Okuma 5

Mozezi ni Aroni enowoga ni Farawo

1Ndala ahivenyaga Mozezi ni Aroni owoga ni Farawo, wiira: <<Nabwiya, Mulugu aEzarayeli dinawoga, eeraga: <Ohiye mulogo waaga wa Ezarayeli wi wagisasanyedhe mathanga mwiiddeddereni> >>. 2Farawo ahaakulaga, wiira: <<Nabwiya aawo baani wi miyo gimwiiwe owoga waaye, gaahiye aEzarayeli edhowege? Kagimunonile Nabwiya, kaginarumeedhela waahiya aEzarayeli wi edhowege>>. 3Aliwa yahiiraga: <<Mulugu a aHeberi ohugumana ni hiyo. Mowindala, munihiye wi nidhowe wiiddeddereni malabo maraaru wi nakuthe mukutho wa Nabwiya, Mulugu eehu, ahinanidheelena dhiredda naari koddo>>. 4Vevale mwene a wEgubuddu ahiiraga: <<We Mozezi ni Aroni, mwaha bwaddi munaahiiheliinyu athu olaba mmabasani mweewa? Dhowani, mwawelele mmabasani mweenyu!>> 5Teto Farawo ahiwogaga, wiira: <<Athu ala ehiinjiva waakwaranya a mwiilaboni mu, mbwenye nyoovo munowaahiiha mabasa eewa!>>

Farawo onoweenjedhedha waarabuliha aEzarayeli

6Nlabo nendde Farawo ahaalamulaga apogo a mabasa ni asupayi, wiira: 7<<Wambeela peeno odhowa musogolo muhaavahege manasi athu alena oosasanyana njola wona mweeresiinyu. Aliwa yaadhowelege, etugumanyege weekiiwa>>. 8Ahawaaddelaga teto wi wiinjiva wiwa wa njola okale wona malabo amundduli. <<Muhuvuguleve! Booyere, mwahaya buuyene enawogeliisu, yiiraga: <Ndoweni nakuthe mukutho wa Mulugu eehu>. 9Mweenjedhedhe mabasa wa alobwana ale, esugwiwege ohidda dhedho wi ehiiwelelege madhu ooratha>>.

10Ndala yahivenyaga apogo a mabasa vamohi ni asupayi, waaddela mulogo, yiiraga: <<Farawo dinawoga wi nuhuuvahegeni manasi.#5.10 Manasi Yataganyihedhana, yaponddaga theya, yowuubana njola. 11Mwaadhowelege weekiinyu wewo munooniinyu. Mbwenye kilivo nneeriihu nivugule va mabasa eenyu>>. 12Vevale athu yahimwadheyela elabo yaatene ya wEgubuddu osayela dhoolalela dha manasi baahi. 13Apogo a mabasa yowaavahesa mabasa yiiraga: <<Mwaaguve mmarihe mabasa eenyu wona vevale vaaliiwawo manasi>>. 14Asupayi ayene Farawo yaasakuliiye mwa aEzarayeli, yoowaxuliwa ni apogo a mabasa. Apogo ale yowaakoha, yiiraga: <<Mwaha bwaddi muhumariheliinyu mabasa a ndilo naari a peeno oosasanya njola wona mweeresiinyu?>>

15Asupayi aEzarayeli yahidhowa wa Farawo wiikubanyedha, yiiraga: <<Mwaha bwaddi munanirabulihiinyu mowindala hiyo, anamalaba eenyu? 16Manasi kinanivaha. Enoniruma teto yiiraga: <Musasanye njola>. Hiyo, anamalaba eenyu, nnowaxuliwa vihili mwaha, mbwenye athu eenyu bineeriha>>.

17Farawo ahaakulaga, wiira: <<Muli ooyere, vano muli ooyere! Veva munawogiinyu, mwiiraga: <Nidhowege nakuthe mukutho wa Nabwiya>. 18Dhowani dhiinoveva, mwalabege. Manasi ebaribareene kamunavahiwege, mbwenye ginafuna wiinjiva wa njola okalege wona mwemule guulamuleliimini>>. 19Vevale asupayi aEzarayeli yahihaleeliheya mwaha dhawaaddeliiwa wi: <<Kagidha givugulave wiinjiva wa njola guulamuleliimini wuuba nlabo ni nlabo>>. 20Evenyagavo vameentoni va Farawo yahigumanaga ni Mozezi vamohi ni Aroni, ayene yaajejihedhaga. 21Asupayi yahaawogana, yiiraga: <<Nabwiya owoonani oothongeni, mwaha wa nyo nihiiriwa ootadhiwa wa Farawo ni wa anamalaba aaye. Muhawinka mwaalago mmadani mweewa wi enipege>>.

22Vevale Mozezi ahiwelelaga wa Nabwiya, wiira: <<Nabwiya, munaarabulihela ddi mowindala athu ala? Vano mwagirumela ddi? 23Wambeela vevale giwogiliimi ni Farawo mu ndina neenyu, oliye onorabulihave mulogo weenyu teto kamunaakamihedha athu eenyu>>.

Currently Selected:

Okuma 5: tke

Highlight

Copy

Compare