Okuma 28

Dhoowara dha anamakutha

(Okuma 39.1-31)

1<<Mwa mulogo wa Ezarayeli ogaaddamelihe ddibilo Aroni, vamohi ni anaaye, Nadabi, Abihu, Eleyazari ni Etamari wi egihiddelege mabasa a onamakutha. 2Omusasanyedhele dhoowara dhooweelihiwa ddibilo Aroni wi avahiwege nthithimiho ni oriyela. 3Owoge ni athu aatene oorandda, ayene gadhaalihiliimi muneba woononesesa wi esone guwo dha Aroni wi asakuliwe naari wi eelihiwe, agihiddelege mabasa a onamakutha. 4Dhoowaradha dhoosona si nda: yoowara ya omurimani, efodi,#28.4 Efodi yaali maleya owaakapatha wona avintalo. Moone Okuma 28.6-14. maleya oolapa, mukanjo wooborodaari, leeso na mmuruni, ni muddiddi woomagela. Oorandda ale esone dhoowara dhooweelihiwa dha ddibilo Aroni vamohi ni anaaye wi egihiddelege mabasa a onamakutha. 5Oorandda ethukule osalu wa oro, wamataakuru, waroxa, ni woofiila, ni guwo dha nthoje na mutheengo wookwima.

6<<Esasanye efodi ni osalu wa oro, wamataakuru, waroxa, ni woofiila, ni guwo dha nthoje na mutheengo wookwima, esasanyedhiwe ni orandda. 7Ekalena mingoyi dhiwa miinddi dhoomagana mmafuddini. 8Muddiddi woosoneliwa efodi osasanyedhiwe ni orandda, guwo emohive elene ni osalu wa oro, wamataakuru, waroxa, woofiila, ni nthoje nookwima.

9<<Othukule mabwe meenddi oofuneya eneethaniwa onikisi, otopevo mandina a ahima a Ezarayeli, 10mandina matanu nammohi nibwe nimohi, mandina matanu nammohi, nibwe nimohiniwa, oharihaga obaliwa weewa. 11Oorandda etope mabwe mameenddeene mandina a ahima a Ezarayeli, wona olebiwa wa karimbu. Waahuruwedhe mmagomelo mwiwa ni oro. 12Waamagelele mabwe ala meenddi mmingoyini ya mmafuddini. Mabwe ala eneere ekale yowuubusedha ya aEzarayeli. Aroni aawarege mandina alena wi ekale yowuubusedha vameentoni va Nabwiya.#28.12 Mandina ala yawariwa ni musogoleli a anamakutha wooniha wi yawiimelela mahimo maatene aEzarayeli vameentoni va Mulugu. 13Osasanye teto ni oro pethe biili, 14mingoyi miinddi dhoopothiwa ni oro apama, omagena pethe dhiwa.

15<<Osasanye teto ni orandda guwo yoowara ya omurimani ya musogoleli a anamakutha wi anonege ofuna wa Mulugu. Osasanye yoowara ele wona musasanyeliiwe efodi ni osalu wa oro, waroxa, ni woofiila, ni guwo dha nthoje nookwima. 16Mpimoya okale, ndada nimohi mmagomelo mwaatemwene yakuniwa. 17Otademo mabwe oofuneyesesa mizele minnayi. Muzele wowambeela okalena rubi, topaziyu ni ezhimiralida. 18Muzele wa nabiili okalena mabwe a turekesa, safira ni diyamanti. 19Muzele wa neethaaru okalena zhasintu, agata ni ametixta. 20Muzele wa nennayi okalena kirisolitu, onikisi, ni zhaxipe. Mabwe maatene ala ehiddeeleliwe ni oro. 21Mabweya ekale kumi nameenddi wona mandina a ahima aEzarayeli. Waatope mandinaya wona olebiwa wa karimbu, wa mulogo kumi ni miinddi dha aEzarayeli, kadda mulogo ndina neewa.

22<<Osasanye kurenti ya oro apama osonele va yoowara ya omurimani. 23Osasanyedhevo teto pethe biili va yoowara ya omurimani, ohele pethe nde omwaango mmagomelo mwa yoowara ya omurimani. 24Ndala omagelele makurenti meenddi a oro mpetheni biili mmagomelo mwa yoowara ya omurimani, 25omagelele makurenti mmagomelo mwa mafuddi a efodi. 26Osasanye pethe dhimohi biili dha oro, ohele mmagomelo mwa yoowara ya omurimani. 27Osasanye pethe dhimohi biili dha oro, omagelele muddibani mwa yoowara waaddamela ni musono vadhulu va muddiddi wa efodi. 28Ogumanihe yoowara ya omurimani ni pethe dha efodi ya onamakutha vadhulu viwa ekalena mungoyi wamataakuru wi okalege vadhulu va muddiddi wa efodi ya onamakutha; ndala yoowara ya omurimani, kinaahiyege efodi ya onamakutha.

29<<Ndala Aroni aathukulege mandina alena a ahima a Ezarayeli va yoowara ya omurimani yoononiha efunelo ya Mulugu omurimani waaye, aavolowaga Mburo Woweela, ekale yowuubusedha mudhidhi waatene vameentoni va Nabwiya. 30Ohele va yoowara ya omurimani ela yoononiha efunelo ya Mulugu, mabwe Uriimi ni Tumiimi,#28.30 Uriimi ni Tumiimi yaali makanga a mabwe ookohedhelana efunelo ya Mulugu. wi dhikalege omurimani wa Aroni, mudhidhi onaavolowigiiye owoga ni Nabwiya. Ndala Aroni onaathukulege mudhidhi dhaatedhene mabwe ale owaakula dhookoha dha aEzarayeli vamurimani vaaye vameentoni va Nabwiya>>.

Dhoowara dhimohi dha anamakutha

31<<Osone maleya oolapa a efodi ni guwo yamataakuru yaatene. 32Vaari va maleya ala vikale paga voovirihavo muru, paga ela ekale yoopideliwa ni osalu wooliba wi ehitaleyege. 33Mowaapeeleliha mwa maleya epaddi ya vati, ohelevo teto furuuta dhineethaniwa dhiroma#28.33 Dhiroma dhaali furuuta dhinafwanyeya dhipaddi dhimohi dha elabo elena. ni osalu wamataakuru, waroxa, ni woofiila teto ohele dhooruma dha oro vaari va dhiroma. 34Dhiroma ni dhooruma nda dhilapelanege, mowaapeeleliha va maleya epaddi ya vati. 35Maleya ala ewariwege ni Aroni amweebedhaga Mulugu. Ndala dhirumege avolowaga ni aakumaga Omburoni Woweela vameentoni va Nabwiya wi ahikwe.

36<<Valeesoni na mmuruni osasanyedhevo ecapa ni oro apama, otopevo madhu owi: <Dhoosakuleliwa Nabwiya>#28.36 Dhoosakuleliwa Nabwiya enamwaaga musogoleli a anamakutha teto mulogo wa Ezarayeli, ni dhego dhaatedhene dha mmusasani. wona olebiwa wa karimbu. 37Omagelele ni osalu wamataakuru osogolo wa leeso ndde. 38AEzarayeli yaveleelaga dhoovaha dheewa dhaatedhene wa Nabwiya, Aroni athukulege dhooviriganiha dheewa, madhu ala egali vayuujini vaaye. Aliwa enodha erumeedhiwe wa Nabwiya oonaga etoonyihedho ele vayuujini va Aroni.

39<<Osasanye mukanjo, leeso na mmuruni ni guwo ya nthoje nookwima. Osasanye muddiddi wooborodaariwa. 40Wa ahima a Aroni waasasanyedhele mikanjo dhoolapa, middiddi ni maleeso mmuruni wi ethithimihiwege ni oriyela.

41<<Omuwarihe ddibilo Aroni ni anaaye; waamiminele makura,#28.41 Waamiminele makura Epaddi dhimohi eni othikitheliwa. ni waasakulela mabasa, waweelihe wi egilabege wona anamakutha. 42Waasasanyedhele akabuddula wi yaawarege, olapa wiwa evenyege mmwiinuni egomelege waaddamela mmakutani. 43Aroni ni anaaye, yaavolowaga mmusasani woogumanamo teto yaadhowaga okutha mukutho omburoni woweela, ewarege guwo dhedhi. Ndala ehigithegele wi ehikwe. Ndda nlamulo noohumala wa oliye ni anaaye a musogolo>>.

Currently Selected:

Okuma 28: tke

Highlight

Copy

Compare