Okuma 6
6
Mulugu onowaakwaneliha nipangano naaye wa aEzarayeli
1 Nabwiya ahiwogaga ni Mozezi, wiira: <<Vano onoodha woone ginafuniimi omwiirela Farawo. Ni kopolo dhaaga onoodha oohiyeni wi mudhowege, ni kopolo dhaaga onoodha owiigareni mwiilaboni mwaaye>>. 2Mulugu ahiwogaga teto ni Mozezi, wiira: <<Miyo gili Nabwiya. 3Geyooneyihile wa Abarahamu, Ezaaki ni wa Yakobo wona Mulugu oowodha-wodha, mbwenye ndina naaga nowi Nabwiya, aliwa kayaginonilena. 4Gahisasanya nipangano naaga no Waandana ni aliwa wi gaavahe elabo ya oKanani, wewo wamagiliiwa wona anamadha. 5Ndala gihiiwa wuundda wa aEzarayeli, alene aEgubuddu yawiiriiwa adhaari. Guhuubuwelela nipangano naaga no waandana ni aliwa. 6Mowindala, wawaaddele aEzarayeli, wiire: Miyo Nabwiya ginoodha guuruleni sapo dha aEgubuddu, guutapuleni muudhaarini mweenyu guwooboleni ni moono waaga wowuuba, gaathonge aEgubuddu ni dhowiireya dha kopolo. 7Ginoodha guuthukuleni mukale mulogo waaga, ginoodha gikale Mulugu eenyu. Muneere munone wi miyo gili Nabwiya, Mulugu eenyu wuurulileni sapo dha aEgubuddu. 8Ginoodha guudhowiheni elabo eyene galibeleliimi waavaha makolo eenyu Abarahamu, Ezaaki ni Yakobo. Ginowuuvahani, okala yeenyu. Miyo gili Nabwiya>>.
9Mozezi ahawaaddelaga dhedhi aEzarayeli, mbwenye aliwa kayamwiiwelele mwaha wookathamiheya ni odhaari wa owali. 10Nuwindo Nabwiya ahiwogaga teto ni Mozezi, eeraga: 11<<Dhowa, wamwaaddele Farawo, mwene a wEgubuddu, wi aahiye edhowege aEzarayeli mwiilaboni mweewa>>. 12Mozezi ahimwaakulaga Nabwiya, wiira: <<Akala aEzarayeli kiiwile dhawogiliimi, ki Farawo onagiiwe addi? Teto kaginawoga pama>>. 13Mbwenye ndala Nabwiya ahiwogaga ni Mozezi vamohi ni Aroni wi yawaaddele aEzarayeli ni Farawo, mwene a wEgubuddu yowi: <<Nihilamuliwa waavenyihamo aEzarayeli mwiilaboni ya wEgubuddu>>.
Makolo a Mozezi ni Aroni
14Ala makolo ni asogoleli a emudhi ya aEzarayeli, eharihaga abaabi eewa:
Rubeni, mwaana owambeela obaliwa a Yakobo#6.14 Yakobo Naari wi: Ezarayeli. anna ahima ala: Hanoki, Palu, Hezironi, ni Karimi; alena asogoleli a emudhi ya Rubeni.
15Simiyoni anna ahima ala: Yemuweli, Yamini, Ohadi, Yakini, Zohari, ni Xawuli (ola amaaye yaali muKanani); alena asogoleli a emudhi ya Simiyoni.
16Leevi, oyene anna yaaka zana ni makumi maraaru ni yaaka tanu nabiili (137), anaaye baala, owambeela a mulubale ofiyedha oogomihedha: Gerexoni, Kowati, ni Merari.
17Ahima a Gerexoni, asogoleli a emudhi, baala: Libini ni Ximeyi.
18Kowati, oliye anna yaaka zana ni makumi maraaru ni yaaka thaaru (133), anaaye baala: Amerami, Yisari, Heboroni ni Uziyeli.
19Ahima a Merari baala: Mali ni Muxi.
Ala ba emudhi ya aLeevi wona mwa makolo eewa.
20Amerami mwihiyanaaye aali Yokobedi, muLeevi teto.#6.20 MuLeevi teto Naari wi: Murogora a ababa aaye. Alena yahaabala Aroni ni Mozezi. Yaaka dha Amerami dhaali zana ni makumi maraaru ni yaaka tanu nabiili (137).
21Ahima a Yisari baala: Kora, Nefege ni Zikiri.
22Ahima a Uziyeli baala: Mixayeli, Elezafani ni Sitiri.
23Aroni mwihiyanaaye aali Elixeba, mwaana a Aminadabi, murogora a Naxoni. Elixeba ahaabala Nadabi, Abihu, Eleyazari ni Etamari.
24Ahima a Kora yaali: Asiri, Elikana ni Abiyasafi. Baalena ahima a emudhi ya Kora.
25Eleyazari, mwaana a Aroni, mwihiyanaaye aali mmohi a ahima a Putiyeli, oliye ahimbala Fineyasi.
Baalena asogoleli a emudhi ya aLeevi wona mwa makolo eewa.
26Aroni ni Mozezi, baalena Nabwiya yaawogiligiiyena, eeraga: <<Mwaakumihemo mu Egubuddu aEzarayeli wona mwa makuru a anyakoddo>>. 27Aroni ni Mozezi, baalena yawogile ni Farawo, mwene a wEgubuddu wi yaakumihemo mu Egubuddu aEzarayeli.
Mulugu onomwiithana Mozezi ni Aroni
28Nlabo Nabwiya vawogiliiye ni Mozezi mu Egubuddu, 29ahimwiirelaga: <<Miyo gili Nabwiya. Omwaaddele Farawo, mwene aEgubuddu, dhaatedhene dhedho guwaaddeliimi>>.
30Mozezi ahimwaakulaga Nabwiya, wiira: <<Miyo gili muthu ooguguma, Farawo oneere agiiwe avi?>>
Currently Selected:
Okuma 6: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
