Okuma 40
40
Mulugu onomulamula Mozezi wiimese musasa
1 Nabwiya ahiwogaga ni Mozezi, wiira: 2<<Nlabo nowambeela na mweeri wowambeela, wiimese musasa, oli musasa woogumanamo ni Mulugu. 3Ohelemo kaxa ya nipangano no waandana, othiithihedhe ni guwo yoogawa. 4Odhena meeza, osasanyedhevo ni dhego dhaatedhene dhinakala vevale; odhena teto extanti voohela panti, osasanyedhe dhookamihedha dhiwa. 5Ohelemo niburo na mukutho na oro ya libani osogolo wa kaxa ya nipangano no waandana. Omagelele guwo vamavolowelo va musasa. 6Osogolo wa vamavolowelo va musasa woogumanamo ohelemo niburo na mukutho dhoopaha. 7Vaari va musasa woogumanamo ni niburo na mukutho dhoopaha viheliwe basiya nuulubale, ohelemo mahinje. 8Wiimese cinga mowapeelela musasa ole, omagelelevo guwo vamavolowelo.
9<<Othukule makura oosakuleliwana mabasa, okuthulele musasa ni dhaatedhene dhili mwemo ni dhookamihedha dhiwa dhaatedhene. Dhinoodha dhikale dhoosakuleliwela Nabwiya. 10Okuthulele teto niburo na mukutho dhoopaha ni dhookamihedha dhiwa dhaatedhene. Niburo na mukutho nddo nnoodha nikale noweelesesa noosakuleliwa Nabwiya. 11Okuthulele teto basiya ni nthiwa niwa. Dhinoodha dhikale dhoosakuleliwa Mulugu.
12<<Omudhena vamavolowelo va musasa woogumanamo, Aroni ni anaaye, waahabihe ni mahinje. 13Omuwarihe Aroni dhoowara dhoosakuliwa, omukuthulele makura oosakuleliwana mabasa. Onoodha akale oosakuleliwa mabasa a onamakutha. 14Waadhena teto anaaye, waawarihe maleya oolapa. 15Waakuthulele wona teto wamukuthuleliiwe Aroni wi egihiddelege mabasa a onamakutha. Osakuliwa weewa oneere okale omohive ni anamabaliwelamo eewa a musogolo, malabo maatene>>.
Wiimesiwa wa musasa wa Mulugu
16Mozezi ahiiragana dhaatedhene nda wona mwemo Nabwiya mwamulamuleligiiye. 17Nlabo nowambeela na mweeri wowambeela wa yaaka ya nabiili, musasa wa Mulugu wahiimesiwaga. 18Mozezi ahiimesaga musasa: ahikaraatihaga mathiwaya, ahaatandaanyihedhaga abodhoya, waamagiha mapagoya. 19Ahikuneelaga musasa ole ni guwo, odhulu wiwa ahithulelaga ni makupa, wona mwemo Nabwiya mwamulamuleliiye Mozezi.
20Ahithukulaga mabwe ootopiwa a nipangano no waandana, ohela mu kaxani, ovirihamo dhimiri dhoothukulana, ahihelagavo yookuneelana vadhulu va kaxa. 21Ahidhaagana kaxa ele mba, ahimagelelagavo guwo yoogawa yoothiithihedha kaxa ya nipangano no waandana, wona mwemo Nabwiya mwamulamuleliiye Mozezi. 22Ahaahelaga teto meeza mmusasani woogumanamo, ode wa guwo yoothiithihedha, epaddi dha wewo onadhowela pevo ya murubi. 23Vameeza vevale ahihelagavo mikaathe dha vameentoni va Nabwiya, wona mwemo Nabwiya mwamulamuleliiye Mozezi.
24Ahihelaga teto extanti voohela panti mmusasani woogumanamo osogolo wa meeza, epaddi wewo onakuma pevo ya murubi. 25Ahihelaga panti vameentoni va Nabwiya, wona mwemo Nabwiya mwamulamuleliiye Mozezi.
26Ahihelaga teto mmusasani woogumanamo niburo na mukutho na oro, waaddamela guwo yoogawa. 27Ahipahagavo libani noonukwelesa, wona mwemo Nabwiya mwamulamuleliiye Mozezi.
28Ahimagelelagavo teto guwo vamavolowelo va musasa ole. 29Waaddamela vamavolowelo va musasa woogumanamo, ahihelagavo niburo na mukutho dhoopaha. Vevale ahikuthagavo mukutho woopaha ni mukutho wa dhilo, wona mwemo Nabwiya mwamulamuleliiye Mozezi.
30Vaari va musasa woogumanamo ni niburo na mukutho dhoopaha, ahihelagavo basiya nuulubale, ohelamo mahinje oohabamo. 31Mozezi, Aroni ni anaaye yoohabagamo madada ni ohuwamo manyalo eewa, 32yaafunaga ovolowa mmusasani woogumanamo teto yoohabagamo yaafunaga opaha mukutho, wona mwemo Nabwiya mwamulamuleliiye Mozezi.
33Ahiimesagavo cinga mowaapeeleliha musasa ni niburo na mukutho dhoopaha, vano ahimagelelagavo guwo vamavolowelo wa cinga. Ndala Mozezi ahaakwanihaga mabasa.
Nthithimiho na Nabwiya nnodhaala mmusasani
34Vevale murabo wahihuruwedhaga musasa woogumanamo ole, nthithimiho na Nabwiya nahidhaalagamo mmusasani. 35Mozezi kaakwanihaga ovolowa mmusasani woogumanamo, vowi murabo kawavenyilegemo, nthithimiho na Nabwiya nahidhaalagamo mmusasani. 36Murabo vavenyiligiiwamo, okala odhulu, vevale aEzarayeli feeddigiiwa edhowaga, moolenddo eewa maatene. 37Murabo waahivenyavo, kayeeddaga ofiyedha nlabo nendde murabo waavenyiiwavo. 38Mutana murabo wa Nabwiya wakaraati vadhulu va musasa, mahiyu wasadduwa munddo. Mulogo wa aEzarayeli wowoonawo moolenddo eewa maatene.
Currently Selected:
Okuma 40: tke
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.