Okuma 39
39
Masasanyedho a dhoowara dha anamakutha
(Okuma 28.1-43)
1Ni osalu wamataakuru, waroxa, ni woofiila, yahisasanyedhela dhoowara dhapama, dhooluwa, dhoolabana mmusasani wa Mulugu; dhoowara dhoosakuleliwana wa Nabwiya, dhaali dha Aroni wona mwemo Nabwiya mwamulamuleliiye Mozezi. 2Yahisasanyedhela efodi ni osalu wa oro, wamataakuru, waroxa, woofiila, ni nthoje nookwima. 3Yahihana oro, ozhazhaaliha, ogwadda okala osalu, wooluwana, ni osalu wamataakuru, waroxa, woofiila, vamohi ni nthoje nookwima, mabasa oorandda. 4Yahisasanyedhela mingoyi dhiwa miinddi dhoomagana mmafuddini. 5Muddiddi wasoneliwe efodi wasasanyiwe ni orandda, guwiiwa yaali emohive, ya osalu wa oro, wamataakuru, waroxa, woofiila, ni nthoje nookwima, wona mwemo Nabwiya mwamulamuleliiye Mozezi.
6Yahisasanyedhela mabwe a onikisi wapeeleliha oro mmagomelo mwiwa, otopavo mandina a ahima a Ezarayeli. 7Yahimagelela mabwe ale mmingoyini dha mmafuddini wi ekale yowuubusedha ya aEzarayeli, wona mwemo Nabwiya mwamulamuleliiye Mozezi.
8Yahisasanyedhela yoowara ya omurimani yoosoniwa ni orandda, yooligana ni efodi, ni osalu wa oro, wamataakuru, waroxa, woofiila, ni nthoje nookwima. 9Mpimoya wakala, ndada nimohi mmagomelo mwaatemwene yakuniwa. 10Yahitadamo mabwe oofuneyesesa mizele minnayi. Muzele wowambeela mwaali rubi, topaziyu ni ezhimiralida. 11Muzele, wa nabiili mwaali mabwe a turekesa, safira ni diyamanti. 12Muzele wa neethaaru wahikalana zhasintu, agata ni ametixta. 13Muzele wa nennayi mwaali kirisolitu, onikisi, ni zhaxipe. Mabwe alena maatene yaapeelelihiwe ni ohiddeliwa ni oro. 14Mabwe ala yaali kumi nameenddi wona mandina a ahima aEzarayeli. Yahaatopa mandinaya wona olebiwa wa karimbu, wa mulogo kumi ni miinddi dha aEzarayeli kadda mulogo ndina neewa.
15Yahisasanya kurenti ya oro apama osonela va yoowara ya omurimani. 16Yahisasanyedhavo teto pethe biili dha oro omagela omwaango mmagomelo mwa yoowara ya omurimani. 17Yahimagelelamo makurenti meenddi a oro mpetheni biili mmagomelo mwa yoowara ya omurimani. 18Yahimagelela makurenti mmagomelo mwa dhingowo biili, mmafuddini mwa efodi.
19Yahisasanya pethe biili dha oro, ohela mmagomelo mwa yoowara ya omurimani. 20Yahisasanya pethe dhimohi biili dha oro, omagelela muddibani mwa yoowara waaddamela ni musono vadhulu va muddiddi wa efodi. 21Yahigumaniha yoowara ya omurimani ni pethe dha efodi ya onamakutha vadhulu viwa yahikalana mungoyi wamataakuru waali vadhulu vamuddiddini wa efodi ya onamakutha; ndala yoowara ya omurimani kayahiya efodi ya onamakutha, wona mwemo Nabwiya mwamulamuleliiye Mozezi.
22Yahisona maleya oolapa a efodi, ni guwo yamataakuru yaatene, mabasa a anamaluwa. 23Vaari va maleya ale vahikala paga voovirihavo muru, yoopideliwa ni osalu wooliba wi ehitaleye voowara. 24Mowaapeeleliha maleya dhipaddi ya vati, yahihelavo dhiroma ni orandda ni osalu wamataakuru, waroxa, woofiila, ni nthoje nookwima, 25vamohi teto ni dhooruma dha oro apama. Dhiroma ni dhooruma dhiwa dhoothawana emohi ni ekwaaye. 26Va maleyani oolapa a namakutha ole vahaapelelihiwa dhiroma ni dhooruma, wona mwemo Nabwiya mwamulamuleliiye Mozezi.
27Aliwa yahimusasanyedhela Aroni ni anaaye mikanjo, maleeso a mmuruni ni guwo ya nthoje nookwima. Yahisasanya middiddi dhooborodaariwa, 28maleeso a mmuruni ni akabuddula ni nthoje nookwima. 29Middiddi dhahisasanyiwa ni orandda ni nthoje nookwima, dhooborodaariwa ni osalu wamataakuru, waroxa, ni woofiila, wona mwemo Nabwiya mwamulamuleliiye Mozezi.
30Ni oro apama yahisasanyedhela ecapa ya kara yoweelihiwa otopavo madhu owi: <<Dhoosakuleliwa Nabwiya>> wona olebiwa wa karimbu. 31Yahimagelela ni osalu wamataakuru osogolo wa leeso na mmuruni, wona mwemo Nabwiya mwamulamuleliiye Mozezi.
AEzarayeli enomariha omaga musasa wa Mulugu
(Okuma 35.10-19)
32Ndala yahimariha mabasa maatene a musasa woogumanamo ni Mulugu. AEzarayeli ebaribareene yahiirana dhaatedhene Nabwiya dhamulamuleliiye Mozezi, yahiirana ndo. 33Ndala yahidhana wa Mozezi dhaatedhene dha musasa wa Mulugu, dhingowo, abodhoya, mapagoya, dhimiri dhiwa ni mathiwaya; 34dhookuneelana dha makupa a mabila ookathiwa wi ekale oofiila, dhookuneelana dha makupa aneenyama amwinko, ni guwo yoogawa; 35kaxa ya nipangano no waandana, ni dhimiri dhiwa ni yookuneelanaya; 36meeza ni dhookamihedha dhiwa dhaatedhene ni mikaathe dha vameentoni va Nabwiya; 37extanti ya oro ni panti dhiwa ni dhookamihedha dhiwa dhaatedhene ni makura oohiddihana; 38niburo na mukutho na oro na libani, makura oosakuleliwana mabasa, libani noonukwelesa, ni guwo yoothiithihedha ya vamavolowelo va musasa; 39niburo na mukutho dhoopaha ni olalo wa mukuwa, dhimiri, dhoobo dhaatedhene; basiya ni nthiwa, 40Guwo dha cinga, abodho ni mathiwa, ni guwo yoogawa vamavolowelo, mingoyi ni dhikomelo dhiwa, dhoobo dhaatedhene dhoolabana mmusasani woogumanamo; 41dhoowara dhoolabana vamburoni woweela, dhoowara dhooweelihiwa dha namakutha Aroni, ni dhoowara dha anaaye wi elabegena wona anamakutha.
42AEzarayeli yahiiragana mabasa maatene ndala wona mwemo Nabwiya mwamulamuleliiye Mozezi. 43Vowoona Mozezi mabasa maatene, ahoonaga wi ebaribareene esasanyiwe ndale wona Nabwiya mwamulamuleliiye; vevale Mozezi ahaareelihaga aEzarayeli.
Currently Selected:
Okuma 39: tke
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.