Okuma 36
36
1<<Nuwindo, Bezaleli ni Oholiyabi ni ameesili aatene, ayene Mulugu yaavahiliiye onona ohidda mabasa maatene a musasa, enafuneya wi ehiddege mabasa ala wona Nabwiya mwalamuleliiye>>.
2Mozezi ahawiithanaga Bezaleli, Oholiyabi ni ameesili aatene, ayene Nabwiya yaavahiliiye onona, ayene yarumeedhela ni mirima dheewa odha ohidda mabasa alene. 3Alena yahaakela ni Mozezi dhoovaha dhaatedhene dhendo aEzarayeli yadhiiligiiwana wi ehiddena mabasa oosasanyedhiwana musasa. Bebehi ni bebehi mulogo woodhaaganaave dhoovaha dhiwa moofuna. 4Ndala ameesili aatene yahidhaagana omabasani a musasa, 5owoga ni Mozezi, yiiraga: <<Mulogo onoodhana mookwaranyiha dhafuneya wa mabasa alena Nabwiya yanilamuleliiye wi ehiddiwege>>. 6Vevale Mozezi ahaaddelihaga mulogo, mmisasani mweewa, eeraga: <<Kakalevo mulobwana naari mwihiyana oneere adheegena dhoovaha dha musasa>>. Ndala athu yahihiihiwaga odhana 7vowi dhoovaha dheewa dhahaakwana ohiddana mabasa maatene, ofiyedha ohala.
Masasanyedho a musasa wa Mulugu
(Okuma 26.1-31)
8Ndala ameesili aatene yahisasanya musasa wa Mulugu ni guwo kumi dha nthoje na mutheengo wookwima, dhisasanyiwe ni osalu wamataakuru, waroxa ni woofiila. Otopa dhoopaddusiwa dha odhulu dha mompelo, oosasanyedhiwa ni orandda. 9Olapa wiwa wa yookuneela ni yookuneela waali meeturu kumi ni mannayi ni meya (14,5m). Orambalala wiwa waali meeturu meenddi (2m). Dhookuneela kumi ni emohi dhoofwanafwana. 10Guwo tanu dhahiluddeleliwa ni dhikwaaye teto dhimohi tanu dhahiluddeleliwa ni dhikwaaye. 11Mmagomelo moolapa mwa guwo tanu ni tanu dhahiheliwamo makaando a guwo yamataakuru. 12Yahisasanya makaando makumi matanu (50) ohela omagomelo wa guwo emohi, osasanya teto makaando makumi matanu (50) ohela omagomelo wa guwo emohiwa, makaando ala yoosugwana nimohi ni nikwaaye. 13Yahisasanyedhela teto dhingowo makumi matanu (50) dha oro ogumanihegena guwo ndo ni dhingowo. Ndala dhaatedhene dhahifiyedha okala musasa mmohi.
14Yahiluwa dhookuneela kumi nammohi dha mooya a mbuzi dhookuneelana musasa. 15Olapa wiwa wa yookuneelana ni yookuneelana waali meeturu kumi ni matanu (15m). Orambalala wiwa waali meeturu meenddi (2m). Dhaatedhene dhoofwanafwana. 16Yahiluddelela vamohi tanu teto oluddelela dhimohi tanu nammohi dhahalile. 17Yahisasanyedhela makaando makumi matanu (50), ohela makaanduya omagomelo wa guwo teto yahisasanyedhela makaando makumi matanu (50) ohela guwo emohi. 18Yahisasanya dhingowo makumi matanu (50) dha mukuwa dhoongowana makaando ale, ndala guwo dhaatedhene dhahifiyedha okala musasa mmohi.
19Yahisasanya yookuneelana ya musasa ole ni makupa ookathiwa a mabila wi ekale oofiila, vadhulu viwa yahikuneelavo ni makupa a aneenyama a mwinko.
20Yahisema teto mithanko dha akaasiya, okala abodho owiimesana musasa ole. 21Olapa wiwa bodho ni bodho waali meeturu matanu (5m), orambalala wiwa waali masentimeeturu makumi matanu nameenddi ni matanu (75cm). 22Bodho ni bodho ahikalana dhoohiddeelana dhiwa biili, dhoogumanihana abodho aatene a musasa. 23Ndala yahisasanyedhela abodho a musasa makumi meenddi: epaddi ya wewo onadheela pevo ya murubi. 24Yahisasanyedhela mathiwa a parata makumi mannayi, bodho ni bodho vativiwa vakala mathiwa meenddi. 25Epaddi ya wewo onadhowa pevo ya murubi yaaliwo teto abodho makumi meenddi, 26ni mathiwa a parata makumi mannayi, bodho ni bodho vativiwa vakala mathiwa meenddi. 27Odduli wa musasa, wewo onadhowela nduwa, yahaasasanyedhela abodho atanu nammohi, 28teto yahaasasanyedhela abodho abiili a mmwenddoni. 29Alena abiili yalibihiwa ni mithanko dhimohi vano yahimagiwa ni mapago odhulu ni vati. 30Ndala yaali abodho atanu nathaaru, ni mathiwaya a parata kumi ni matanu nammohi, bodho ni bodho vativiwa vanna mathiwa meenddi.
31Yahisasanyedhela mapago matanu a mithanko dha akaasiya, yaahiddeele abodho a nikukuru na musasa, 32teto mapago matanu wi ehiddeelege bodho a musasa vaputuni amohiwa teto matanu wi ehiddeelege bodho a musasa avaputuni epaddi, onadhowela nduwa. 33Yahisasanyedhela nipago na vaari oviriha ofiya omakuthulo wa abodho. 34Yahaahuruwedha abodho ni oro, yahisasanyedhela mangooza ni oro wi ehiddeelege mapago. Mapagoya yahaahuruwedha teto ni oro.
35Yahisasanyedhela teto guwo yoogawa ni osalu wamataakuru, waroxa, woofiila, ni osalu wa nthoje nookwima. Yahiborodaarivo dhoopaddusiwa dha odhulu dha mompelo oosasanyedhiwa ni orandda. 36Yahisasanyedhela abodho annayi a akaasiya wi etomeyegevo guwo ele, yahihuruwedhana ni oro teto yahisasanyedhela vaabodhoni viwa dhingowo dha oro, yahihana mathiwa mannayi a parata. 37Yahisasanyedhela teto guwo ya vamavolowelo wa musasa, ni osalu wamataakuru, waroxa ni woofiila ni osalu wa nthoje nookwima, mabasa a namaborodaari oorandda. 38Yahisasanyedhela abodho atanu, ohuruwedha vadhuluviwa ni dhoolibihana dhiwa ni oro, mbwenye mathiwiiwa matanu yaali a mukuwa.
Currently Selected:
Okuma 36: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
