzo dheewa. 13Naari ndala Farawo murima wahimumma, kaarumeedhele wona Nabwiya mwawogeliiye.
Mulili wa mwazi
14 Nabwiya ahiwogaga ni Mozezi, wiira: <<Farawo murima ohumumma, onokoodda waahiya aEzarayeli wi edhowege. 15Menselo bebeheene Farawo onadhowa wiiko. Wamujejihege wewo wi wagumanena. Waadhowaga othukule teto mukumbuzo ole wasadduwile nyowa, vano weere: 16<Nabwiya, Mulugu a aHeberi ohugiruma odha wa nyoovo wi guwaaddeleni wi mwihiye mulogo waaye wamulabe mwiiddeddereni, mbwenye nyoovo nivano kamuneewave>. 17Ndala Nabwiya finawogiiye wi: <Mwa elena onoodha onone wi miyo gili Nabwiya. Mukumbuzo ginniimina ginoddwadhana mahinje ala, vano enosadduwa ekale mwazi. 18Somba dhili mmahinjeni mu dhineere okwa. Mahinje a mwihinje ola eneerege onukwa, vano aEgubuddu yaang'waga eneerege waweeddiha murima> >>.
19Ahiwogaga teto Nabwiya ni Mozezi, wiira: <<Omwaaddele Aroni wi athukule mukumbuzo waaye aatoonye mahinje a wEgubuddu, a mihinje dhaatedhene dhuulubale ni dhing'onong'ono, mmathiyani, ni mmaceelani, ni mwaatemwene munaaheliiwa wi ekale a mwazi. Elabo yaatene ya wEgubuddu edhaale mwazi, naari mmunoni dha mithanko ni dha mabwe>>. 20Mozezi ni Aroni yahiirana ndala wona Nabwiya mwaalamuleliiye. Aroni vavenyihiliiye mukumbuzo, ahaaddwadha mahinje a mmwihinjeni; Farawo ni anamalaga aaye emoonaga. Mahinje maatene yahisadduwa mwazi. 21Ebaribareene somba dhahikwamo mmwihinjeni vano mwihinje woonukwa nriba nootakala. Vevale aEgubuddu kayaanda ong'wa mwaha elabo yaatene ya wEgubuddu yahidhaala mwazi. 22Mbwenye amasenga aEgubuddu yahiirana ndala teto mwa masenga eewa. Va mwaha olena Farawo murima wahimumma, karumeedhele wona Nabwiya mwawogeliiye. 23Ahivenyavo Farawo ahidhowa vaade vaaye, moohupwatha. 24AEgubuddu aatene yahitiba maceela seresere ya mwihinje wi efwanye mahinje apama, vowi mahinje a mwinko kayawaakwaniha waang'wa.
Mulili wa anamujoro
25Yavirile malabo matanu nameenddi Nabwiya vaaddwadhiliiye mahinje a mmwihinjeni.
Currently Selected:
Okuma 7: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
