Okuma 38
38
Masasanyedho a niburo na mukutho dhoopaha
(Okuma 27.1-8)
1Bezaleli ni ameesili amohi yahisasanyedhela niburo na mukutho dhoopaha ni mithanko dha akaasiya. Olapa wiwa ni orambalala wiwa woofwanafwana, meeturu meenddi ni meya (2,5m). Otaama wiwa waali meeturu nimohi ni meya (1,5m). 2Yahitogola mithanko dhiwa wona manyaga mannayi mmagomelo mwiwa, ohuruwedhiwa ni mukuwa. 3Yahisasanyedhela dhookamihedhana dhiwa dhaatedhene ni mukuwa, biya dhoohelamo nddoora, apaya, mabasiya, magaarufu oolapa ni biya dhoohelamo makala. 4Yahisasanyedhela olalo ni mukuwa, othukuthedha vaari va odhulu ni vati vamburoni na mukutho dhoopaha. 5Yahinyungulusa mangooza mannayi a mukuwa mmonddoni mwiwa, ohela mmagomelo mwa olalo wi evirihegemo dhimiri dhoothebana. 6Yahisasanyedhela dhimiri dha akaasiya, ohuruwedha ni mukuwa. 7Yahivolosihamo dhimiri mmangoozani mule wi ethukuliwegena. Niburo na mukutho dhoopaha dhasasanyiwe mbararuni mwiwa ni matabwa vano muwari mwiwa mwaali nikungunene.
Masasanyedho a basiya
(Okuma 30.17-21)
8Yahisasanyedhela basiya nuulubale na mukuwa, ni nthiwa niwa na mukuwa. Mukuwa ola wavenyihiwa mmasupeeloni a ahiyana yalaba vamavolowelo wa musasa woogumanamo.
Masasanyedho a cinga
(Okuma 27.9-19)
9Yahisasanyedhela cinga na musasa wa Mulugu. Epaddi ya wewo onakuma pevo ya murubi, yahihelawo guwo yowiimela ya nthoje na mutheengo wookwima, olapa wiwa meeturu makumi matanu (50m). 10Yahisasanyedhela abodho eewa makumi meenddi, ni mathiwaya makumi meenddi a mukuwa. Dhingowo ni dhoolibihana dha abodho dhaali dha parata. 11Yaali teto emodha-modhave, epaddi ya wewo onadhowela pevo ya murubi. Olapa wiwa wa guwo waali meeturu makumi matanu (50m). Abodhoya makumi meenddi ni mathiwaya makumi meenddi yaali a mukuwa. Dhingowo ni dhoolibihana dha abodho dhaali dha parata. 12Epaddi ya wewo onadhowela nduwa, wahikala guwo dha meeturu makumi meenddi ni matanu (25m), ni abodhoya kumi ni mathiwaya kumi. Dhingowo ni dhoolibihana dha abodho dhaali dha parata. 13Epaddi ya wewo onakuma nduwa, cinga nanna meeturu makumi meenddi ni matanu (25m). 14Vamavolowelo nikukuru na moono wooja, guwo yaali meeturu matanu nameenddi ni meya (7,5m) ni abodhoya araaru ni mathiwaya maraaru. 15Yaali ndala nikukuru nimohiniwa, guwo yowiimela yaanna meeturu matanu ni meenddi ni meya (7,5m); abodhoya yaali araaru ni mathiwaya maraaru 16Guwo dhaatedhene dha cinga dhaali dha nthoje nookwima. 17Mathiwa maatene a abodhoya yaali a mukuwa. Dhingowo ni dhoolibihana dha abodho dhaali dha parata, vadhulu viwa teto yahuruweliwe ni parata. Abodho a cinga naatenene yahikanna dhoolibihana dha parata. 18Vamavolowelo vahikala guwo dha nthoje nookwima yooborodaariwa ni osalu wamataakuru, waroxa ni woofiila, esasanyedhiwe ni namaborodaari oorandda. Olapa wiwa waali meeturu kumi (10m), otaama wiwa waali wona guwo dhimohi dha cinga, meeturu meenddi ni meya (2,5m). 19Guwo ela ya vamavolowelo yanna abodho annayi ni mathiwaya mannayi a mukuwa. Dhingowo ni dhoolibihana dha abodho dhaali dha parata, vadhulu viwa teto yahuruweliwe ni parata. 20Dhikomelo dhaatedhene dha musasa ni cinga dhaali dha mukuwa.
Wiinjiva wa dhooveleela
21Wula weelengiwa wa dhooveleela dhalabile musasa wa onamoona. Dhalebiwe ni aLeevi, esogoleliwaga ni Etamari, mwaana a namakutha Aroni, yahiirana wona Mozezi mwalamuleliiye.
22Bezaleli, mwaana a Uri, oli mwaana a Huri, a nihimo na Zhuda, ahisasanya dhaatedhene dhendo Nabwiya dhamulamuleliiye Mozezi. 23Bezaleli ahihidda mabasa ni Oholiyabi, mwaana a Ahisamake, a nihimo na Dani, aali oorandda, namasasanyedhela ni namaborodaari ni osalu wamataakuru, waroxa, ni woofiila ni dha nthoje nookwima.
24Wiinjiva wiwa wa oro ahiddile mabasa a niburo noweela, oyene aveleeliwe wa Nabwiya wona yoovaha, aali kilu mazana matanu na mannayi, ni makumi matanu nammohi ni kilu tanu (965kg).
25Parata yaveleeliwe mu mudhidhi woolebeliwa, wiinjiva wiwa okwaranya kilu macikwi maraaru ni kilu mazana maraaru (3.300kg). 26Alobwana yalebeliwa eganna yaaka makumi meenddi odhowa osogolo, wiinjiva wiwa waali macikwi mazana matanu nammohi, ni macikwi maraaru, ni athu mazana matanu ni athu makumi matanu (603.550). Mmohi ni mmohi ahivaha garama tanu dha parata. 27Ni parata ela, yasasanyedhela mathiwa zana (100) a niburo noweela ni a guwo yoogawa. Nthiwa ni nthiwa nakalana kilu makumi maraaru ni kilu thaaru (33kg), ndala parata a mathiwa maatene aali kilu macikwi maraaru ni kilu mazana maraaru (3.300kg). 28Ni parata yahalile yahisasanyedhela dhingowo ni dhoolibihana dha abodho teto ohuruwedhana vadhulu va abodho.
29Mukuwa wavahiwe Nabwiya wona yoovaha waakwanile kilu macikwi meenddi ni kilu mazana maraaru (2.300kg). 30Ni olena yahisasanyedhela mathiwa omavolowelo wa musasa woogumanamo, niburo na mukutho dhoopaha, olaloya ni dhookamihedha dhiwa dhaatedhene, 31mathiwa a cinga naatene, mathiwa a vamavolowelo va cinga ni dhikomelo dhoohiddana musasa ni cinga.
Currently Selected:
Okuma 38: tke
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.