Okuma 4
4
Mulugu onomvaha kopolo Mozezi
1Mozezi ahaakulaga, wiira: <<Ki yeera wi ehifunave ogiroromela naari wiiwelela owoga waaga, yiira: <Nabwiya kooneyele wa we> >>. 2Nabwiya ahimukohaga Mozezi, wiira: <<Eyo eli mmadani mwaawo ddi?>> Ahaakulaga, wiira: <<Mukumbuzo>>. 3Nabwiya ahiiraga: <<Ovokedhe vati>>. Mukumbuzo wahisadduwaga nyowa. Vevale Mozezi oothawaga. 4Nabwiya ahiiraga wa Mozezi: <<Ohidde mwiila>>. Oliye ahitadeelaga moono waaye ohidda nyowa ele mwiila, vano yahisadduwaga okala mukumbuzo. 5Nabwiya ahiwogaga, wiira: <<Ela etoonyihedho, eroromele wi Nabwiya, Mulugu a makolo eenyu, Mulugu a Abarahamu, Mulugu a Ezaaki ni Mulugu a Yakobo ahooneyela wa we>>.
6 Nabwiya ahiwogaga, wiira: <<Ovolosihe ndada naawo omurimani>>. Ahiirana ndo. Vavenyihiliiyewo afwanyile nigali na maredda,#4.6 Maredda mu ewogelo ya eHeberi kunatoonyihedha mareddave mbwenye teto dhiredda dhoohiyana-hiyana dha nikupa na muthu. noweela wona maralala. 7Nabwiya ahiwogaga, wiira: <<Ovolosihe ndada naawo omurimani>>. Mozezi ahiwelelaga ovolosihawo, vavenyihiliiyewo ahoonaga nigali wona mwakaleliiwa nikupa naaye. 8Nabwiya ahiwogaga, wiira: <<Yahuuroromela, naari ehirumeedhela pama etoonyihedho yowambeela, mwa emohi, enoodha eroromele. 9Mbwenye yahiroromela dhitoonyihedho dhedho biili, ehiiwa teto owoga waawo, orugwe mahinje a muNilu, othathiledhe vati vowumma. Mahinje ayene onaarugwiiwe mwinko enoodha esadduwe ekale a mwazi vati vevale>>.
10Ndala Mozezi ahiiraga wa Nabwiya: <<Aa, Nabwiya! Miyo kaginonile owoga okuma omambeelelo ofiyedha peeno munawogiinyu ni miyo mwiimeleli eenyu. Vowi gili muthu ooguguma>>. 11Nabwiya ahimwaakulaga, wiira: <<Osasanyile mulomo wa muthu baani? Naari omusasanyile muthu okala oohuwoga, oohiiwa, owoona naari ohoona baani? Kahuwo miyo Nabwiya? 12Dhowa dhiinoveva! Miyo ginowuukamihedha yoofwaneela owoga>>.
13Mozezi ahaakulaga, wiira: <<Aa, Nabwiya! Murumeni mmohi ogihiya miyo>>. 14Vevale Nabwiya ahitakaleliwaga ni Mozezi, wiira: <<Aroni, muLeevi, kahuwo ddibilo? Gihinona wi oliye onowoga pama. Onoodha agumane ni we, oofwanya onoodha ohagalale. 15Ndala onoodha omwaaddele ni omvaheedhele madhuya. Miyo ginoodha gikale ni we vamohi ni Aroni, ginoodha gusuuzihe yego munaafunigiinyu wiirana. 16Aroni onoodha awoge ni mulogo vamburoni vaawo wona namafiyihedha, afiyihedhege dhoowoga dhaawo, ndala we onoodha okale wona Mulugu a oliye. 17Thukula mukumbuzo ola mmadani mwaawo; mwa olena onoodha wiirena dhitoonyihedho>>.
Mozezi onowelela wEgubuddu
18Mozezi ahiwelela wa mooya aaye Zhetero, wiira: <<Mugihiye giwelele wEgubuddu wi gawoone addibilaga akala agumi>>. Zhetero ahimwaakulaga, wiira: <<Dhowa mmurenddeleni>>.
19 Nabwiya ahiwogaga teto ni Mozezi oMidiyani, wiira: <<Dhowa owelele wEgubuddu vowi ehikwa aatene alene yafuna wuupa>>. 20Ndala Mozezi ahimuthukulaga mwihiyanaaye vamohi ni anaaye, waagweliha vabuuruni, owelelaga elabo ya wEgubuddu, agathukule mukumbuzo wa Mulugu mmadani mwaaye.
21 Nabwiya ahimwaaddelaga teto Mozezi, wiira: <<Wafiya wEgubuddu, woonihedhe wa Farawo dhootikiniha nde dhaatedhene guwiikeleliimi wi weerena. Mbwenye ginoodha gimummihe murima Farawo, ahirumeedhele wi mulogo odhowege. 22Omwaaddele Farawo, wiire: <Nabwiya dinawoga: Ezarayeli di mwaanaga owambeela. 23Guhuwaaddela wi: Omwihiye adhowege mwaanaga adhowe agilabege. Akala we ohumukooddiha odhowa, ginompa mwaanawo owambeela> >>.
24Mozezi voolenddoni, agali vamburoni voogonavo, Nabwiya ahimfwanyaga, afunaga ompa. 25Vevale Zipora ahithukulaga nibwe nowiirwa, omwiinelana mwaanaye; omukahinyana manyalo Mozezi, ahiwogaga, wiira: <<Ebaribareene, we oli ndala mamuna a mwazi wa miyo>>. 26Ndala Nabwiya ahimwihiyaga Mozezi. Zipora ahiwogaga, wiira: <<Oli ndala mamuna a mwazi>> mwaha wowiinela.
27 Nabwiya ahiwogaga ni Aroni, wiira: <<Dhowa mwiiddeddereni wi wagumane ni Mozezi>>. Oliye onoodha, agamfwanyile Mozezi omwaangoni wa Mulugu; ahimulojelaga ni bezhu. 28Mozezi ahimwaaddelaga Aroni madhu maatene yamurumile Nabwiya ni dhitoonyihedho dhaatedhene dhamurumiliiye wiirana. 29Ahivenyaga Mozezi ni Aroni, waatugumanya apogo aatene aEzarayeli. 30Aroni ahawaaddelaga madhu maatene ayene Nabwiya yamwaaddeligiiye Mozezi, vano ahiiragana dhitoonyihedho vaari va mulogo. 31Mulogo wa Ezarayeli wahiroromelaga. Veewiliiwa wi Nabwiya ahaweeddela aEzarayeli mwa mabasa, ahoona orabulihiwa weewa, vevale mulogo wahikokoraga, omutamaala Nabwiya.
Currently Selected:
Okuma 4: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
