Okuma 35
35
Nlabo noovuma
1Mozezi ahaatugumanyaga aEzarayeli aatene, ahiwogaga ni aliwa, wiira: <<Ala bi madhu ayene Nabwiya yaalamuliliiye wi yawiiregena: 2Mulabege malabo matanu nammohi, na neetanu nameenddi nneere nikalege wa nyoovo nlabo noweela, nlabo noovuma nowaakwanela mwa Nabwiya. Oyene oneere alabe onoodha apiwe. 3Nlabo noovuma muhutubaanyege munddo mmavade mweenyu>>.
Dhoovaha mmusasani mwa Mulugu
(Okuma 25.1-7)
4Mozezi ahiwogaga ni aEzarayeli aatene, wiira: <<Ala bi madhu a Nabwiya yoolamuliliiyeni, eeraga: 5<Oddoddele mvahi wa Nabwiya. Aatene ayene enarumeedha ni murima weewa edhena dhooveleela dhiwa: oro, parata, ni mukuwa, 6osalu wamataakuru, waroxa, ni woofiila, osalu wa nthoje nookwima, ni mooya a mbuzi; 7makupa a mabila ookathiwa wi ekale oofiila, makupa a aneenyama amwinko, ni mithanko dhoosema dha akaasiya, 8makura a panti ni dhoonukwela pama dhootaganyihedhana makura oosakuleliwana mabasa, dhoonukwela pama dha libani; 9mabwe oofuneya eneethaniwa onikisi, ni mabwe a misawo-misawo teto oosemiwa oowomihana yoowara ya anamakutha: efodi yoowara ya omurimani.
Woobiwa wa ameesili
(Okuma 31.6-10; 39.32-43)
10<< <Edhe ameesili aatene oononelamo a mwa nyoovo, esasanye mabasa maatene wona Nabwiya mwaalamuleliiye, eeraga: 11musasa woothukuliwa, dhookuneelana dhiwa, dhingowodha, abodhoya, mapagoya, dhimiridha, mathiwaya, 12kaxa ni dhimiri dhoothebana, yookuneelana ya kaxa ela ni guwo yoogawa, 13meeza ni dhimiri dhoothebana, dhego dhookamihedhana dhaatedhene ni mikaathe dha vameentoni va Nabwiya, 14extanti ni panti dhiwa ni dhookamihedhana, vamohi ni makuraya, 15niburo na mukutho wa libani ni dhimiridha, makura oosakuleliwana mabasa, libani noonukwelesa, ni guwo yoothiithihedha ya vamavolowelo va musasa, 16niburo na mukutho dhoopaha ni olalo wa mukuwa, dhimiri, dhoobo dhaatedhene, basiya ni nthiwa, 17guwo dha cinga, abodho ni mathiwa, guwo yoogawa vamavolowelo, 18dhikomelo dha musasa, dhikomelo dha cinga, ni mingoyi dhiwa, 19dhoowara dhoolabana vamburoni woweela, dhoowara dhooweelihiwa dha namakutha Aroni, ni dhoowara dha anaaye wi elabegena wona anamakutha> >>.
Dhoovaha dha mulogo
20Vevale mulogo waatene wa aEzarayeli wahimwaadheyaga vaaligiisu ni Mozezi, odhowa mumburoni mweewa. 21Alene yarumeedhelaga ni mirima dheewa, alene muneba weewa wafuna yahidhaaga, edhaagana dhoovaha wa Nabwiya wi dhihiddiwena mabasa a musasa woogumanamo, dhookamihedhana, dhoowara dhooweelihiwa. 22Aatene yannaga mirima dhoorumeedhela yahidhaaga, alobwana ni ahiyana. Yoodhaagana dhowiiriyihana dha misawo-misawo dha oro: Dha mukohi, dha mmabaruni, dha mmoononi ni dha mwimbunoni. Aatene alene yadhiilege, yahitedeedhelaga wa Nabwiya dhoovaha dhiwa dha oro. 23Yoodhaagana teto osalu wamataakuru, waroxa ni woofiila, ya nthoje nookwima, mooya a mbuzi, makupa a mabila ookathiwa wi ekale oofiila, makupa a aneenyama amwinko. 24Aatene alene yannaga parata ni mukuwa yoodhaagana, omvaha Nabwiya. Oyene annaga mithanko dha akaasiya dhoolabana mabasa alene, yoodhaagana. 25Ameesili aatene aahiyana yoosasanyaga osalu ni madada eewa, odhana, osalu wamataakuru, waroxa, woofiila, ni osalu wa nthoje. 26Ameesili aahiyana ayene yarumeedhelaga ni mirima dheewa yoodhaagana osalu wasasanyiiwa ni mooya a mbuzi. 27Asogoleli yoodhaagana mabwe a onikisi, ni mabwe oofuneya oosasanyedhiwana efodi ni yoowara ya omurimani ya namakutha. 28Yoodhaagana teto dhoonukwela, makura a panti, makura oosakuleliwana mabasa, makura oosasanyiwana libani.
29AEzarayeli aatene, alobwana ni ahiyana, ayene yarumeedhelaga ni mirima dheewa, yoodhaagana dhoovaha wa Nabwiya moofuna wi ehiddena mabasa ayene Mulugu yamurumiliiye Mozezi.
Mulugu onowaasasanyedha ameesili oomaga musasa
30Mozezi ahiwogaga ni aEzarayeli, wiira: <<Nabwiya ahimusakula Bezaleli, mwaana a Uri, oli mwaana a Huri, a nihimo na Zhuda, 31omudhaaliha Muneba wa Mulugu ni tthottho, ononelamo, ni orandda wa mabasa maatene, 32asasanyege dhoohadhihela dha omeesili ni oro, parata ni mukuwa. 33Teto akalena orandda woolaba ni mabwe ni mithanko, orandda woosasanyedhela ni osasanya mabasa maatene omeesili. 34Teto ahimvaha Bezaleli murima wosuuziha, vamohi ni meesili Oholiyabi, mwaana a Ahisamake, a nihimo na Dani. 35Nabwiya ahaadhaaliha onona ohidda mabasa maatene omeesili teto wi ekale anamasasanyedhela teto onona dhoolaba ni osalu wamataakuru, waroxa, woofiila, ni wa nthoje nookwima>>.
Currently Selected:
Okuma 35: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
